मत्ती 3
3
बप्तिस्मा पिन्बा यूहन्नासे थेःना लबा परमेश्वरला य्हुल्साला समाचार
मर्कू १:१-८; लूका ३:१-१८; यूह १:१९-२८
1ल्हानान दिङ् लिच्छा बप्तिस्मा पिन्बा यूहन्ना यहूदिया अञ्चलला तोङ्तोङ्बा ग्लारी खसी चुह्रङ् भिसी पाङ्बारी छ्याइजी, 2“ह्राङ ह्राङला पाप ख्लासी परमेश्वरपट्टि दोःगो, तिग्दा भिसम स्वर्गला य्हुल्सा खसी जिन्बा मुला।”#मत्ती ४:१७; मर्कू १:१५ 3यशैया अगमवक्तासे चुनोन यूहन्नाला बारेरी चुह्रङ् भिसी पाङ्बा मुला,
“तोङ्तोङ्बा ग्लारी म्हि गिक चुह्रङ् भिसी क्रिङ्बा मुला,
‘परमप्रभुला ग्याम तयार लउ,
ओच्छे परमप्रभु भ्रबाला लागिरी थेला ग्याम सोझो स्होउ।’”#यशै ४०:३
4यूहन्नासे ऊँटला क्राला क्वान क्वान्मुबा, ओच्छे ढिला पेटी खिमुबा। थेसे तिरीदेन ह्रि सिङ्सुरला खुदु चमुबा।#२ ग्ले १:८ 5यरूशलेम सहरदेन यहूदिया अञ्चल ओच्छे यर्दन स्योङ्ला क्यारक्युरला जम्मान ग्लाला म्हिगदे थे मुबा ग्लारी खजी। 6ओच्छे ह्राङ ह्राङला पाप ख्लासी थेग्याम यर्दन स्योङ्री बप्तिस्मा किन्जी।
7तर फरिसीगदेदेन सदुकीगदे न्हङ्ला ल्हानान म्हिगदे बप्तिस्मा किन्बारी खबान लबा म्राङ्सी थेसे थेनीगदेदा चुह्रङ् भिसी पाङ्जी, “पुख्रीला कोलागदे, एनीगदेदा परमेश्वरला बोमोग्याम स्योरम्याङ्ला भिसी खाल्से पाङ्जी?#मत्ती १२:३४; २३:३३ 8थेतबासेलमा ह्राङ ह्राङला पाप ख्लासी परमेश्वरपट्टि दोःबा अन्छारला गे लउ। 9एनीगदेसे ङाला ताम ङ्यन्गो, एनीगदेसे ‘ङनी अब्राहामला सन्तान हिन्ना’ भिदेमा परमेश्वरला सजायग्याम स्योरम्याङ्ला भिसी आम्हन्गो। तिग्दा भिसम परमेश्वरसे अब्राहामला लागिरी चु युङ्बागदेग्यामसेनोन कोलागदे स्होबारी खम्ला।#यूह ८:३३ 10च्यागो, दोङ थाबारी तरी थीसी जिन्बा मुला। थेतबासेलमा ज्यबा रो आरोबा जम्मान दोङ टाहेन्सेन थासी मेरी भ्याङ्ला।#मत्ती ७:१९; लूका ३:९
11“ङाइ चा एनीगदेसे ह्राङ ह्राङला पाप ख्लासी परमेश्वरपट्टि दोःजी भिसी क्युइसे बप्तिस्मा पिन्ना। तर ङा भन्दा लिच्छा फेप्खबासे एनीगदेदा पवित्र आत्मादेन मेसे बप्तिस्मा पिन्ना। थे ङा भन्दा शक्तिशाली मुला। ओच्छे ङा थेला लखम पुइबाधोनाला सुत्तै आरे। 12ग्वा य्हाप्बा नाख्ले थेलान छ्यारी मुला, दाहेन्से ग्वा ज्यना लसी य्हाप्सी ग्वा जति भकारीरी थान्ना ओच्छे पोलोवा जति खाइमै आसिबा मेरी ख्राङ्ला।”
येशूसे बप्तिस्मा किन्बा
मर्कू १:९-११; लूका ३:२१-२२
13जमाहेन्से येशूएनोन यूहन्नाग्याम बप्तिस्मा किन्बारी गालील अञ्चलग्याम यर्दन स्योङ्री फेप्खजी। 14तर यूहन्नासे येशूदा चुह्रङ् भिसी रोकब लबारी म्हाइजी, “ङाइ चा ह्राङग्याम बप्तिस्मा किन्तोःबा मुला, तिग्दा ह्राङ चा ङा मुबा ग्लारी फेप्खबा?”
15तर येशूसे थेदा चुह्रङ् भिसी सुङ्जी, “दन्देदा चुह्रङ्नोन तगै। तिग्दा भिसम परमेश्वरसे म्हन्बा ताम पूरा लबारी य्हाङसे चुह्रङ्नोन लतोःला।” जमाहेन्से यूहन्नासे येशूदा बप्तिस्मा पिन्जी। 16ओच्छे येशूसे बप्तिस्मा किन्सी क्युइग्याम पाखारी थोन्मैछ्याम येशूसे स्वर्ग ठोङ्सी परमेश्वरला आत्मा ढुकुर ह्रङ् लसी फाप्सी ह्राङथोरी फेप्खबान लबा म्राङ्जी। 17जमाहेन्से स्वर्गग्याम चुह्रङ् भिबा काइ खजी, “चु ङाइ सेमहेन्सेन माया लबा ङाला झा हिन्ना, चुदा म्राङ्सी ङा ल्हानान ताङ्बा मुला।”#व्हाइ २:७; यशै ४२:१; मत्ती १२:१८; १७:५
© 2026 Eastern Tamang Language Team and Wycliffe Bible Translators, Inc.