Kañaam 42
42
Kayeeh ki mnţëg
1Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki babuk Kore
2Iwi Naşibaţi, uhaaş wi naan uji ula'u,
jibi ubaŧa wi udaan uţijuŋ maakan ujaaŋ ula meel.
3Iwi Naşibaţi, uhaaş wi naan ula'u maakan, iwi injaaŋ kwul ubida.
Lum di di nji kaluŋ kawo na a ?
4Cay didu ! Mnkuul mi naan manwooŋ pde pi naan pnak na uŧejan,
başë kaheparaan na ŋnuur kaji : « Naşibaţi i nu awo ţuŋ ba ? »
5Uhaaş wi naan uji ujooţan
woli dleş wal wi njaaŋ kapoş na bañaaŋ baŧum
kawo ţi kadun ki pnŧuk panwooŋ ţi ufeŧtu te du katoh ki Naşibaţi,
başë kahuuran na mnlilan kabot kabeeba.
6Hakadi ! Iwi uhaaş naan, we wi ibaaŋ ajooţan ba ?
Wel wi ibaaŋ aţëga ba ?
Haţan ţi Naşibaţi !
Dluŋ kabeebu kak,
iwi injaaŋ kbuuranaan akuţ awo Naşibaţi i naan.
7Iwi Naşibaţi, uhaaş naan ujooţi,
ukaaŋ kë nji kaleşnu du uŧaak wi Yordaniya
du inkuŋ yi Hermoŋ na du pnkuŋ pi Mişeyar.
8Meel manwoonuŋ du inkuŋ mando pŋaat pweek ;
uwo wo ji meel manfooyën kë ŋmaaroŋ bŧi ŋakkobën.
9Dme kë na pnak Yawe Nawat Kabuka aji diimanaan uŋal wi nul unwooŋ uunkba,
na uŧejan aşë kaleşanaan kayeeh ki nul,
kaşë kayeeh ka kañehana,
ul anjaaŋ awulën ubida.
10Dŋal kahepar Naşibaţi i naan, anwooŋ mnhaţ mi naan kaji na a :
« We ukaaŋ kë iţilmi'aan ba ?
We ukaaŋ kë nji kapoş ajooţan kë başoorad naan bakhajanaan ? »
11Uleef uŋër na nji bŧi,
başoorad naan bakarën,
baji bajakën na ŋnuur :
« Naşibaţi i nu awo ţuŋ ba ? »
12Hakadi ! Iwi uhaaş naan, we wi ibaaŋ ajooţan ba ?
Wel wi ibaaŋ aţëga ba ?
Haţan ţi Naşibaţi !
Dluŋ kabeebu kak,
iwi injaaŋ kbuuranaan akuţ awo Naşibaţi i naan.
Currently Selected:
Kañaam 42: knf
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
