John 18
18
Iesu andito umbua
(Matthew 26:47-56, Mark 14:43-50, Luke 22:47-53)
1Eto Iesu na pari enu irae enu ambotani umbuto umo Kidron embuto pambuto degi dagogotambu ai ta torea. 2Eto degi amo Iesu na ambotani ga iji nei nei ainge arora uoi Judas, Iesu jenge indari embo, amina ere koguaetija 3Avoeto pambuto priests pepeni te Pharisee embomeni te amita isoro ari embopo te eto embo okokose nenei te avo kiti umbuto horivo ijimbeto ki emi jigito degi ai ta pahuo 4Iesu ta degi do ere puvutuhuna amo matu kito Iesu na pambuto isoro embo ta titi ta heteto ke einge ena, “Ungo embo amunurami jombure ere ove?” ainge enu, 5ke mine einge ea, “Dago Iesu, Nazareth embo avo jombure ere ora,” ainge eo, “Namora,” ainge ena. (Eto embo Judas amo Iesu harikasi embo ta orohuta heteto mitina.) 6Eto Iesu na, “Namora,” ainge ijinu, Isoro embomeni na ingito ku na atuna pambuto enda ta bea. 7Eto Iesu na ke ehako, “Ungo amunurami jombure ere ove?” ainge enu enana na ehako, “Nango Iesu Nazareth embo avo jombure ere ora,” ainge eo, 8Iesu na ke einge ena, “Ke matu etene ingeva amo namora te embomeni namoga mitera erevi evu tapa pambare,” 9Ke ainge ena amo Iesu na pari ta ke matu einge ena, “Inena embo nau ika avo vahai beto mane pambasuja,” ainge pari ta ena avoeto embo tapa pambara ena. 10Eto Simon Peter amo amita asivo mitina avo kororoeto umbuto priest peni amita pure embo javo Malchus ta onde jeto havekenu 11Iesu na Peter ta degi ke einge ena, “No asivo goru ta juruke. Na Mama na atungu erevi indona siriketo ikena amo mane indonote?” ke ainge Iesu na ena.
Iesu Annas ta jo ta hetena
12Eto isoro embopo te eto titi jigari embopo te embo okokose te na Iesu jigito ingeni punduto 13umbuto pambuto embo javo Annas ta jo ta ikeo hetena. Eto iji amikote embo Caiaphas amo priest okose ena eto embo Annas amo Caiaphas ta imi avoeto Annas ta degi kiti pambuto ikeo hetena 14Eto Caiaphas na Judea embomeni ta degi ke matu einge ena, “Embo tapa mane amburesora te embo tapa avoeto embo vahai amburesuja,” ke ainge Caiaphas na ena.
Peter na Iesu kiae ke ena
(Matthew 26:69-70, Mark 14:66-68, Luke 22:55-57)
15Eto Simon Peter te ambotani nei vahai amite aingeto Iesu umbuto pahuo ambota pambuto ambotani vahai amo priest peni na matu kiari avoeto Iesu ga priest peni amita bande jo ta torenu Peter avo bande bokiri pe araha ta heteto mitinu 16Ambotani nei vahai priest peni matu kiari avoeto jo ta torena amina bokiri simba ari pamone amita degi enu puvuto Peter enu jo ta torenu 17bokiri simba ari kakara nei amina einge ena, “Embo emita ambotani nei amo umorete?” ainge enu Peter na, “Na avo manera,” ainge ena. 18Eto jajemo unu bande pure embopo te bande simba ari embopo te aingeto i buju evikitina ai ta heteto eritie mitio Peter pambuto enana ga heteto i eriritinu
Priest Peni na Iesu ganoka ena
(Matthew 26:59-66, Mark 14:55-64, Luke 22:66-71)
19Eto priest peni na Iesu na ke do ate poekitinu ingihe ambo ambo ea avo enu 20Iesu na ke mine einge ena, “Eto ate poekari nau amo ondikari na ae rate araha tambuta eone embo tapa na ingiora amo ke kasari bande ta eto temple jo ta eto Judea embomeni torukeora amita degi eone ingiora amo ke nei do ondikae 21Avoeto umo nau degi ta eto mane ingesoa te na ke do tapa eone ingiora amita degi eto ingijo,” ke ainge Iesu na enu, 22isoro embo vahai Iesu ta engiti ta heteto mitina amina, “Umo do eto priest okose ta degi ke sapura ere?” ainge ijie Iesu ta tombu ta tenu 23Iesu na ke mine einge ena, “Na ke sapura do etene ingea avo ejo ingone. Eto na ke sapura ae rate na sio tetea,” ainge enu, 24Annas na Iesu ta ingeni pundua amite tapa ikenu priest okose javo Caiaphas amita degi pambuna.
Peter na Iesu kiae ke ehako ena
(Matthew 26:71-75, Mark 14:69-72, Luke 22:58-62)
25Eto Simon Peter i eritie mitinu embomeni na, “Umo te tapa amita ambotani rete?” ainge eo, Peter na, “Na avo manera,” ainge enu, 26Priest peni ta pure embo vahai amo Peter na embo onde jeto havekena amita javo vahai amina Peter ta degi ke einge ena, “Na umo te tapa embo amiga dagogo tambu ta kenete?” ainge enu. 27Peter pero ue, “Na avo manera,” ainge ijinu ohora javone ena.
Iesu na Pilate ta titi ta hetena
(Matthew 27:1-2,11-14, Mark 15:1-5, Luke 23:1-5)
28Eto ihote Caiaphas ta bande toto Iesu umbuto Rome embo ta koto ari oro ta pambua. Eto jarukari pondo indari iji puvuna avoeto ungo hahara ue ungo Rome ta oro ta torae pambae toa 29Eto Pilate na araha ta puvuto heteto ke einge ena, “Embo emita sapura deire, avo evujo ingone,” ainge enu, 30embomeni na, “Embo emina ari sapura ae amo mane no ingeni ta ikaetera,” ainge eo 31Pilate na ke mine einge ena, “Ungota ke pepeni na embo evi ganoka eto ingivu,” ainge enu, Judea embomeni na ke einge ea, “Embo tari amburari amo dagota degi ta taekarira,” ainge ea. 32(Eto Iesu naingeto taro amburesuja amita ke Iesu na matu harikena. Eto embere einge emina enu Iesu ta ke ga inono ena.) 33Eto Pilate na koto oro ta toreto Iesu jage enu puvunu, “Umo Judea embo ta king rete?” ainge enu. 34Iesu na ke mine einge ena, “Ke umo erea amomo embo nei na etere ingito erete mo no hotembari na erete?” ainge enu, 35Pilate na ke mine einge ena, “Na Judea embo manera te priests pepeni no eto embomeni no amina umo umbuto nau ingeni ta iketera, amo ari sapura no mo deire?” ainge enu, 36Iesu na ke mine einge ena, “Na embo titi jigesona te enda ta ari avo mane aisona. Eto na enda ta ‘king’ aetena amo embomeni nau na ereto isoro eto Judea embomeni ta ari emo taekaetera te na ‘king’ ainge manera,” ainge enu, 37Pilate na, “Aravorate umo king rete,” ainge enu, Iesu na ke einge ena, “En, ke umo erea amo ke be. Na king ra te na avo ana nau aja na ingena. Eto na enda ta puvena amo ke be ano embomeni ingora puvena amo embo ke be ingari haite amina ke nau ingesuja,” ainge enu. 38Pilate na, “Ke be mo deire,” ainge ijie araha tambuta pambuto Judea embomeni ta degi ke einge ena, “Eto na embo emita sapura tambae etena
Iesu taro amburoja ke ea
(Matthew 27:15-31, Mark 15:6-20, Luke 23:13-25)
39Avoeto ungo Judea embo ta jarukari pondo iji te amo tipura embo eone tambuta pambuora avoeto ungo Judea embo ta king erevi ano tambuta pambaute?” ainge enu, 40embo tapa na gagaha eto ke einge ea, “Embo avo mane tambuta pambasuja te embo Barabbas avo ejo tambuta pambai,” ainge ea te Barabbas amo pegene embora.
Currently Selected:
John 18: okv
Highlight
Share
Copy
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.