Ndari 21
21
Aisiraeli kũhoota Akanaani
1 #
Nda 33.40
Na rĩĩrĩ, Mũkanaani warĩ Mũthamaki wa Aradi, watũũraga werũinĩ wĩ mwena wa na kĩanda, aigua atĩ Aisiraeli maagereire njĩra ya Atharimu, akĩmookĩrĩra agĩtaha amwe aao. 2Nao Aisiraeli makĩĩhĩta makĩĩra MWATHANI atĩrĩ, “Watũhotithia kũhoota andũ a matũũra maya, tũkũmaananga biũ#21.2 Tũkũmaananga biũ ... nĩtwakwamũrĩra: Kĩndũ gĩothe kĩamũrĩĩtwo na njĩra ĩyo gĩatuĩkaga kĩa MWATHANI o biũ, na gĩtingĩahũthĩrirwo; nĩkwanangwo kĩanangagwo. o hamwe na andũ oothe a mo, tuonanie nĩtwakwamũrĩra.” 3MWATHANI agĩkĩmaigua, akĩmahotithia kũhoota andũ a Kanaani. Aisiraeli magĩkĩmananga biũ o hamwe na matũũra maao. Nĩkĩo handũ hau haatuirwo Horoma#21.3 Horoma: Na Kĩhibirania nĩkuuga “Kwanangwo.”.
Nyoka ya gĩcango
4 #
Gũco 2.1
Andũ a Isiraeli magĩgĩkiuma kĩrĩmainĩ kĩa Hori magĩthiĩ na njĩra ĩrĩa yerekeire Iria Ituune, nĩguo mathiũrũrũke bũrũri wa Edomu. No rĩĩrĩ andũ nĩmaaremirwo nĩgũkirĩrĩria, 5#1Akor 10.9 magĩkĩambĩrĩria gũtetia Ngai hamwe na Musa makiuga atĩrĩ, “Nĩ kĩĩ gĩatũmire mũtũrute bũrũri wa Misiri, mũtũreehe tũkuĩre gũũkũ werũinĩ kũndũ gũtarĩ irio kana maaĩ? Tũtingĩhota kũũmĩrĩria kũrĩa rĩngĩ irio ici itarĩ kĩene.” 6Na rĩĩrĩ, MWATHANI agĩkĩreehithĩria andũ acio nyoka i na thumu na andũ aingĩ a Isiraeli makĩrũmwo nĩcio magĩkua. 7Andũ magĩgĩũka kũrĩ Musa makĩmwĩra atĩrĩ, “Nĩtũreehirie rĩrĩa tũratetirie MWATHANI o hamwe nawe. Gĩthaithe MWATHANI eeherie nyoka ici. Kwoguo Musa akĩmathaithanĩrĩra.” 8Naake MWATHANI akĩĩra Musa athondeke nyoka ĩkũhenia amĩĩkĩre gĩtugĩ igũrũ, nĩ geetha mũndũ o wothe warũmwo nĩ nyoka, amĩcũũthĩrĩria akahona. 9#2Atha 18.4; Joh 3.14 Musa agĩgĩthondeka nyoka ya gĩcango, akĩmĩĩkĩra gĩtugĩ igũrũ, naake mũndũ o wothe warũmwo nĩ nyoka, acũũthĩrĩria nyoka ĩyo ya gĩcango akahona.
Aisiraeli kuuma kĩrĩmainĩ kĩa Hori na gũthiĩ gĩtuambainĩ kĩa Amoabi
10Na rĩĩrĩ, andũ a Isiraeli nĩmaathiire na mbere, makinya Obothu magĩaka kambĩ. 11Moima kũu Obothu magĩthiĩ na mbere, makinya maganjo ma Abarimu, marĩa marĩ werũinĩ ũrĩa wĩ mwena wa irathĩro wa bũrũri wa Amoabi, magĩaka kambĩ kuo. 12Moima kũu magĩthiĩ nginya gĩtuambainĩ gĩa Zeredi magĩaka kambĩ kuo. 13Kuuma kũu magĩthiĩ magĩaka kambĩ mwena wa na rũgongo wa rũũĩ rwa Arinoni, rũrĩa rũrĩ werũinĩ ũrĩa ũthiĩte nginya mũhakainĩ wa Aamori. (Rũũĩ rwa Arinoni nĩruo rwarĩ mũhaka wa Amoabi na Aamori.) 14Nĩkĩo kwandĩkĩĩtwo Ibukuinĩ rĩa Mbaara cia MWATHANI atĩrĩ, “... itũũra rĩa Wahebu thĩinĩ wa Sufa, na ituamba; rũũĩ rwa Arinoni, 15na kĩharũrũka kĩa ituamba iria ithiĩte kuuma itũũra rĩa Ari, nginya mũhakainĩ wa Amoabi.”
16Moima kũu magĩthiĩ nginya kũndũ gwetagwo Ithima, kũrĩa MWATHANI eerire Musa atĩrĩ, “Cookanĩrĩria andũ hamwe ndĩmahe maaĩ.” 17Hĩndĩ ĩyo Aisiraeli makĩina rwĩmbo rũũrũ:
“Wee gĩthima gĩĩkĩ therũka;
na nĩtũkũmakũngũĩra na rwĩmbo.
18Gĩthima kĩrĩa kĩenjirwo nĩ anene
o hamwe na atongoria a andũ,
magĩgĩthikũria na mĩthĩĩgi yao
na thanju ciao.”
Magĩgĩthiĩ na mbere makiuma kũu werũinĩ magĩkinya Matana; 19moima kũu magĩthiĩ nginya Nahalieli moima Nahalieli magĩthiĩ Bamothi, 20na moima Bamothi magĩthiĩ gĩtuamba kĩrĩa kĩrĩ bũrũri wa Amoabi mũhuro wa kĩrĩma kĩa Pisiga, kĩrĩa kĩroreete werũinĩ.
Aisiraeli kũhoota mũthamaki Sihoni na mũthamaki Ogu
(Gũco 2.26–3.11)
21Na rĩĩrĩ, andũ a Isiraeli magĩgĩtũma anjaama kũrĩ mũthamaki Sihoni wa Aamori makamwĩre atĩrĩ; 22“Twĩtĩkĩrie tũtuĩkanĩrie bũrũriinĩ waku; tũtikũgerera mĩgũndainĩ kana kũrĩa kwĩ mĩthabibũ, o na tũtikũnyua maaĩ ithimainĩ cianyu tũkũgerera o barabarainĩ ĩrĩa nene#21.22 Barabara ĩrĩa nene: Rora 20.17. o nginya tũkoima bũrũriinĩ waku.” 23No mũthamaki Sihoni akĩgiria andũ a Isiraeli kũhĩtũkĩra bũrũriinĩ wake. Agĩgĩcookanĩrĩria thigari ciake ciothe agĩcitwara Jahazu werũinĩ, agĩũkĩrĩra Aisiraeli. 24No rĩĩrĩ, Aisiraeli makĩũragĩra Aamori aingĩ mbaarainĩ ĩyo, na makĩmatuunya bũrũri wao kuuma rũũĩ rwa Arinoni mwena wa na rũgongo nginya rũũĩ rwa Jaboku, ũguo nĩkuuga nginya kwa Aamoni, amu mũhaka wa Aamoni warĩ mũrangĩre na hinya mũno.#21.24 Mũhaka wa Aamoni warĩ mũrangĩre na hinya mũno: Maandĩko mamwe ma tene moigaga; o nginya Jazeri mũhakainĩ wa Aamoni. 25Kwoguo andũ a Isiraeli magĩkĩĩnyiitĩra matũũra moothe ma Aamori, o nginya itũũra rĩa Heshiboni na matũũra marĩa marĩthiũrũkiĩirie, magĩtũũra kuo. 26Heshiboni nĩrĩo rĩarĩ itũũra rĩrĩa inene rĩa mũthamaki Sihoni wa Aamori, ũrĩa warũĩte na mũthamaki wa mbere wa Moabi akĩmũtuunya bũrũri wake wothe o nginya rũũĩinĩ rwa Arinoni. 27Kwoguo nĩkĩo aini mainaga atĩrĩ,
“Ũkaai Heshiboni, itũũra inene rĩa mũthamaki Sihoni!
Itũũra rĩu rĩa Sihoni nĩrĩakwo rĩngĩ na rĩĩkĩrwo hinya.
28 #
Jer 48.45-46
Amu thigari cia Sihoni nĩcioimire itũũra rĩa Heshiboni ihaana ta mwaki,
ikĩananga Ari itũũra rĩa Moabi
na ikĩharagania#21.28 Ikĩharagania: Maandĩko ma Kĩhibirania moigaga “anene a ... .” irĩma cia Arinoni ya na rũgongo.
29Kaĩ inyuĩ Amoabi mwĩ thĩĩna-ĩ!
Inyuĩ arĩa mũthaathayagia Kemoshu nĩmũniinĩĩtwo!
Ngai ĩyo yanyu nĩtũmĩĩte arũme moorĩre kwene,
Nao atumia matahwo nĩ Sihoni, mũthamaki wa Aamori.
30Njiarwa ciao nĩiniinĩĩtwo,
kuuma itũũra rĩa Heshiboni nginya Diboni,
kuuma itũũra rĩa Nashimu nginya Nofa gũkuhĩ na Medeba.”
31Kwoguo Aisiraeli magĩtũũra bũrũri wa Aamori. 32Naake Musa agĩtũma andũ magathigaane itũũra rĩa Jazeri. Aisiraeli magĩthiĩ makĩrĩnyiita o hamwe na matũũra marĩa marĩthiũrũkĩirie, na makĩingata Aamori arĩa maatũũraga kuo.
33Na rĩĩrĩ, Aisiraeli makĩhũndũka magĩthiĩ na barabara ya gũthiĩ Bashani, naake mũthamaki Ogu wa Bashani akiumagara na mbũtũ ciake akamatharĩkĩre me Edirei. 34No MWATHANI akĩĩra Musa atĩrĩ, “Ndũkaae kũmwĩtigĩra, nĩngũkũhotithia kũmũhoota, o hamwe na andũ aake oothe, na bũrũri wake. Ũkũmwĩka o ta ũrĩa wekire Sihoni mũthamaki wa Aamori, ũrĩa wathanaga Heshiboni.” 35Kwoguo Aisiraeli makĩũraga Ogu, aariũ aake, na andũ aake oothe; gũtirĩ mũndũ maatigaririe, magĩcooka magĩtũũra bũrũri ũcio wake.
Currently Selected:
Ndari 21: GKNDC
Highlight
Copy
Compare
Share
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
