2MAKABE 9
9
A Antiyokus Epifan kũum
(1M 6,1-17; 2M 1,11-17)
1A Antiyokus yii Pɛrs n wa ne nimbãanega. 2Sɩda, a ra kẽe tẽng a ye sẽn boond tɩ Pɛrsepolis, n zɛ wẽnd doogã la a reeg tẽngã n yãmbe. Dẽ puuga neba sũuri tɩ b yi ne sʋʋse t'a kong n zoe ne yãnde. 3A sẽn waa n kolg Ekbatan tẽng la a sẽn wʋm yell ning sẽn pak a Nikanor la a Timote nebã. 4A sũur yikame la a ra baood n na n sɩbga Zʋɩf rãmb n dok b sẽn dig-a wã yãnde. A ra zaoo bilim-bilm la a yeela a neba tɩ b ra yals t'a paam n ta Zerizalɛɛm tao-tao. A ra ka mi tɩ Wẽnd da gila a yell n dɩgl ye. A ra yeelame ne wʋglem: «M sã n ta Zerizalɛɛm m na kɩt t'a lebg Zʋɩf rãmb yao-bulli.» 5La a pa yãe n gom n sɛ la a yik bãag ye. Bũmb ka wẽ, bũmb ka kɛ yĩnga wilg ye. Naaba-Wẽnde, a Israyɛl Wẽnda sẽn ne fãa wã, lobg-a-la bãag sẽn ka tɩɩm ye. A pʋga rooga sẽn dãmbe, a yãada sɩnga a namsgo. 6Rẽ n da segd ne-a, tɩ yẽ me namsa a taab ne namsg buud toor-toore a sẽn yiis a kõb-wẽn-yamẽ. 7A ra ket n maanda wʋglem, a wilg-m-menga ra kɩtame t'a ket n tãoosd raood la a rɩt beem ne Zʋɩf rãmbã n yeel sẽn zãad-b wiidã tɩ b paas wiida tĩiga la a paagame n lʋɩ vugr bala, tɩ bilim-bilma ra zoeta ne pãnga. Lʋɩɩsa yɩɩ wẽnga n koms a yĩnga wils fãa. 8Yẽ sẽn da maand wʋglem mars-marsã wa a pãn-kẽenga tõeeme n kõ mogr noore tɩ mogra reege, wa a tõe n tʋka tãngã, ad-y yẽ n lʋɩ tẽnga, tɩ b na n kong n tʋk a ne pãndare. Yɩɩ woto me la Wẽnnaam pãnga puk neba fãa nifẽ. 9Dĩm sẽn pid ne kõb-wẽndlema ra ket n vɩɩme, la a ra namsda wʋsgo. A nemsa ra tõsd n dʋʋgdame, t'a nina wẽneg n kẽe zũnzũi. A ra põogame t'a waolgã wẽed a tãb-biisã n yikd b sũuri. 10Ned ba a ye ra pa le rat n pẽneg ned ninga sẽn da zẽkd a meng n tat saag zugã, a yũuga keelem yĩnga.
11Dẽ marsã la a yaool n sɩng n na n woog a wʋglem. Wẽnd sɩbgr puka a yam tɩ wakat buud fãa a ra tara toogo. 12Yẽ meng waa n ka le tõe a yũuga ye, t'a yeele: «Togame tɩ d sulg d meng Wẽnd taoore, ka segd tɩ ninsaal mams a meng ne Wẽnd ye.» 13Ad-y nin-yoog a woto pʋʋsgo, Wẽnd ne b nimbãan-zoeera ra ka le tõe n kelg-a ye. 14A waa n lɛɛg n pʋlemdame t'a na n basa tẽn-sõnga rãmb tɩ b soog b mense, tẽng ning a sẽn da zoet n wat a soab pʋgẽ n na n sarm a rotã la a kɩt t'a lebg yao-bulli t'a mum a neba fãa zĩ yɛngã. 15A ra pʋlemdame t'a kõn le zẽng Zʋɩf ne Atɛn ned ye. Yẽ n yaool da gomd pĩnda tɩ Zʋɩf ka tog ne yaoog menga, tɩ b sẽn tog ne bũmb ninga yaa b rɩk-ba, bãmb ne b kamba, n lob luiili la we-rũmsi. 16A ra pʋlemdame t'a sẽn da zɛ wẽnd do-sõnga pĩndã, a na le pids-a ne kũun sõma, a na lebs a lagda fãa la b sõor na yɩɩg pĩnda, la a na yiis a meng korgẽ n yao maanda rũmsi. 17A yeelame t'a meng na n lebga Zʋɩf la a na n saa zĩis fãa n moon tɩ Wẽnd la Pãng-Soaba. 18A namsga ra ka woogd ba bilf ye tɩ zemsg Naaba-Wẽnd da zɩsga b nug a zugu la a ra ka le tẽed yõ wok ye. Dẽ la a gʋls Zʋɩf rãmba sebre. Sebra la woto, a ra yaa bõsgo:
A Antiyokus sebre
19«Dĩm la bʋ-kaood, a Antiyokus, n pʋʋsd Zʋɩf rãmba, tẽnga kamba sẽn pid ne sõmblem. Bɩ Wẽnd kõ-y laafi la sũ-noogo! 20Yãmb ne y kamba sã n be laafi, y tʋʋma sã n kẽnd wala y sẽn date, d na pʋʋs Wẽnd bark wʋsgo. 21Sã n ya maam, m pãng sɛɛ zãng tɩ m gãe m gãagẽ la m ket n tẽegda y yelle tɩ noom-ma. M sẽn yi Pɛrs n wa n mik tɩ m komsa al wʋsgo, m tʋlgame n beool tɩ bũmb da wa maan-y ye. 22Ka yet tɩ m pa le saagd vɩɩm ye, m pʋs n tẽedame meng tɩ m na tɩlge. 23M tẽegame bala tɩ wakat ning fãa m ba sã n dabd n na n zab ne zugẽ dãmba, a ra basda a poorẽ, ned sẽn deegd a zĩiga. 24A miime tɩ woto, ba yel-beed sã n lʋɩ sʋka, ba kibar wẽng sã n wa, tẽnga rãmb ka na n yɛɛs ye tɩ b mii tẽnga sẽn dɩk n bas a soab nugẽ. 25M yãeeme tɩ tẽns niyns sẽn gũbg-b tõndã gũusda tõnd kɩllgo, dẽ la m yãk m biiga t'a na n yɩ dĩma. La yaa naoor ka tɛka, m sẽn waa n saad zugẽ tẽnsã la m kos-y tɩ y kelg-a. M pʋs n toond-a-la seb kãnga menga. 26M kotame la m bõsd-y lame tɩ y tẽeg y sẽn paam fãa mam mengẽ; y sẽn paam kũun sẽn yɩ nin-yend dẽnd bɩ kʋʋnga rẽnna, la y ra maan sõm-zɩtem ne maam la m biig a Antiyokus ye. 27M saagdame t'a na bʋk a sũuri la a zʋgo n tũ m sẽn wilg-a t'a maan bũmb ning ne yãmb la y na wʋm taab moore.»
28Yɩɩ woto la nin-kʋʋda, wẽn-tʋʋs sẽn nams a taab namsg sẽn ka tõe n togsã, yɩɩ woto la a wʋm toogo la a ki tãng zug, pa-weere. 29A tũud-n-taag a Filip n dɩka n wa a ba-yiri la a sẽn da zoet a biig a Antiyokus rabeem, a zoe n tuda Ezipt tẽnga, a Ptoleme Filometor nengẽ.
Currently Selected:
2MAKABE 9: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.