Kañaam 44
44
Naşibaţi adek biki nul kafeţ
1Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki babuk Kore.
2Iwi Naşibaţi, ŋŧiinki, ŋŧiink na ibaţ yi nun
başinun baţupun iko iñoŋarënaan yi idoluŋ ţi wal wi baka,
yi idoluŋ du unjon.
3Idook ŋŧaak na kañen ki nu aţooranaan baka ;
ikob ŋŧaak başinun bahilna baţoo.
4Mënţ ikej yi baka yi yi bayeenknuŋ uŧaak,
mënţ iñen yi baka ibuuranuŋ baka ;
kañen kadeenu ki nu ka,
kañen ki nu,
bjeehi bi kaara di nu ba,
iwi ibi ŋal baka.
5Iwi Naşibaţi, iwooŋ naşih i naan :
ibi ţup kë Yakob aşë wat !
6Ikaaŋ kë ŋji ŋwat başooradun ;
katim ki nu kakaaŋ kë ŋpoş poşan bankgutuŋ na un.
7Mënţ kaşuuri ki naan ki ki nji nhaţuŋ,
mënţ kakej ki naan kakbuuranaanuŋ.
8Iwi ikbuuranuŋ un ţi başooradun ;
iwi ikdoluŋ banşooruŋ un bakowa.
9Iwi Naşibaţi, na ŋnuur ŋji ŋyeeh mndëm mi nu ;
ŋji ŋdëman katimu unuur unjinţi.
Pnaţ ntiinku
10Kë işë dekun kafeţ,
ido nja kë ŋyewlaa,
iinkak agakandër na nja woli ŋya ugut.
11Ido nja kë ŋţi ţi kadun ki bangutuŋ na un
kë başoorad nja bakkiij iko yi baŋaluŋ.
12Iji kwul nja ji ŋkaneel ŋi bakyaaŋ pdoh,
iniinkan nja ŋŧaak.
13Iwaapar pntaali pi nu preeş pmpoţi,
iţen ţen pa !
14Iwut kë bakinţun bakkarun,
kë bañaaŋ banfëţuŋ na un bakbeŋ aŋuubanun.
15Ido kë bañaaŋ biki ŋŧaak bakyeeh abeŋun ;
ido kë bañaaŋ baji babëţ bëţan ikow.
16Unuur unjinţi dji kawin pŧoka pi naan,
mnkow manji manŧum ţi kaara di naan,
17wi njaaŋ kaŧiinkaara ŧiink ikar na imbeŋ yi naşoorad naan ajaaŋ abi kala la pŋom.
18Iko mënţ bŧi iwoo kë ŋënţilmi'u,
ŋëmpën ţi bhoŋar bi idoluŋ na un,
19ŋëmpënan ŋhaaş,
ŋëmpën ţi bgah bi nu ;
20idoo fëlun du dko di ŋbuş kajaagal ŋawooŋ,
iţu nja mnkow mi pkeţ.
21Woli ŋţilma lah katim ki Naşibaţi i nun,
woli ŋdëman lah unŧoŋ,
22Naşibaţi aankme i ?
Ul ammeeŋ uko ummeniiŋ du ŋhaaş ŋi nun meeţ.
23Kë iwi Yawe Nawat Kabuka ikaaŋ kë baji bafiŋun na ŋnuur,
baji badolun ji ŋkaneel ŋi bakñooţuŋ pfiŋ.
24Iwi Yawe Nawat Kabuka naţiin, we ukaaŋ kë ikŋoyënţ ba ?
Tenan, kwutanun te mnţo.
25We ukaaŋ kë imen kaara di nu ba ?
We ukaaŋ kë iţilma mnhaj na phajala pweek pi nja ba ?
26Ŋjot ţi mboş akëlënk na pdëpalën,
ŋwo ţi ppula ţi mboş.
27Naţiin, biin iţënk nja !
Iwi i uŋal uwooŋ uunkba, buuraanun.
Currently Selected:
Kañaam 44: knf
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
