2MAKABE 15
15
A Nikanor tʋʋsda Wẽnde
1A Nikanor wʋmame t'a Zɩɩda ne a neba bee Samari sẽnẽ t'a yet t'a na n taka zabr ne bãmba, vʋʋsg daare. 2Zʋɩf rãmb kẽer n da tũud a Nikanor la b yeel-a lame t'a ra saag n kʋ-b woto wa baas ye, la a vʋʋs daar ninga dũni Soaala sẽn yãk n kõ-b menga. 3Dẽ la nin-wẽnga sok tɩ Yĩngr-Soaala bee yɛ n n yet tɩ b vʋʋs a yopoe daare? 4Dẽ la b leok-a: «Yaa Soaala menga, yaa sẽn vɩ-a yĩngrã menga n yeel tɩ b reeg vʋʋsg daar noore.» 5A leokame: «Mam yẽ yaa pãng soab tẽng zugu la m datame tɩ y bob zabre n maan dĩma daabo.» A yaool n ka tõog n pids a raab wẽnga ye.
A Zɩɩda sẽn zãmse
6A Nikanor rooga ne wʋglem, n yeel t'a na yãk zĩiga n sam a Zɩɩda ne a tũud-n-taasa zab-teedo tɩ yɩ tẽegre so-loaadba fãa yĩnga. 7A Makabe sũur da yaa kẽnkẽ, a ra saagda Wẽnd sõngre. 8A sagla sẽn be-b ne-yẽ wã tɩ b tẽeg sõngr niyns fãa b sẽn paam pĩnda la b saag tɩ rũnna yɛsa, Pãng-Soaba na n le lʋɩɩsa b toogo tɩ d tõog bɛɛbã. 9A karem-b-la Noor sebrã la bãngdba rẽnna, n tẽeg zab niyns sẽn zab pĩnda la a kenga b raoodo n wa ne pãn-paagla. 10A goama kẽ-la b sũurẽ la b le puka b nini tɩ b bãng n paas tɩ bu-zẽmba ka tar pʋga, la b kɩɩsda b sẽn kaoole.
11B fãa sũur da yaa kẽnkẽ la ka b gãnda la b kãna n wa ne rẽ ye. Yaa a gom-noodã. Ade, a Makabe togs-b-la kibare sẽn ya sɩda, a togs-b-la a sẽn yãende, dẽ la b sũ-noogã. 12Ad a sẽn yãendã: maan-kʋʋd kãseng a Oniyas yɩɩ nin-sõngo la ne rẽ fãa b reega a maan-kʋʋr naam. A ra ka mi wilg-m-meng ye, a ra ka nin-toaag ye, a ra gomda neere, a sõmblema sɩngame t'a paooda. A Zɩɩda yãend-a lame t'a zẽkda a nus n pʋʋsd Zʋɩf rãmba yĩnga. 13Ned a to me n lik a Zɩɩda, ned sẽn kʋʋl wʋsgo, sẽn yɛs wa nin-naaba n tar ziir wʋsgo. 14La a Oniyas ra gomda woto: «Nin-kãnga yaa ned sẽn nong a saam-biisi, a pʋʋsda a buudu la buuda na-tẽng yĩnga. Yaa a Zeremi, Wẽnd bãngda.» 15A Zeremi kolga a Zɩɩda n kõ-a sãnem sʋʋga la a yetẽ: 16«Deeg sʋ-sõngo, yaa Wẽnd kũuni, yẽ la f na n tall n kʋ f bɛɛbã.»
A Nikanor kũum
17A Zɩɩda gomda kenga b sũuri la sɩda goama ra tõe n waa ne raoodo, n kɩt tɩ kom-bõones lebg rapa sẽn pidi. Dẽ n so tɩ Zʋɩf rãmba yeele tɩ b pa na n pag b meng tẽnga pʋgẽ ye, b na n yi n sega bɛɛbã n teem zabr nenga, n zab ne b sũuri tɩ bɛɛba ra wã b tẽngã, b rog-n-mikã, b wẽnd dooga ye. 18Ka pagbã bɩ kambã, bɩ saam-biisã, bɩ roagdbã kũum dabeem n da ta tar-b n yɩɩd ye, da yaa do-sõnga wãab dabeem. 19Sẽn da be-b tẽnga pʋgẽ me ra zĩi ne yɩɩre; b ra ka mi zabra sẽn na n baas to-to ye. 20B ra ket n zĩi ne yɩɩre tɩ bɛɛba tigimd taaba, n tong zabr tongre, tɩ wobdã be sʋka, tɩ wiida be kɩremse. 21A Makabe ra yɛs n geta wobda bedrem, b zab-teeda buud sẽn yaa ka tɛka, b yɛsga sẽn ya rũm-toos yɛsga. A zẽka a nus yĩngr n pʋʋs Soaala tɩ b maan wẽnd makre. A ra miime tɩ ka zab-teedo n wat ne tõogre ye, tɩ yaa sẽn tog ne b rãmb la Wẽnd kõt raoodo. 22A yeela woto: «Yãmb la Soaala, yãmb n tʋm y malɛk dĩm a Ezekiyas wẽnnẽ la a kʋ a Senakerib tãb-biis tus koabg la pis-nii la a nu. 23Marsã, Yĩngr-Soaala, tʋʋm-y malɛk sõng a ye t'a lʋɩ d taoore n kẽes bɛɛba rabeem, n yɛɛs-ba. 24Bɩ y tẽeg y kanga wok-woko n wẽ sẽn wa-b n na n tʋʋs Wẽnde, n wã b buud sõngã.» Woto la a baas pʋʋsgã.
25A Nikanor tãb-biisa ra peebda bardo, n yɩɩnd b zabr yɩɩla la b watẽ. 26A Zɩɩda neba ra pʋʋsdame la b ra boonda Wẽnd la b segd bɛɛbã. 27B ra zabda ne b nus la b pʋʋsd b sũurẽ. B sẽn gãneg bɛɛb tẽng taa tus pisi la a nu; b sũur da tosda kaam, Wẽnd sõngr kãsenga yĩnga. 28Zabra sẽn sɛ tɩ b lebg ne sũ-noogo, b yãee a Nikanor t'a ki n gãe ne a zab-teedo.
29B zẽka b koɛɛga, ned kam fãa tãsa waa a sẽn tõe tɛka n pẽgd Yĩngr-Soaala ne b buuda goama. 30A Zɩɩda, rao ninga sẽn da rɩka a vɩɩma zãng n kõ a saam-biisã, sẽn wilg al a yãadmẽ t'a nonga a buudã, kɩtame tɩ b dok a Nikanor zugu la b fiuug a kang n tãag bãoko, n tall n kẽng Zerizalɛɛm. 31A Zɩɩda meng pʋgame, n tigim buudã la maan-kʋʋdbã maan-kugra taoore. A kɩtame tɩ b bool sẽn da be-b na-zaka pʋga. 32A wilg-b-la nin-yoog a Nikanor zugu la kang ning a sẽn zẽk ne tɩtaam n tees Pãng-Soaba-Wẽnd do-sõngã. 33A wã-la wẽn-kɩɩs, a Nikanor, zelemdã n yet tɩ b reeg n kõ luiili. A kɩtame tɩ b yagl a Nikanor kangã n tees wẽnd doogã tɩ neba yãend a gãeemda sẽn kõ-a bũmb ninga. 34B fãa naaga taaba n pẽg Yĩngr-Soaala, sẽn pida ne ziirã, la b yeelame: «Deeg-y pẽgre tɩ y ka sak tɩ b rẽgem y rooga ye.»
35A Zɩɩda yaglga a Nikanor zugã na-yira lalga tɩ neb fãa yãend vẽenega Soaala Wẽnd sẽn sõng b buuda to-to. 36Neba tigma taab la b yɩɩ zelemd yɛng n yals tɩ b kõn bas daar a woto t'a loog n pa tẽeg a yell ye. B yalsame tɩ b na n maana kibsa yʋʋmd-yʋʋmd fãa, a Mardose raara ket tɩ beoogo, dat n yeelame tɩ Adar kiuug, kiuug piig la a yiib soaba, a piig la a tãab daare.
Sebra baasgo
37Yɩɩ woto ne a Nikanor. A kũuma tɛka, Zʋɩf rãmb sooga b tẽnga. La dẽ wã, m me na teka kibara ka. 38Kibɛ wã sakd kelgre, ad-y yaa woto n noom-ma. B sã n ka võore, b sã n ka tũud sore, baasgo m maana m sẽn tõe. 39Ka segd tɩ b yũ rãam a yeyn-ye bɩ koom bala; rãama sã n pul koom la a ya noogo n sakd loogre. Tõog n gʋls kibar t'a noog sẽn karemda wã sũur me yaa boto. Dẽ yĩngã, tɛk la tɛka.
Currently Selected:
2MAKABE 15: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.