Mathayo 5
5
Ũrutani wa Jesũ arĩ kĩrĩmainĩ
1Na rĩrĩa Jesũ oonire andũ aingĩ, akĩambata kĩrĩma igũrũ, na arĩĩkia gũikara thĩ arutwo aake magĩũka harĩ we. 2Naake akĩambĩrĩria kũmaruta akĩmeera atĩrĩ:
Kũraathimwo kũrĩa kwa ma
(Luk 6.20-23)
3“Kũraathimwo-rĩ, nĩ arĩa meriragĩria maũndũ ma kĩĩroho;
nĩ ũndũ Ũthamaki wa igũrũ nĩ wao!
4 #
Isa 61.2
“Kũraathimwo-rĩ, nĩ arĩa maracakaya;
nĩ ũndũ nĩmakoomĩrĩrio!
5 #
Thab 37.11
“Kũraathimwo-rĩ, nĩ arĩa ahooreri;
nĩ ũndũ nĩmakaaheeo kĩrĩa meerĩirwo thĩ!
6 #
Isa 55.1-2
“Kũraathimwo-rĩ, nĩ arĩa mahũũtagĩra na makanyootera maũndũ ma ũthingu;
nĩ ũndũ nĩmakaahũũnio!
7“Kũraathimwo-rĩ, nĩ arĩa maiguanagĩra tha;
nĩ ũndũ nĩmakaiguĩrwo tha!
8 #
Thab 24.3-4
“Kũraathimwo-rĩ, nĩ arĩa atheru ngoro;
nĩ ũndũ nĩmakoona Ngai!
9“Kũraathimwo-rĩ, nĩ arĩa macaragia thaayũ;
nĩ ũndũ nĩmageetagwo ciana cia Ngai!
10 #
1Pet 3.14
“Kũraathimwo-rĩ, nĩ arĩa manyariiragwo nĩ ũndũ wa maũndũ ma ũthingu;
nĩ ũndũ Ũthamaki wa igũrũ nĩ wao!
11 #
1Pet 4.14
“Kũraathimwo-rĩ, nĩ inyuĩ hĩndĩ ĩrĩa andũ mekũmũruma, makamũnyariira, na makamũigĩrĩra igeenyo cia mĩthemba yothe nĩ ũndũ wa rĩĩtwa rĩakwa. 12#2Maũ 36.16; Atũ 7.52 Kenagaai na mũcanjamũke, tondũ iheeo cianyu nĩ nene mũno igũrũ kwa Ngai. Ũguo noguo anabii arĩa maarĩ mbere yanyu maanyariiragwo.
Cumbĩ na Ũtheri
(Mar 9.50; Luk 14.34-35)
13 #
Mar 9.50; Luk 14.34-35 “Nĩ inyuĩ cumbĩ wa thĩ. Ĩndĩ cumbĩ ũngĩthira mũcamo, ũngĩgĩcooka gũcamithio ta cumbĩ atĩa? Ndũrĩ bata, nĩgũteeo ũteagwo ũkarangwo nĩ andũ.
14 #
Joh 8.12; 9.5 “Nĩ inyuĩ ũtheri wa thĩ. Itũũra rĩrĩa rĩakĩĩtwo kĩrĩma igũrũ rĩtingĩhithĩka. 15#Mar 4.21; Luk 8.16; 11.33 Gũtirĩ mũndũ ũgwatagia taawa akaũkunĩkĩra na irebe; taawa wagwatio ũigagĩrĩrwo handũ igũrũ ũmũrĩkĩre andũ oothe arĩa marĩ nyũmba. 16#1Pet 2.12 Ũguo noguo na inyuĩ ũtheri wanyu wagĩrĩirwo nĩgũtheragĩra andũ, nĩ geetha moonage ciĩko cianyu njega, na magoocage Ithe wanyu ũrĩa ũrĩ igũrũ.
Jesũ kũrutana ũhoro wa Watho
17“Mũtigeciirie atĩ njũkĩĩte kũniina Watho wa Musa kana ũrutani wa anabii. Ndiũkĩĩte gũciniina, no njũkĩĩte gũcihingia. 18#Luk 16.17 Ngũmwĩra atĩrĩ na ma, kinyagia rĩrĩa thĩ na igũrũ igaathira, gũtirĩ kaũndũ o na kamwe ka Watho gakeeherio, kinya maũndũ moothe mahinge! 19Mũndũ ũrĩa ũtaathĩkagĩra maathani, o na akorwo nĩ kaũndũ karĩa kaniini, na akaruta andũ arĩa angĩ gwĩkaga taake, agaakorwo arĩ wa thuutha biũ Ũthamakiinĩ wa igũrũ. No ũrĩa wathĩkagĩra Watho, na akaruta arĩa angĩ gwĩkaga taake, agaakorwo arĩ mũnene Ũthamakiinĩ wa igũrũ. 20Ngũmwĩra atĩrĩ, kĩrĩa gĩgaatũma mũingĩre Ũthamakiinĩ wa igũrũ no mũkorirwo mũrĩ athingu gũkĩra arutani a Watho na Afarisai.
Kũrutana ũhoro wa maraakara
21 #
Tha 20.13; Gũco 5.17 “Nĩmũiguĩte atĩ andũ a tene meerĩĩtwo atĩ, ‘Ndũkaanoragane, na ũrĩa ũkooragana nĩagaatuĩrwo.’ 22No rĩu niĩ ngũmwĩra atĩrĩ: mũndũ o wothe ũkaaraakarĩra mũrũ wa ithe,#5.22 Mũndũ wothe ũkaaraakarĩra mũrũ wa ithe: Maandĩko mamwe nĩmoongagĩrĩra, “hatarĩ gĩtũmi.” nĩagaaciirithio, na mũndũ ũrĩa ũkaaruma mũndũ ũrĩa ũngĩ nĩagaatwarwo mbere ya kĩama. Ningĩ ũrĩa ũgeeta mũrũ wa ithe ‘Kĩrimũ gĩĩkĩ,’ arĩ ũgwatiinĩ wa gũgaikio icuainĩ. 23Tondũ ũcio, ũngĩkorwo ũkĩrutĩra Ngai kĩheeo gĩaku kĩgongoonainĩ, na hĩndĩ ĩyo ũririkane atĩ nĩũraakarĩĩtie mũrũ wa thooguo, 24amba ũtige kĩheeo gĩaku o hau kĩgongoonainĩ ũthiĩ wambe ũkaiguithanie naake, na mwarĩĩkia kũiguithania ũcooke ũthiĩ ũkarutĩre Ngai igongoona.
25“Mũngĩhĩtania na mũndũ na agũtware igootiinĩ, geria kũiguithania naake mũthenya wa ciira ũtaanakinya, nĩ ũndũ mwathiĩ igootiinĩ agaakũneana kũrĩ mũciirithania, ũrĩa ũgaakũnengerana kũrĩ thigari ũikio njeera. 26Ngũkwĩra atĩrĩ na ma, gũtirĩ hĩndĩ ũkoima kũu njeera ũtarĩĩkĩĩtie kũrĩha gathendi ka mũico ka mbeeca iria ũtuĩrĩirwo.
Kũrutana ũhoro wa ũtharia
27 #
Tha 20.14; Gũco 5.18 “Nĩmũiguĩte nĩkwĩrĩĩtwo atĩ: ‘Ndũkaanatharanie.’ 28No rĩu ngũmwĩra atĩrĩ: mũndũ o wothe ũroraga mũndũ wa nja na akamwĩrirĩria nĩarĩĩkĩĩtie gũtharia naake ngoroinĩ yake. 29#Mat 18.9; Mar 9.47 Kwoguo riitho rĩaku rĩa ũrĩo rĩngĩtũma wĩhie, rĩkũũre ũrĩte. Nĩ kaba ũikare ũtarĩ na kĩĩga kĩmwe kĩa mwĩrĩ gũkĩra mwĩrĩ waku wothe ũikio icuainĩ. 30#Mat 18.8; Mar 9.43 Nakuo guoko gwaku kwa ũrĩo kũngĩtũma wĩhie, gũtinie ũgũte. Nĩ kaba ũikare ũtarĩ na kĩĩga kĩmwe kĩa mwĩrĩ gũkĩra mwĩrĩ waku wothe ũikio icuainĩ.
Jesũ kũrutana ũhoro wa gũtigana kwa mũthuuri na mũtumia
(Mat 19.9; Mar 10.11-12; Luk 16.18)
31 #
Gũco 24.1-4; Mat 19.7; Mar 10.4 “Ningĩ nĩmũiguĩte nĩkwĩrĩĩtwo atĩ, ‘Mũndũ o wothe angĩtigana na mũtumia wake, no mũhaka amũhe marũa makuonania atĩ nĩmaatigana.’ 32#Mat 19.9; Mar 10.11-12; Luk 16.18; 1Akor 7.10-11 No rĩu ngũmwĩra atĩrĩ, mũndũ wothe ũtiganaga na mũtumia wake, tiga nĩ ũndũ wa ũtharia, nĩatũmaga mũtumia ũcio atuĩke mũtharia angĩhika rĩngĩ, na mũndũ ũrĩa ũhikagia mũtumia ũtiganĩĩte na mũthuuriwe, o naake nĩgũtharia atharagia naake.
Kũrutana ũhoro wa mĩĩhĩtwa
33 #
Alaw 19.12; Nda 30.2; Gũco 23.21 “Ningĩ nĩmũiguĩte atĩ andũ a tene meerĩĩtwo atĩrĩ, ‘Ndũkaanehĩte tũhũ, na no mũhaka ũhingagie kĩrĩa wĩrĩire Mwathani.’ 34#Jak 5.12; Isa 66.1; Mat 23.22 No niĩ ngũmwĩra atĩrĩ, mũtikaanehĩte o na atĩa; mũtikaanehĩte na igũrũ nĩ ũndũ nĩkuo gĩtĩ kĩa ũthamaki kĩa Ngai; 35#Isa 66.1; Thab 48.2 o na kana mwĩhĩte na thĩ nĩ ũndũ nĩkuo gaturwa ka makinya maake, o na kana na Jerusalemu, nĩ ũndũ nĩrĩo itũũra rĩa Mũthamaki ũrĩa mũnene. 36O na ndũkaanehĩte na mũtwe waku nĩ ũndũ ndũngĩhota gũtũma rũcuĩrĩ o na rũmwe rwaku rũire kana rũerũhe. 37Mũkiuga ũndũ, ugagaai ĩĩ kana aaca, nĩ ũndũ mĩĩhĩtwa ĩyo ĩngĩ yothe yumaga kũrĩ Ũrĩa Mũũru.
Kũrutana ũhoro wa kwĩrĩhĩria
(Luk 6.29-30)
38 #
Tha 21.24; Alaw 24.20; Gũco 19.21 “O na nĩmũiguĩte nĩkwĩrĩĩtwo atĩ, ‘Riitho rĩrĩhagwo na riitho, na igego rĩrĩhagwo na igego.’ 39No niĩ ngũmwĩra atĩrĩ, mũtikaanerĩhĩrie o na mwahĩtĩrio. Mũndũ akũgũtha rũthĩa rwa ũrĩo, reke akũgũthe o na rũu rũngĩ. 40Na mũndũ angĩgũthitanga agũtuunyithie igooti, o na kanjũ yaku reke akuue. 41Na mũndũ angĩgwatha mũthiĩ naake kiromita ĩmwe, thiĩi naake kiromita igĩrĩ. 42Ningĩ mũndũ angĩkũhooya kĩndũ mũhe, na angĩgũkomba kĩndũ mũkombithie.
Endagaai thũ cianyu
(Luk 6.27-28,32-36)
43 #
Alaw 19.18
“Nĩmũiguĩte kwĩrĩĩtwo atĩ, ‘Endagaai araata aanyu, na mũthũũrage thũ cianyu.’ 44No niĩ ngũmwĩra mwendage thũ cianyu na mũhooyagĩre arĩa mamũnyariiraga, 45nĩ geetha mũtuĩke ciana cia Ithe wanyu ũrĩa ũrĩ igũrũ. Ithe wanyu ũrĩa ũrĩ igũrũ atũmaga riũa rĩake rĩarĩre andũ arĩa ooru o na arĩa eega, na akoiria mbura kũrĩ arĩa athingu o na kũrĩ arĩa matarĩ athingu. 46Ngai angĩkĩmũhe kĩheeo kĩrĩkũ angĩkorwo mwendeete o andũ arĩa mamwendeete inyuĩ? Githĩ o na arĩa meetagia mbeeca cia igooti matiĩkaga o ũguo? 47Angĩkorwo no araata aanyu mũgeithagia-rĩ, kũrĩ ũndũ mũgĩĩkaga ũteekagwo nĩ arĩa angĩ? Githĩ o na andũ arĩa mateetĩkĩĩtie ũhoro wa Ngai matiĩkaga o ũguo? 48#Alaw 19.2; Gũco 18.13 Nĩ ũndũ ũcio, no mũhaka mũkoragwo mũrĩ akinyanĩru o ta ũrĩa Ithe wanyu ũrĩa ũrĩ igũrũ arĩ mũkinyanĩru!
Currently Selected:
Mathayo 5: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.