1KORẼNT RÃMBA 10

D maan gũusgu, d tẽega Israyɛl kibare

1 # Ey 13,21-22; 14,22-29. Ad-y m pa rata, m saam-biisi, tɩ y yĩm tɩ sawadgo n bui d yaab rãmba fãa la b fãa rʋʋga mogr a ye. 2Wẽnd maag a Moyiiz, b reega soob sawadg tẽngr la Mogr pʋga. 3#Ey 16,35. B fãa rɩlga b mens ne yĩngr dɩɩb yɛnga. 4#Ey 17,6; Ss 20,11. B fãa yũu yĩngr bõn-yũudl a ye; yaa yĩngr pĩig koom la b ra yũuda la pĩiga ra yãagda bãmba la pĩ kãng ra yaa Krista. 5#Ss 14,29-30. La ne rẽ fãa sẽn ta-b Wẽnnaam yam sõor yɩɩ bilfu; la rẽ me la b kõaba sẽeg we-raoogẽ wã.

6 # Ss 11,4. Yɛla reng n maana woto n na n nek d yam, tɩ da bas tɩ yamleed wẽnsã wa pid d sũur wa bãmb dẽnd ye. 7#Ey 32,6. Da waoog-y bõn-naands wa bãmb kẽer sẽn maane tɩ b kibara gʋls woto: «Zãma wã zĩndame n dɩ la a yũ, la a yikame n na n deem a reem.» 8#Ss 25,1-18. Da sak-y yoob wala bãmb kẽer sẽn sake, tɩ bãmb tus pisi la a tã na n ki daar a ye wã ye. 9#Ss 21,5-6. Da kʋɩɩb-y Soaala wa bãmb kẽer sẽn kʋɩɩb-ba tɩ wiis kɛ-b n kʋ wã ye. 10#Ss 17,6-14. Da guglem-y wala bãmb neb kẽer sẽn maane tɩ Tẽn-kũuma na n loog ne b fãa gilla ye.

11Dẽ fãa maaname n na n nek d yam la rẽ fãa gʋlsa tõnd zãmsg yĩnga, tõnd sẽn pẽneg dũni wã sɛɛbã. 12Dẽn yĩnga, sẽn yɛsa yĩngr n pẽgd a menga gũus n da wa lʋɩ ye. 13Y nan pa seg kʋɩɩbgo sẽn zʋʋg ninsaal pãng ye. Wẽnd yɛsa b sɩd zĩigẽ la b kõn sak tɩ y paam kʋɩɩbg sẽn yɩɩd y pãng ye; kʋɩɩbg sã n wa, b na kõ-y dabaare tɩ y rig-a n zãage, b na kõ-y pãng tɩ y maan daoodo.

Rɩɩb sõnga yelle

14M kom-sõma, zãag-y y meng ne wẽn-naandsa waoogre. 15M gomda ne yã wa neb sẽn tar yam. Wʋm-y m sẽn dat n togsã. 16#Mt 26,26-28; Mk 14,22-24; Lk 22,19-20. Laok ning d sẽn deeg la d pʋʋsd barkã ka Krista zɩɩm la d pʋɩt taab la? Burã d sẽn kaoodã, ka Krista yĩng la d lagem n dɩtẽ laa? 17Wala bura sẽn yaa a ye wã, tõnd me ne d ya kʋʋma d yaa yĩng a ye tɩ d fãa rɩta bur yɛng kãnga. 18#Man 7,6. Tẽeg-y d yaab a Israyɛl rooga kibare. Neb niyns sẽn da rɩt-b maandã, ka maan-kugra yõod la b da rɩt bɩ? 19La rẽ rat n yeelame tɩ bõe? Tɩ maanda nemd bee yõodo? Tɩ maanda sẽn waoogd a soaba n tar yõodo? 20#Yao 32,17. Ka Sʋtãan yĩng la maanda kʋʋd laa, b ka kʋʋd bũmb sẽn ka Wẽnd yĩng laa? M yaool n pa rat tɩ y lagem ne sʋtãamb ye. 21Yãmb pa tõe n yũ Soaala bõn-yũudem la y naag n yũ Sʋtãan dẽn ye, y ka tõe n dɩ Soaala rɩɩb la y le naag n dɩ Sʋtãan dẽn ye. 22#Yao 32,21. D dat n yika Soaala sũur bɩ d dat n maan-b la pãnga?

Ad leokr maanda poorẽ

23 # 1Ko 6,12. Neb n gomd woto: «M tõee fãa.» La d ka tẽed tɩ fãa yaa yõod ye. «M tõee fãa» la m pa tẽed tɩ fãa n wat ne manegr ye. 24Bɩ ned ba a ye da bao sẽn manegd a meng ye; a bao sẽn manegd a taaba. 25Wãb-y nemd ning fãa sẽn da koos-roogẽ, n da yɛs n sokd y sũurẽ sẽn ya bũmb ning nemd ye, 26#Yɩ 24,1. tɩ tẽnga ne a pʋgẽ teed fãa yaa Soaalã n so. 27Bu-zẽnd sã n bool yãmb a zakẽ tɩ y sak n kẽnge, bɩ y rɩ a sẽn kõ-y bũmb ning fãa la y ra yɛs n sokd y menga: y tõeeme bɩ y pa tõe n dɩ ye. 28Ned sã n yeel yã: «Ad-y nemda yaa maoong nemdo» bɩ y vẽ ne a wãbre, sẽn togsa yãmba yĩnga la a sũura koɛɛg sẽn leokd tɩ pa tõe n wãba yĩnga. 29M sẽn gomd sũur koɛɛgã, m ka gomd yãmb dẽn ye, yaa to wã rẽnda; la sɩda, ned a to sũur koɛɛg yɩta a wãn n leok m yĩnga, m pa so m meng laa? 30M sã n dɩt bũmb la m pẽgd Wẽnde, b na yɩɩ wãn n zab ma m sã n pẽgd m Soaala m sẽn paam dɩɩb yĩnga?

31Woto wã, y rɩta, y yũuda, bɩ yaa bũmb a to la y maanda, bɩ fãa yɩ Wẽnnaam pẽgr yĩnga. 32Gũus-y tɩ y manesem da wa ne ned lʋɩɩse, Zʋɩf rãmb sʋka, bɩ bu-zẽmba, bɩ Tigung kamb sʋk ye. 33Sã n ya maam, m baood n na n zemsa ne y fãa gill, bũmba fãa pʋgẽ; m ka baood sẽn nafd m menga ye, yaa kʋʋnga nafr la m baooda n dat tɩ b fãa paam fãagre.

Currently Selected:

1KORẼNT RÃMBA 10: SSDC98

Highlight

Copy

Compare