Maci 3
3
Yowan Nabatŧaar aji na bañaaŋ bawut pjuban baţëlëş ŋbida
(Markuŧ 1.1-8 ; Luk 3.1-18 ; natenan ţi Yowan 1.19-28)
1Wi ŋşubal ŋŧum ŋaţëpuŋ, kë Yowan Nabatŧaar aşë pën awinana, aţup du pndiiş pi Yuda 2aji na bañaaŋ : « Nawutan pjuban, naţëlëş ŋbida, ţiki Pşih pi Baţi pañogi. » 3Uko wi nul wi wi Iŧayi Naţupar Naşibaţi aţiiniyaanuŋ aji :
« Pdiim ploŋ pahuuran du pndiiş aji :
“Nabomaan bgah bi Ajugun akluŋ kaţëpna,
nadolana ilël iŧool.” » #
Iŧayi 40.3
4Yowan awohara kamişa ki babomanuŋ na pfaal pi unŧaam wi pnkunkaali aşë tan katël ţi blank ; aji de ŋguul na mnob. 5Wal mënţ kë bañaaŋ biki ubeeka wi Yeruŧalem na uŧaak wi Yuda bŧi, na uŧaak wi bdëk bi Yordan bŧi başë ya du a. 6Baji babi kaţup ipekadu yi baka kaşë do babatŧaar baka ţi bdëk bi Yordan.
7Wi Yowan awinuŋ kë bafariŧay na baŧaduk baŧum kë bakbi pyeenk batiŧmu ţi a, kë aşë ji na baka : « An, nawo pntuni pi ŋnfunan ! In ahoopaţanaŋ aji naţi udeeb wi Naşibaţi unkmbiiŋ ba ? 8Nadoon kado keeri iko inkyuujuŋ kë nawut pjuban abot aţëlëş ŋbida. 9Nawutan kaşal kaji : “Ŋwo biki pşini pi Abraham !” Dţupan, Naşibaţi ahilan kakakan mnlaak mi babuk Abraham. 10Ptibi padobi bëkan bëkan ţi mnko uţeeh, bko banwooŋ baankbuk mnko mnuura bafal kafël du bdoo.
11« Nji, dji kabatŧaaran na meel kadiimanaan kë nawut pjuban aţëlëş ŋbida ; kë anşaaŋ abi ţi kafeţ naan aşë dëm apelën maakan, mëndoo ñoom ñoom kamëbana işapaat ; ul aluŋ kabatŧaaran na Uhaaş wi Naşibaţi na bdoo. 12Awo na kajeţ ţi iñen, aweey kapaţëş ptiij na plëfar. Aya katoor ptiij ţi pnkuŧi kaşë kafël plëfar du bdoo banwooŋ baankjëmşa. »
Batiŧmu bi Yeŧu
(Markuŧ 1.9-11 ; Luk 3.21-22)
13Wal mënţ kë Yeŧu aşë pënna uŧaak wi Galilay, abi bdëk bi Yordan, Yowan ahilna abatŧaara. 14Kë Yowan aşë pok, aji na a : « Nji dwooŋ kayeenkna batiŧmu ţi iwi, kë işë bi ţi nji ! » 15Kë Yeŧu aşë ŧeema aji : « Duni idinan uko mënţ. Aa, hënk di di ŋwooŋ i kado uko bŧi wi Naşibaţi aŋaluŋ. » Kë Yowan adinanii. 16Wi Yeŧu ayeenkaŋ yeenk batiŧmu apën ţi meel, kë baţi başë haabëşa ţi dko mënţ. Awin Uhaaş wi Naşibaţi kë uwala ţi a ji ubalab ufaaŧal. 17Kë pdiim ploŋ paşë pënna baţi aji : « Iwi iwooŋ abuk naan, dŋalu maakan, dmaganu. »
Currently Selected:
Maci 3: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal