मत्ती 9
9
येशूसे कुज्या म्हिदा खम्ना लबा
मर्कू २:१-१२; लूका ५:१७-२६
1जमाहेन्से येशू दोँगारी क्रेःसी क्याम्सङ्पट्टि फेप्जी, ओच्छे ह्राङलान सहररी#९:१ “ह्राङलान सहर” चा कफर्नहुम सहर हिन्ना। दोःसी फेप्खजी। 2म्हिगदेसे काङ या चलब आतबा कुज्या तसी म्हेर्सी चिबा म्हि गिकदा येशू मुबा ग्लारी भजी। येशूसे थेनीगदेला विश्वास म्राङ्सी थे कुज्या म्हिदा चुह्रङ् भिसी सुङ्जी, “कोला, भङ् लउ, ङाइ एला पाप माफ लबा मुला।”
3थेरी मुबा यहूदी धर्मगुरुगदे न्हङ्ला कोइ कोइसे ह्राङ ह्राङ न्हङ्री चुह्रङ् भिसी ताम लजी, “चुसे मि ह्राङसे ह्राङदान परमेश्वर स्होसी ताम लबान मुला।” 4येशूसे थेनीगदेला सेमला ताम था याङ्सी चुह्रङ् भिसी सुङ्जी, “एनीगदेसे तिग्दा चुह्रङ्बा नाइबा ताम म्हन्बा? 5‘एला पाप माफ तबा मुला’ भिबादेन ‘रेःसी भ्रउ’ भिबारी खजिबा चा सजिलो मुला? 6तर परमेश्वरसे पुइखबा म्हिदा चु जम्बुलिङरी म्हिगदेला पाप माफ लबा अधिकार मुला भिसी ङाइ एनीगदेदा उन्ना।” जमाहेन्से येशूसे थे कुज्या म्हिदा चुह्रङ् भिसी सुङ्जी, “ए रेःगो, ओच्छे एला तीबा नान्बा पुइसी दिमरी निउ।” 7जमाहेन्से थे रेःसी ह्राङला दिमरी निजी। 8चु म्राङ्सी थेरी मुबा म्हिगदे उदेक तजी। ओच्छे थेनीगदेसे म्हिगदेदा चुह्रङ्बा शक्ति पिन्बा परमेश्वरला जयजयकार लजी।
येशूसे मत्तीदा ङ्योइबा
मर्कू २:१३-१७; लूका ५:२७-३२
9येशू थेग्याम फेप्बान लबा धुइरी मत्तीदा तिरो दुइबा ग्लारी चिबान लबा म्राङ्जी, ओच्छे येशूसे थेदा “ङादेन छ्याम भ्रउ” भिसी सुङ्जी। जमाहेन्से थे रेःसी येशूदेन छ्याम भ्रजी। 10येशू मत्तीला दिमरी सोल छ्योइबान लबा धुइरी तिरो दुइबा म्हिगदेदेन पापीगदेएनोन खसी येशूदेन येशूला चेलागदेदेन छ्याम चिसी चबान मुबा। 11चु म्राङ्सी फरिसीगदेसे येशूला चेलागदेदा चुह्रङ् भिसी ङ्योइजी, “एनीगदेला गुरु तिग्दा तिरो दुइबा म्हिगदे ओच्छे पापीगदेदेन छ्याम चिसी चबा?”#लूका १५:१-२ 12चु ताम थेःसी येशूसे थेनीगदेदा चुह्रङ् भिसी सुङ्जी, “खम्बा म्हिगदेदा डाक्टर आतोः, तर आखम्बा म्हिगदेदा जे डाक्टर तोःला। 13दाहेन्से एनीगदे निसी चु तामला अर्थ तिग हिन्ना घोबारी म्हाइगो, ‘च्यागो, ङाइ म्हाइबा चा बलि आहिन, तर एनीगदेसे स्य्हान्दोदा लबा दया हिन्ना।’ थेतबासेलमा परमेश्वरला ङाच्छा ज्यबा मुबा म्हिगदेदा आहिन, तर पापीगदेदा ङ्योइबारी ङा खबा हिन्ना।”#मत्ती १२:७; होशे ६:६
येशूसे फोइथान चिसी प्रार्थना लबाला लागिरी लोप्बा
मर्कू २:१८-२२; लूका ५:३३-३९
14जमाहेन्से यूहन्नाला चेलागदे येशू मुबा ग्लारी खसी चुह्रङ् भिसी ङ्योइजी, “ङन्देन फरिसीगदे फोइथान चिसी प्रार्थना लमुला, तर ह्राङला चेलागदे चा तिग्दा फोइथान चिसी प्रार्थना आलबा?” 15येशूसे थेनीगदेदा चुह्रङ् भिसी सुङ्जी, “म्हाछार जन्तीगदेदेन छ्याम मुदेधोना थेरी मुबागदेसे सुर्दा आल। तर म्हाछार थेनीगदेग्याम फेसी भोर्माहेन्से जे थेनीगदे सुर्दा तसी फोइथान चिला। 16खालैसे बोक्टो क्वानरी छार क्वानगेनसे आख्या, छार क्वानगेनसे बोक्टो क्वान ख्याजी भिसम बोक्टो क्वान झन डेला। 17ओच्छे खालै म्हिसेनोन ढिला बोक्टो ताङ्री अङ्गुरला कलिलो निङ्गु आयु, चुदे युजी भिसम थे ताङ् ढेसी अङ्गुरला निङ्गु ङ्हेला। ओच्छे थे ताङ्एनोन गेआखेल्बा तला। तर अङ्गुरला कलिलो निङ्गु ढिला छार ताङ्री युला ओच्छे न्हीनोन जोगब तला।”
येशूसे याइरसला झामेदा खम्ना लबा
मर्कू ५:२१-४३; लूका ८:४०-५६
18येशूसे थेनीगदेदा चुह्रङ् सुङ्बान लबा धुइरी यहूदीगदे ह्रुप तबा दिमला नेता गिक खजी। ओच्छे येशूदा फ्या लसी चुह्रङ् भिसी पाङ्जी, “दन्दे भर्खर ङाला झामे सिजी, तर ह्राङ फेप्खसी थेदा ह्राङसे थुर्जी भिसम थे सोला।” 19जमाहेन्से येशू स्हेङ्सी थे म्हिदेन छ्याम फेप्जी, ओच्छे येशूला चेलागदेएनोन येशूदेन छ्यामनोन निजी।
20थेनोन धुइरी का निबा बेथासे स्याप्सी च्युक न्ही दिङ् तबा म्रिङ्म्हेमे गिक ग्यापग्याम खसी येशूला क्वान्ना जोरी थुर्जी। 21तिग्दा भिसम थेसे सेम सेमरी चुह्रङ् भिसी म्हन्बा मुबा, “ङाइ येशूला क्वान थुर्बारी जे म्याङ्सम ङा खम्ला।” 22फ्लिक दोःसी च्यामा येशूसे थे म्रिङ्म्हेमेदा म्राङ्जी। ओच्छे येशूसे थेदा चुह्रङ् भिसी सुङ्जी, “भङ् लउ, माइ! एला विश्वाससे लमा ए खम्बा मुला।” थेनोन धुइरी थे म्रिङ्म्हेमे खम्जी।
23येशू थे नेताला दिमरी दोखमा थेरी बाँसुरी ह्राप्बा#९:२३ यहूदीगदेला ठिम अन्छार म्हि सिबा धुइरी बाँसुरी ह्राप्बा म्हि भसी बाँसुरी ह्राप्पुङ्मुबा। म्हिगदेदेन हल्ली खल्ली लसी चिबा म्हिगदे म्राङ्जी। 24चु म्राङ्सी येशूसे जम्मादान चुह्रङ् भिसी सुङ्जी, “एनीगदे जम्मान मङ्ग्यार थोन्गो। तिग्दा भिसम माइ सिबा आरे, तर म्हेर्सी चिबा मुला।” चु ताम थेःसी थेरी मुबा म्हिगदेसे येशूदा खिसी लसी नेजी। 25थेरी मुबा म्हिगदे मङ्ग्यार थोन्माहेन्से येशू दिम न्हङ्री वाङ्जी। ओच्छे थे माइला यारी चुङ्सी थीजी। थीमैछ्याम थे माइ ढोङ् रेःजी। 26जमाहेन्से चु ताम थे य्हुल्साला जम्मान ग्लारी थेःजी।
येशूसे मी आम्राङ्बा म्हि न्हीदेन ताइ दोबा म्हिदा खम्ना लबा
27येशू थेग्याम फेप्बान लबा धुइरी मी आम्राङ्बा म्हि#९:२७ मी आम्राङ्बा म्हिगदेसे येशूदा दाऊद ग्लेला सन्तान भिसी ङ्योइमा थेनीगदेदा ङाच्छाहेन्सेन था मुबा थार्बा पिन्बा मसीह भिसी घोमुबा। तिग्दा भिसम यहूदीगदेसे येशू आखम्बा म्हिदा खम्ना लबारीदेन शासन लबारी दाऊद ग्लेला सन्तानग्याम थोन्ना भिसी विश्वास लमुबा। न्हीसे “दाऊद ग्लेला सन्तान, ङन्दा दया लउ” भिसी क्रिङ्बान येशूला लिच्छा लिच्छा खजी।
28येशू दिम न्हङ्री वाङ्माहेन्से थे मी आम्राङ्बा म्हि न्हीएनोन येशू मुबा ग्लारी खजी। जमाहेन्से येशूसे थे न्हीदा “ङाइ खम्ना लबारी खम्ला भिसी एनीगदेदा विश्वास मुला?” भिसी ङ्योइमा, थे न्हीसे “मुला, प्रभु” भिसी पाङ्जी।
29जमाहेन्से येशूसे थे न्हीला मीरी थुर्सी चुह्रङ् भिसी सुङ्जी, “एनीगदेसे विश्वास लबासेलमा एनीगदे खम्बा मुला।” 30येशूसे चुह्रङ् सुङ्मैछ्याम थे न्हीसे म्राङ्जी। जमाहेन्से येशूसे थे न्हीदा “च्यागो, चु ताम खालैदान आपाङ्गो” भिसी सुङ्जी। 31तसैनोन थेनीगदे निसी जम्मान ग्लारी येशूला बारेरी थेःना लजी।
32थे म्हि न्ही निबारी छ्याइमा म्हिगदेसे म्हाङ्से स्याप्सी ताइ दोबा म्हि गिकदा येशू मुबा ग्लारी भजी। 33येशूसे म्हाङ्दा ताप्मैछ्याम थे ताइ दोबा म्हिसे ताम पाङ्बारी छ्याइजी। चु म्राङ्सी थेरी मुबा म्हिगदे उदेक तसी चुह्रङ् भिसी पाङ्जी, “चुह्रङ्बाम ङन्से इस्राएल य्हुल्साला म्हिगदे#९:३३ याकूबला सन्तानदा इस्राएली भिसी पाङ्मुबा भिसम येशूला धुइला यहूदीगदे चा यहूदा अञ्चलला बेन्यामीनदेन लेवीला सन्तानगदे मुबा। न्हङ्री खाइमै म्राङ्बा आरेमुबा।”
34तर फरिसीगदेसे चा चुह्रङ् भिसी पाङ्बारी छ्याइजी, “चु म्हिसे मि म्हाङ्गदेला ग्लेला शक्तिग्याम म्हाङ् ताप्बा हिन्ना।”#मत्ती १०:२५; १२:२४; मर्कू ३:२२; लूका ११:१५
म्हिगदेदा म्राङ्सी येशूदा दया रेःबा
35जमाहेन्से येशूसे यहूदीगदे ह्रुप तबा दिमरी लोप्बादेन परमेश्वरला य्हुल्साला समाचार थेःना लजी। ओच्छे जम्मान थरीला रोगसे स्याप्बादेन आखम्बा म्हिगदेदा खम्ना लबान सहरदेन नाम्सा नाम्सारी फेप्जी।#मत्ती ४:२३; मर्कू १:३९; लूका ४:४४ 36म्हिला हुल म्राङ्सी येशूदा ल्हानान दया रेःजी, तिग्दा भिसम थेनीगदे खालैसे आच्याना दुख याङ्बा गोठालो आरेबा ग्युगदे ह्रङ्बान मुबा।#झ्याबा २७:१७; १ ग्ले २२:१७; २ काइ १८:१६; इज ३४:५; मर्कू ६:३४ 37जमाहेन्से येशूसे ह्राङला चेलागदेदा चुह्रङ् भिसी सुङ्जी, “च्यागो, बाली मि ल्हानान मिन्बा मुला, तर बाली दुइबा म्हिगदे ल्हाना आरे। 38थेतबासेलमा बाली दुइबा म्हिगदे पुइखउ भिसी बालीला दोप्ता प्रभुदेन छ्याम प्रार्थना लउ।”#लूका १०:२
© 2026 Eastern Tamang Language Team and Wycliffe Bible Translators, Inc.