Johannes' openberring 2
2
Brev til dei sju kyrkjelydane
(Kap. 2–3)
Til Efesos
1Skriv til engelen for kyrkjelyden i Efesos:
Dette seier han som held dei sju stjernene i si høgre hand, han som går omkring mellom dei sju gull-ljosestakane: #1,16.13.20 2Eg veit om gjerningane dine; du har arbeidt, og du har halde ut. Eg veit òg at du ikkje kan tola dei vonde. Du har prøvt dei som kallar seg apostlar, men ikkje er det, og du har funne at dei er lygnarar. #3,1.8.15; 2 Kor 11,13ff; 1 Joh 4,1 3Du har halde ut, og du har tolt mykje for mitt namn skuld og ikkje gått trøytt.
4Men det har eg imot deg at du har gjeve opp din fyrste kjærleik. 5Kom i hug kvar du stod før du fall! Vend om og gjer på nytt dei fyrste gjerningane dine! Elles kjem eg over deg og tek ljosestaken din bort – om du ikkje vender om. #Hebr 10,32; Op 2,16.22; 3,3.19 6Men den ros skal du ha, at du hatar gjerningane åt nikolaittane, som eg sjølv gjer.#2,6 nikolaittane vranglærarar i kyrkjelydane. Sjå v. 15.
7Den som har øyro, han høyre kva Anden seier til kyrkjelydane! Den som sigrar, han vil eg la eta av livsens tre, som er i Guds paradis.#Mark 4,9+; Op 22,2+
Til Smyrna
8Skriv til engelen for kyrkjelyden i Smyrna:
Dette seier den fyrste og den siste, han som var død og har vorte levande: #Jes 44,6; Op 1,17f; 48,12 9Eg veit om trengsla di og fattigdomen din – men du er rik. Eg veit òg at du vert spotta av dei som kallar seg jødar, men ikkje er det, for dei er Satans synagoge. #Jak 2,5; Op 3,9 10Ver ikkje redd for det du skal lida! Djevelen kjem til å kasta nokre av dykk i fengsel, så de skal setjast på prøve, og de skal lida vondt i ti dagar. Ver tru til døden, så skal eg gje deg livsens krone!#Matt 10,22; 1 Pet 3,14; 1 Kor 9,25+
11Den som har øyro, han høyre kva Anden seier til kyrkjelydane! Den som sigrar, skal ikkje skadast av den andre døden.#20,6.14; 21.8
Til Pergamon
12Skriv til engelen for kyrkjelyden i Pergamon:
Dette seier han som har det kvasse tvieggja sverdet: #Hebr 4,12+ 13Eg veit kvar du bur, der Satan har kongsstolen sin. Likevel held du fast på mitt namn. Og du har ikkje fornekta trua på meg, ikkje eingong i dei dagane då Antipas, mitt trufaste vitne, vart ihelslegen i byen dykkar, der Satan bur.#2,13 der Satan har kongsstolen sin viser truleg til eit heidensk tempel.
14Men noko har eg imot deg: Du har nokre hjå deg som held seg til Bileams lære, han som lærte Balak korleis israelittane skulle lokkast til synd, så dei åt avgudsoffer og dreiv hor. #4 Mos 31,16; 2 Pet 2,15 15Du har òg nokre hjå deg av same slaget, dei som held seg til læra åt nikolaittane. #2,6 16Vend om! Elles kjem eg snart over deg og vil strida mot dei med sverdet som går ut or min munn.#Hebr 4,12+
17Den som har øyro, han høyre kva Anden seier til kyrkjelydane! Den som sigrar, han vil eg gje av den løynde manna. Og eg vil gje han ein kvit stein, med eit nytt namn rita inn, eit namn som ingen kjenner utan den som får steinen.#2 Mos 16,4ff; Jes 62,2; 65,15; Op 3,12; 19,12
Til Tyatira
18Skriv til engelen for kyrkjelyden i Tyatira:
Dette seier Guds Son, han som har augo som logande eld og føter som bronse: #Apg 16,14; Op 1,13ff 19Eg veit om gjerningane dine, kjærleiken din og trua di, tenesta di og tolmodet ditt. Ja, dei siste gjerningane dine er betre enn dei fyrste!#2,2
20Men det har eg imot deg at du lèt kvinna Jesabel halda på, ho som kallar seg profet, men som med læra si lokkar tenarane mine til å driva hor og eta avgudsoffer. #2,20 Jesabel dekknamn for ein falsk kvinneleg profet. Sjå 2 Kong 9,22. #4 Mos 25,1f; 2 Kong 9,22 21Eg har gjeve henne tid til å venda om, men ho vil ikkje venda om frå sitt horeliv. 22Sjå, no kastar eg henne på sjukeseng, og dei som gjer ekteskapsbrot med henne, skal koma i stor naud, om dei ikkje vender om frå gjerningane hennar; 23og borna hennar vil eg la døden riva bort. Då skal alle kyrkjelydane sanna at eg er den som granskar nyrer og hjarto, og som løner kvar og ein av dykk etter det han har gjort. #Sal 62,13; Jer 17,10; Rom 2,6 24Men til dykk andre i Tyatira, alle som ikkje fylgjer denne læra og ikkje har «kjent Satans avgrunnar», som dei kallar det, til dykk seier eg: Eg legg inga ny bør på dykk. 25Hald berre fast på det de har, til dess eg kjem.#3,11
26Den som sigrar og til det siste held fast på dei gjerningar eg vil de skal gjera, han skal eg gje makt over folkeslaga. #Sal 2,8f 27Med jernstav skal han styra dei, og som leirkar skal dei knusast. #12,5; 19,15 28Ei slik makt har eg fått av Far min. Og eg vil gje han morgonstjerna.#2 Pet 1,19; Op 22,16
29Den som har øyro, han høyre kva Anden seier til kyrkjelydane!
Currently Selected:
Johannes' openberring 2: N78NN
Highlight
Share
Copy
Want to have your highlights saved across all your devices? Sign up or sign in
© 1978, 1985 by The Norwegian Bible Society (Det Norske Bibelselskap). All rights reserved worldwide. Used by permission through agreement with UBS (United Bible Societies).
© 1978, 1985 Det Norske Bibelselskap. Alle rettar globalt. Brukt med løyve gjennom avtale med UBS (United Bible Societies).