Romarane 10
10
1Brør, mitt hjartans ynske og mi bøn til Gud for dei er at dei må verta frelste. #9,1f 2For det vitnemålet må eg gje dei at dei brenn for Guds sak, men ikkje med skjøn. #Apg 22,3 3Dei kjenner ikkje Guds rettferd, men prøver å byggja si eiga rettferd; difor har dei ikkje bøygt seg inn under rettferda frå Gud. #9,31f 4For Kristus er endelykta åt lova, så kvar den som trur, vert rettferdig for Gud.#Joh 3,18; Apg 13,39; Gal 3,23f
5Moses skriv om den rettferd som lova gjev: Den som held lova, skal leva ved lova. #3 Mos 18,5; Gal 3,12 6Men rettferda av tru seier: Tenk ikkje med deg sjølv: Kven skal fara opp til himmelen? – det vil seia for å henta Kristus ned – #5 Mos 9,4; 30,12–14 7eller: Kven skal stiga ned i avgrunnen? – det vil seia for å henta Kristus opp frå dei døde. 8Men kva seier ho? Ordet er deg nær, i munnen din og i hjarta ditt. Det er ordet om trua, det som vi forkynner. 9For sannar du med munnen din at Jesus er Herre, og trur du i hjarta ditt at Gud reiste han opp frå dei døde, då skal du verta frelst. #Matt 10,32; Fil 2,11 10Med hjarta trur vi så vi vert rettferdige for Gud, og med munnen sannar vi så vi vert frelste. #1 Pet 3,15 11Skrifta seier: Ingen som trur på han, skal verta til skammar. #Jes 28,16; Rom 9,33 12For her er det ingen skilnad på jøde og grekar: Alle har dei same Herren, og han er rik nok for alle som kallar på han. #Apg 10,34f; Rom 3,22ff; Gal 3,28+ 13Kvar den som kallar på Herrens namn, skal verta frelst.#Joel 3,5
14Men korleis kan dei kalla på ein som dei ikkje trur på? Og korleis kan dei tru på ein som dei ikkje har høyrt om? Og korleis kan dei høyra utan at einkvan forkynner? 15Og korleis kan dei forkynna dersom dei ikkje vert utsende? Det står då skrive: Kor herleg det lyder når dei kjem, dei som ber gledebod! #Jes 52,7 16Men ikkje alle var lydige mot evangeliet. Jesaja seier: Herre, kven trudde bodskapen vår? #Jes 53,1; Joh 12,37f 17Så kjem då trua av bodskapen ein høyrer, og bodskapen kjem ved Kristi ord. 18Har dei ikkje høyrt? spør eg. Jau, sanneleg:#Sal 19,5
Røysta deira har nått over heile jorda,
deira ord til heimsens endar.
19Men så spør eg: Kan henda Israel ikkje har skjøna det? Fyrst seier Moses:#5 Mos 32,21
Eg vil eggja dykk til misunning
mot dei som ikkje er eit folk,
på eit uvitug folk vil eg gjera dykk harme.
20Og Jesaja går så langt at han seier:#Jes 65,1
Eg vart funnen av dei som ikkje søkte meg;
eg openberra meg for dei
som ikkje spurde etter meg.
21Men om Israel seier han:#Jes 65,2
Heile dagen rette eg ut mine hender
til eit ulydig og trassig folk.
Currently Selected:
Romarane 10: Bibel1978
Highlight
Copy
Compare
Share
Want to have your highlights saved across all your devices? Sign up or sign in
© Norwegian Bible Society 1978/85
© Bibelselskapet 1978/85
https://www.bibel.no/Nettbibelen/Opphavsrett_2
