1KORẼNT RÃMBA 3

1Sã n ya ne maam, m ka tõog n gom ne yã wa neb sẽn tar yam sẽn zʋʋg tẽng zug rẽnna ye, m goma ne yãmb wa neb sẽn tar tẽng zug yama bala, m goma ne-y, wa Krista kom peelse. 2#Eb 5,12-13. Yaa bĩisim la m kõ-y pĩnd tɩ y yũ, ka rɩ taok ye tɩ y ra nan ka tõe n deeg sẽn tagem ye. La ne marsã menga y ket n ka tõe n deeg-a ye, 3tɩ y yama ket n yaa tẽng zug rẽnna. Sũ-kiir la zab sẽn kẽ y sʋka, ka y zʋga sẽn ket n yaa ninsaal zʋga laa? Y manesma fãa ka ket n ya ninsaal dẽnd laa? 4#1Ko 1,12. Y nin-yend sã n gomda: «Mam bela a Pol poorẽ,» tɩ ned a to yetẽ: «Mam yẽ bee a Apolos poorẽ,» ka ninsaalb manesem la y tũuda?

Koe-nooga moandba tʋʋmde

5A Apolos yaa bõe, a Pol me yaa bõe? Ka neb sẽn sõng yãmb tɩ y paam tẽeba laa? La ned kam fãa pa tʋm wa Wẽnd sẽn kõ-a pãnga laa? 6#Tv 18,4-11, 24-28. Tɩɩga la mam sel yã, t'a Apolos zãgs-a koom la ka yɩ Wẽnd n kõ-a bɩʋʋng laa? 7Woto sẽn send-a wã ka fɩ, sẽn zãgsd-a wã ka fɩ, sẽn ya-a bũmbu, yaa sẽn kõta bɩʋʋngã: Wẽnnaam. 8Sẽn send-a la sẽn zãgsd-a koom yõod zema taaba; ned kam fãa reegda a rolbo, wala a tʋʋmda sẽn yɩ a soaba. 9Tõnd la sẽn sõngd-b Wẽnd n tʋmnẽ, yãmb la Wẽnd pʋʋgo, yãmb la b roogo b sẽn me.

10M tũu Wẽnd sẽn kõ-m kũun ningã n sɩng roogã wa tãm-met-mita. Ned a to n na n wa me n paase, la yaa pakr tɩ ned kam fãa maan gũusg ne a sẽn met to-to. 11Sã n ya rooga sɩngre, d ka tõe n sɩnga ne Kugr a to tɩ ka sẽn zoe n dɩgl a soaba, a Zezi Krista. 12Kug kãng zug marsã ned sã n wa rogl sãnem, bɩ wanzurfu, bɩ kug nɛɛba, bɩ raado, bɩ kãnkẽ bɩ moodo, 13a soab tʋʋmda na puki; Raara-raare a na vẽnege: Bugum n na n vẽneg yɛlã, bugum n na n wilg ned kam fãa tʋʋmd sõmblem. 14Sẽn dogl bũmb ninga sã n ka rɩ bugum, tʋʋm-tʋmda reegda rolbo; 15Bugum sã n dɩ, rolb me sɛ yã. Tʋʋmda soab na põse la na yɩ wala a tũu bugmẽ n looge.

16 # 1Ko 6,19; 2Ko 6,16. Y ka mi tɩ y yaa Wẽnnaam doogo, t'a Vʋʋsem Sõng be y pʋsẽ laa? 17Sẽn wãad-a Wẽnd doogo, Wẽnd me na n wãa a soaba; Wẽnnaam dooga yaa bõn-sõngo la yaool n yaa yãmb la ro-kãnga.

D na n maana a wãna?

18Bɩ ned da belg a meng ye! Ned sã n be yãmb sʋka n tẽed t'a yaa sɩlem soaba wa zamaana sẽn dat sɩlem ninga, bɩ a lebg gãeenga t'a na paam sɩlem.

19 # Zob 5,13. Wẽnd nifẽ, zamaana sɩlem yaa gãeemdo; dẽ me yĩng la b gʋls woto Sebra pʋga: «Yaa bãmb n leebd sɩlem dãmba n lubd b sɩlmẽ.» 20#Yɩ 94,11. Ad sẽn le gʋls zĩig a to: «Wẽnd mii sɩlem dãmba tagsgo la b neeme tɩ yaa yaoolgo.» 21Dẽn yĩngã, ned da bao a pẽgr ninsaalb nengẽ ye, tɩ bũmba fãa yãmb n so, 22a Pol woo, a Apolos, a Kefas, zamaana, vɩɩm bɩ kũum, dũnna bɩ beoogo, fãa yãmb n so; 23la Krista n so yãmba, tɩ Wẽnd me so Krista.

Currently Selected:

1KORẼNT RÃMBA 3: SSDC98

Highlight

Copy

Compare