मत्ती 28
28
येशूदा सिबाग्याम सोना लबा
मर्कू १६:१-१०; लूका २४:१-१२; यूह २०:१-१०
1ब्लप्बा न्हबा धिनना न्हङ्गरदाङ स्य्होरीन मरियम मग्दलिनीदेन स्य्हान्दो मरियम येशूदा थान्बा धुर्सा च्याबारी निजी। 2थेनोन धुइरी सङ्गुल खजी। तिग्दा भिसम स्वर्गग्याम परमप्रभुला दूत गिक मार फाप्सी धुर्साला म्रापरी थान्बा युङ्बा ब्लिङ्सी थेनोन युङ्बाथोरी चिजी। 3थे स्वर्गदूतला ली धिनीला स्हेर ह्रङ्बान य्हाल य्हाल्बा मुबा। ओच्छे थेला क्वान ग्लिङ तेःबान तार मुबा। 4थेदा म्राङ्सी धुर्सा ख्रुङ्सी चिबा सिपाहीगदे लोङ्सी फितफित धर्सी सिबा तेःबान तजी।
5तर स्वर्गदूतसे थे म्रिङ्म्हेमेगदेदा चुह्रङ् भिसी पाङ्जी, “एनीगदे आलोङ्गो, तिग्दा भिसम क्रूसरी टाँगब लसी साइबा येशूदा एनीगदेसे म्हाइबान मुला भिबा ताम ङादा था मुला। 6येशू चुरी आरे, थेसे सुङ्बा ह्रङ्नोन थेदा सिबाग्याम सोना लसी जिन्बा मुला। एनीगदेन खसी थेदा थान्बा ग्ला च्यागो। 7दाहेन्से एनीगदे योना निसी थेला चेलागदेदा चुह्रङ् भिसी पाङ्सी पिन्गो, ‘येशूदा सिबाग्याम सोना लसी जिन्बा मुला। ओच्छे येशू एनीगदे भन्दा ङाच्छा गालील अञ्चलरी फेप्बान मुला। एनीगदेसे येशूदा थेरीन म्राङ्ला।’”
8चुह्रङ् तबा म्राङ्सी थे म्रिङ्म्हेमेगदे लोङ्जी। तसैनोन स्वर्गदूतला ताम थेःसी थेनीगदे ल्हानान ताङ्सी येशूला चेलागदेदा थे ताम पाङ्बारी धुर्साग्याम थोन्सी य्हार्बान निजी।
9थे म्रिङ्म्हेमेगदे ग्यामरी निबानलमा तिक्खुरीन येशूसे स्याप्सी “एनीगदेदा शान्ति तगै” भिसी सुङ्माहेन्से थेनीगदेसे येशूला स्य्हाब चुङ्सी फ्या लजी। 10जमाहेन्से येशूसे थेनीगदेदा चुह्रङ् भिसी सुङ्जी, “एनीगदे आलोङ्गो, ङाला आलेगदे मुबा ग्लारी निसी थेनीगदेदा गालील अञ्चलरी निउ भिसी पाङ्गो, थेनीगदेसे ङादा थेरीन स्याप्ला भिसी पाङ्सी पिन्गो।”
धुर्सा ख्रुङ्बा सिपाहीगदेसे पाङ्बा ताम
11थे म्रिङ्म्हेमेगदे धुर्साग्याम निमाहेन्से धुर्सा ख्रुङ्सी चिबा सिपाहीगदे न्हङ्ला कोइ कोइ सिपाहीगदे सहररी निसी मूल पूजाहारीगदेदा थे धुर्सारी तिग तिग तबा मुबा, थे ताम पाङ्सी पिन्जी। 12जमाहेन्से मूल पूजाहारीगदेदेन यहूदी गन्बागदे ह्रुप तसी थेनीगदे न्हङ्री सल्लाह लसी सिपाहीगदेदा ल्हानान टाङ्गा पिन्सी चुह्रङ् भिसी पाङ्जी, 13“एनीगदेसे चुह्रङ् भिसी पाङ्गो, ‘ङनी म्हुनङ् म्हेर्बा धुइरी थेला चेलागदे खसी थेला लाश य्हो लसी भोर्जीम।’ 14तिगै लसी चु ताम शासन लबा म्हिसे था याङ्जी भिसै ङन्से थेदा ताङ्ना लसी एनीगदेदा तिगै लआपुङ्।”
15जमाहेन्से सिपाहीगदेसे थे टाङ्गा किन्जी, ओच्छे थेनीगदेदा लोप्बा अन्छारनोन म्हिगदेदा पाङ्जी। दन्देधोनाएनोन यहूदीगदेला गुङ्री चुनोन ताम लसी चिमुला।
येशूसे सुङ्बा थुम्ला ताम
मर्कू १६:१४-१८; लूका २४:३६-४९; यूह २०:१९-२३; मूल १:६-८
16येशूला च्युक गिक चेलागदे येशूसे कुल्बा अन्छार गालील अञ्चलला गङ्री निजी।#मत्ती २६:३२; मर्कू १४:२८ 17थेरी थेनीगदेसे येशूदा म्राङ्सी फ्या लजी। तर थेनीगदे न्हङ्ला कोइ कोइसे चा येशू हिन्ना कि आहिन भिसी शङ्का लजी। 18जमाहेन्से येशू थेनीगदे मुबा ग्लारी फेप्खसी चुह्रङ् भिसी सुङ्जी, “च्यागो, परमेश्वरसे स्वर्गदेन जम्बुलिङला जम्मान अधिकार ङादा पिन्बा मुला। 19थेतबासेलमा एनीगदे य्हुल्सा य्हुल्सारी निसी जम्मान य्हुल्ला म्हिगदेदा ङाला चेला स्होउ। ओच्छे थेनीगदेदा परमेश्वर आबा, परमेश्वरला झादेन पवित्र आत्माला मिनरी बप्तिस्मा पिन्गो।#मूल १:८ 20ओच्छे ङाइ एनीगदेदा लोप्बादेन कुल्बा जम्मान ताम थेनीगदेदाएनोन लउ भिसी लोप्गो। च्यागो, परमेश्वरसे जम्बुलिङला जम्मान म्हिगदेला निसाफ लबा धिनधोनाएनोन ङा एनीगदेदेन छ्यामनोन तला।”
© 2026 Eastern Tamang Language Team and Wycliffe Bible Translators, Inc.