मत्ती 26
26
येशूदा साइबारी म्हाइबा
मर्कू १४:१-२; लूका २२:१-२; यूह ११:४५-५३
1चु जम्मान ताम सुङ्सी जिन्माहेन्से येशूसे ह्राङला चेलागदेदा चुह्रङ् भिसी सुङ्जी, 2“मिश्र य्हुल्साग्याम फेसी खबा धिनदा ढन्सी धङ्बा चाड खबारी न्हीरे जे बाँकी मुला भिबा ताम एनीगदेदा थानोन मुला। थेनोन धुइरी परमेश्वरसे पुइखबा म्हिदा क्रूसरी टाँगब लबारी चुङ्सी म्हिगदेदा जिम्मा पिन्ना।”#थोन्बा १२:१-२७
3थेनोन धुइरी जम्मान भन्दा घ्रेन पूजाहारी कैयाफाला दिमरी यहूदी गन्बागदेदेन मूल पूजाहारीगदे ह्रुप तजी। 4ओच्छे थेनीगदेसे येशूदा खाह्रङ् लसी खालैदा था आयाङ्ना साइबा भिसी ह्राङ ह्राङ न्हङ्री सल्लाह लजी। 5तर थेनीगदेसे चुह्रङ् भिसी पाङ्जी, “य्हाङला चाडला धुइरी चा चुङ्बारी आत। चाडला धुइरी चुङ्जी भिसम म्हिगदेसे हुल दङ्गा लला।”
म्रिङ्म्हेमे गिकसे येशूला थोबोरी अत्तर फोर्बा
मर्कू १४:३-९; यूह १२:१-८
6येशू बेथानिया नाम्साला कोरे खबा सिमोनना दिमरी फेप्खजी। 7थेरी सोल छ्योइबान लबा धुइरी म्रिङ्म्हेमे गिक सिङ्गमरमरला ताङ्री ल्हानान महँगो अत्तर भसी येशू मुबा ग्लारी खजी। ओच्छे थेसे थे अत्तर येशूला थोबोरी युजी।#लूका ७:३७-३८
8चुह्रङ् लबा म्राङ्सी येशूला चेलागदे बोमो खसी ह्राङ ह्राङ न्हङ्री चुह्रङ् भिसी ताम लजी, “चुह्रङ्बा महँगो अत्तर तिग्दा होह्रङ्नोन खेरो भ्याङ्बा? 9बरू चु अत्तर चूङ्सी खबा टाङ्गा प्राङ्बोगदेदा पिन्बा हिन्सै तसेला मुबा।”
10येशूसे चु ताम था याङ्सी थेनीगदेदा चुह्रङ् भिसी सुङ्जी, “एनीगदेसे तिग्दा चु म्रिङ्म्हेमेदा कचकच लबा? चुसे मि ङाला लागिरी ज्यबा गे लबा मुला। 11तिग्दा भिसम प्राङ्बोगदे मि सदन एनीगदेदेन छ्याम तला। तर ङा मि एनीगदेदेन छ्याम सदन आत।#ठिम १५:११ 12चुसे ङाला सिबा ल्हुइ धुर्सारी थान्बाला लागिरी ङा सिबा भन्दा ङाच्छान ङाला थोबोरी चु अत्तर युसी ठीक लबा मुला। 13च्यागो, एनीगदेसे ङाला ताम ङ्यन्गो, जम्बुलिङला जुन जुन ग्लारी थार्बा पिन्बा समाचार थेःना लला, थे थे ग्लारी चु म्रिङ्म्हेमेसे लबा गे ढन्बाला लागिरी थेला ताम लला।”
येशूदा धोका पिन्बा
मर्कू १४:१०-११; लूका २२:३-६
14जमाहेन्से येशूला च्युक न्ही चेलागदे न्हङ्ला यहूदा इस्करियोत भिबा चेला गिक मूल पूजाहारीगदे मुबा ग्लारी निजी। 15ओच्छे थेसे थेनीगदेदा चुह्रङ् भिसी ङ्योइजी, “चुदे ङाइ येशूदा चुङ्सी ह्राङनीदा जिम्मा पिन्सम ह्राङनीसे ङादा तिग पिन्ना?” थेनीगदेसे यहूदा इस्करियोतदा बोगल गिकसे च्युइ म्हुइला डबल पिन्जी।#जक ११:१२ 16जमाकुनुहेन्से यहूदा इस्करियोतसे येशूदा चुङ्सी पिन्बाला लागिरी दाउ च्यासी भ्रजी।
येशूसे भोज तयार लउ भिसी कुल्बा
मर्कू १४:१२-२१; लूका २२:७-१३; यूह १३:२१-३०
17खमिर आयुना गेङ चसी धङ्बा चाडला शुरूला धिनकुनु चेलागदे येशू मुबा ग्लारी खसी चुह्रङ् भिसी ङ्योइजी, “ह्राङला लागिरी ङन्से मिश्र य्हुल्साग्याम फेसी खबा धिनदा ढन्सी धङ्बा चाडला भोज खानङ् ठीक लउ?”
18येशूसे चेलागदेदा चुह्रङ् भिसी कुल्जी, “एनीगदे सहररी म्हि गिक मुबा ग्लारी निसी थे म्हिदा चुह्रङ् भिसी पाङ्गो, ‘ङा सिबा धुइ तसी जिन्बा मुला। थेतबासेलमा ङाइ ह्राङला चेलागदेदेन छ्याम चिसी एला दिमरी मिश्र य्हुल्साग्याम फेसी खबा धिनदा ढन्सी धङ्बा चाड धङ्बा सेम मुला’ भिसी गुरुसे सुङ्बा मुला।” 19जमाहेन्से येशूसे कुल्बा अन्छारनोन चेलागदेसे मिश्र य्हुल्साग्याम फेसी खबा धिनदा ढन्सी धङ्बा चाडला भोज ठीक लजी।
20ङ्यसे तमाहेन्से येशू ह्राङला च्युक न्ही चेलागदेदेन छ्यामनोन भोज छ्योइबारी धन्छ्याजी। 21भोज छ्योइबान लबा धुइरी येशूसे चेलागदेदा चुह्रङ् भिसी सुङ्जी, “च्यागो, एनीगदेसे ङाला ताम ङ्यन्गो, एनीगदे न्हङ्लान गिकसे ङादा म्हिगदेला यारी जिम्मा पिन्ना।”
22जमाहेन्से ल्हानान दुख ङ्हम्सी चेलागदे जम्मासेन येशूदा “प्रभु, थे म्हि ङानोन हिन्ना?” भिसी पालो पालो लसी ङ्योइबारी छ्याइजी।
23ओच्छे येशूसे थेनीगदेदा चुह्रङ् भिसी सुङ्जी, “च्यागो, जुन म्हिसे खार्बारी ङादेन छ्याम गेङ तुइसी चमुला, थेनोन म्हिसे ङादा चुङ्सी पिन्ना।#व्हाइ ४१:९ 24परमेश्वरला बचनरी भ्रिबा ह्रङ्नोन परमेश्वरसे पुइखबा म्हि मि सिनोन तोःला। तर जुन म्हिसे परमेश्वरसे पुइखबा म्हिदा चुङ्सी म्हिला यारी जिम्मा पिन्ना, थेसे परमेश्वरग्याम खाह्रङ्बा लोङ्बा खबा सजाय याङ्ला। बरू थे मि न्हनोन आन्हबा हिन्सम ज्यबा तसेला मुबा।”
25येशूदा चुङ्सी पिन्बारी म्हाइबा यहूदासेनोन येशूदा “गुरु, थे म्हि ङानोन हिन्ना?” भिसी ङ्योइजी।
जमाहेन्से येशूसे थेदा “थे ताम मि एसेन पाङ्जी” भिसी सुङ्जी।
प्रभु भोजला शुरु
मर्कू १४:२२-२६; लूका २२:१४-२३; १ कोरि ११:२३-२५
26थेनीगदे भोज चबान लबा धुइरी येशूसे गेङ थोसी परमेश्वरदा धन्यवाद पिन्जी। ओच्छे थे गेङ क्युइसी चेलागदेदा “ना! चु चउ, चु ङाला ल्हुइ हिन्ना” भिसी सुङ्जी।
27जमाहेन्से येशूसे खोरेरी मुबा अङ्गुरला निङ्गु थोसी परमेश्वरदा धन्यवाद पिन्सी चेलागदेदा चुह्रङ् भिसी सुङ्जी, “ना! एनीगदे जम्मासेन चु थुङ्गो। 28तिग्दा भिसम एनीगदेसे थुङ्बा चु निङ्गु ङाला का हिन्ना। चु का एनीगदेदेन छ्याम लबा छार#२६:२८ ल्हानान ह्रङ्बा बाइबलरी “छार” भिसी भ्रिबा आरे। कबुल हिन्ना। चुनोन का ल्हानान म्हिला पाप माफ लबाला लागिरी बगब तला।#थोन्बा २४:८; यर्मि ३१:३४ 29तर एनीगदेसे ङाला ताम ङ्यन्गो, एनीगदेदेन छ्याम ङाला आबाला य्हुल्सारी छार अङ्गुरला निङ्गु थुङ्बा धिन आखदेधोना ङाइ चु निङ्गु आथुङ्।”
30जमाहेन्से परमेश्वरदा धन्यवादला व्हाइ गिक गोसी येशू ह्राङला चेलागदेदेन छ्याम थे ग्लाग्याम जैतून गङ्रीक्यार फेप्जी।
पत्रुससे येशूदा ङोसेबा आरे भिसी पाङ्ला भिसी येशूसे सुङ्बा
मर्कू १४:२७-३१; लूका २२:३१-३४; यूह १३:३६-३८
31जमाहेन्से येशूसे ह्राङला चेलागदेदा चुह्रङ् भिसी सुङ्जी, “तिनी म्हुनङ् एनीगदे जम्मासेन ङादा ख्लासी य्हार्ला। तिग्दा भिसम परमेश्वरला बचनरी चुह्रङ् भिसी भ्रिबा मुला, ‘ङाइ गोठालोदा साइला, ओच्छे ग्युगदे छरपष्ट तसी य्हार्ला।’#जक १३:७ 32तर ङादा सिबाग्याम सोना लमाहेन्से एनीगदे भन्दा ङाच्छा ङा गालीलरी निला।”#मत्ती २८:१६
33थेनोन धुइरी पत्रुससे येशूदा चुह्रङ् भिसी पाङ्जी, “ह्राङदा थेह्रङ् लमा जम्मासेन ख्लासी य्हार्सैनोन ङाइ ह्राङदा खाइमै आख्ला।”
34जमाहेन्से येशूसे पत्रुसदा चुह्रङ् भिसी सुङ्जी, “च्यागो, एसे ङाला ताम ङ्यन्गो, तिनी म्हुनङ् नागा क्राबा भन्दा ङाच्छा एसे सोमरेमधोना ‘ङाइ येशूदा ङोसेबान आरे’ भिसी पाङ्ला।”
35दोःसी पत्रुससे येशूदा चुह्रङ् भिसी पाङ्जी, “ङा ह्राङदेन छ्याम सितोःसैनोन ङाइ ह्राङदा आख्ला।” ओच्छे स्य्हान्दो चेलागदेसेनोन थेह्रङ्नोन पाङ्जी।
गेतसमनी बगैँचारी येशूसे लबा प्रार्थना
मर्कू १४:३२-४२; लूका २२:३९-४६
36जमाहेन्से येशू ह्राङला चेलागदेदेन छ्याम गेतसमनी बगैँचारी फेप्जी। ओच्छे चेलागदेदा चुह्रङ् भिसी सुङ्जी, “एनीगदे चुरीन चिउ, ङा चा जजाकी क्यथाङ् निसी प्रार्थना लला।” 37येशूसे पत्रुसदेन जब्दियाला झा न्हीदा चा ह्राङदेन छ्यामनोन भोर्सी फेप्जी। ओच्छे थेदा ल्हानान सुर्दा तसी सेमरी दुख तबारी छ्याइजी। 38जमाहेन्से येशूसे थेनीगदेदा चुह्रङ् भिसी सुङ्जी, “ङाला सेम क्रोसी ङा सिबा तेःबान तबा मुला। थेतबासेलमा एनीगदे चुरीन ङा ह्रङ् लसी छोर्सी चिउ।”
39ओच्छे येशू चा जजाकी क्यथाङ् फेप्सी सरी ख्लुप तसी चुह्रङ् भिसी प्रार्थना लजी, “ङाला आबा, ङाथोरी खबारी छ्याइबा चु दुख तसम ङादा नाआपुङ्गो। तर ङाइ म्हन्बा अन्छार आहिन, ह्राङसे म्हन्बा अन्छार तगै।”
40जमाहेन्से येशू चेला सोम मुबा ग्लारी दोःसी फेप्खमा थेनीगदे म्हेर्सी चिबा म्राङ्सी येशूसे पत्रुसदा चुह्रङ् भिसी सुङ्जी, “एनीगदे ङादेन छ्याम घण्टा गिक सुत्तै छोर्सी चिआखम्नी? 41दाहेन्से एनीगदे पापरी फसब आतबाला लागिरी छोर्सी प्रार्थना लसी चिउ। च्यागो, एनीगदेला आत्मा मि तयार मुला, तर ल्हुइ चा कमजोर मुला।”
42दोःसीनोन येशू ङाच्छाला ग्लारीन फेप्सी चुह्रङ् भिसी प्रार्थना लजी, “ङाला आबा, चु दुख ङाइ नानोन तोःबा हिन्सम ह्राङसे म्हन्बा ह्रङ्नोन तगै।”
43ओच्छे चेलागदे मुबा ग्लारी दोःसी फेप्खमा चेलागदे म्हेर्सी चिबा स्याप्जी। म्हेर्बा खबासेलमा थेनीगदेसे मीनोन ठोङ्आखम्नी। 44थेतबासेलमा येशूसे थेनीगदेदा थेरीन ख्लासी सोमरेमला पालोरी ङाच्छाला ग्लारीन फेप्सी ङाच्छाला ह्रङ् लसीन प्रार्थना लजी।
45जमाहेन्से येशू चेलागदे मुबा ग्लारी फेप्खसी थेनीगदेदा चुह्रङ् भिसी सुङ्जी, “अझन एनीगदे म्हेर्सी ब्लप्बा न्हबान मुला? च्यागो, परमेश्वरसे पुइखबा म्हिदा चुङ्सी पापीगदेला यारी जिम्मा पिन्बा धुइ खसी जिन्बा मुला। 46रेःगो, निइ! च्यागो, ङादा स्य्हान्दोला यारी जिम्मा पिन्बा म्हि खसी जिन्बा मुला।”
येशूदा चुङ्बा
मर्कू १४:४३-५०; लूका २२:४७-५३; यूह १८:३-१२
47येशूसे चु ताम सुङ्बान लबा धुइरी च्युक न्ही चेला न्हङ्ला यहूदा इस्करियोत भिबा चेलादेन छ्याम कडीदेन तरवार थोबा म्हिला हुल दोखजी। थेनीगदेदा मूल पूजाहारीदेन यहूदी गन्बागदेसे पुइखबा मुबा। 48येशूदा चुङ्बारी खबा म्हिगदेदा यहूदासे ङाच्छान चुह्रङ् भिसी पाङ्बा मुबा, “जुन म्हिदा ङाइ च्योक लला, थेनोन येशू हिन्ना, थेदान चुङ्गो।”
49येशू मुबा ग्लारी दोमैछ्याम यहूदासे “लास्सो, फ्याफुल्ला गुरु” भिसी येशूदा च्योक लजी।
50जमाहेन्से येशूसे थेदा “यहूदा, ए तिग लबारी खबा हिन्ना, थे लउ” भिसी सुङ्माहेन्से कडीदेन तरवार थोसी खबा म्हिगदेसे येशूदा चुङ्सी खीसी भोर्जी। 51येशूदेन छ्याम मुबा चेलागदे न्हङ्ला गिकसे ह्राङला तरवार तेःसी मूल पूजाहारीला घ्याबाला नाब्यङ् च्वाट्टन थाजी।
52थे चेलादा येशूसे चुह्रङ् भिसी सुङ्जी, “एला तरवार स्युपरी झाङ्गो। तिग्दा भिसम तरवार थोबा जम्मान म्हिदा तरवारसेन ताम्सी नाश लला। 53चुदे ङाइ ङाला आबादा पाङ्बा हिन्सम ङादा जोगब लबारी ङाला आबासे च्युक न्ही भन्दा ल्हानान स्वर्गदूतगदेला हुल तुरुन्तन पुइखसेला मुबा। चु ताम दन्देधोना एसे घोबा आरे? 54तर ङाइ चुह्रङ् लबा हिन्सम परमेश्वरला बचनरी चुह्रङ् तनोन तला भिसी भ्रिबा ताम खाह्रङ् लसी पूरा तला?”
55जमाहेन्से येशूसे ह्राङदा चुङ्बारी खबा म्हिला हुलदा चुह्रङ् भिसी सुङ्जी, “एनीगदे तिग्दा य्होदा चुङ्बारी खबा ह्रङ् लसी कडीदेन तरवार थोसी खबा? खाइ, ङाइ म्हिगदेदा धिन धिननोन परमेश्वरला मन्दिररी लोप्सी चिबा धुइरी एनीगदेसे ङादा आचुङ्नी।#लूका १९:४७; २१:३७ 56तर अगमवक्तागदेसे परमेश्वरला बचनरी भ्रिबा अन्छार पूरा तगै भिसीन चुह्रङ् तबा हिन्ना।” जमाहेन्से जम्मान चेलागदेसे येशूदा ख्लासी य्हार्जी।
येशूदा यहूदीगदेला घ्रेन सभारी भोर्बा
मर्कू १४:५३-६५; लूका २२:५४-५५,६३-७१; यूह १८:१३-१४,१९-२४
57जमाहेन्से येशूदा चुङ्बा म्हिगदेसे येशूदा जम्मान भन्दा घ्रेन पूजाहारी कैयाफाला दिमरी भोर्जी। थेरी यहूदी गन्बागदेदेन यहूदी धर्मगुरुगदेएनोन पोप तसी चिबा मुबा। 58तर पत्रुस चा थारेङ्ग्यामसेन येशूदा च्याबान च्याबान थे जम्मान भन्दा घ्रेन पूजाहारीला दिमला ख्राङ्गाधोनान निजी। जमाहेन्से येशूदा तिग लबा चिम भिसी पालेगदेदेन छ्याम चिसी च्याबारी छ्याइजी।
59मूल पूजाहारीगदेदेन घ्रेन सभाला जम्मान म्हिगदेसे येशूदा साइबाला सजाय पिन्बाला लागिरी येशूला बिरोधरी लुसीला ताम पाङ्बा म्हिगदे म्हाइजी। 60चुह्रङ् लसी ल्हानान म्हिगदेसे येशूदा बिरोध लबान लुसीला ताम पाङ्जी। तसैनोन थेनीगदेसे पाङ्बा ताम गिकनोन आढिक्नी। जम्मान भन्दा लिच्छाला म्हि न्ही ङाच्छापट्टि खसी चुह्रङ् भिसी येशूदा दोष लजी, 61“च्यागो, चु म्हिसे चुह्रङ् भिसी पाङ्बा मुला, ‘ङाइ परमेश्वरला मन्दिरदा फुप्सी सोमरेरीन स्होखम्ला।’”#यूह २:१९
62जमाहेन्से जम्मान भन्दा घ्रेन पूजाहारी रेःसी येशूदा चुह्रङ् भिसी ङ्योइजी, “एसे तिग्दा जोहाब आपिन्बा? चु म्हिगदेसे एला बिरोधरी पाङ्बा तामला बारेरी एदा तिगै पाङ्सेला आरे?”
63तर येशूसे तिगै जोहाब आलमाहेन्से जम्मान भन्दा घ्रेन पूजाहारीसे दोःसीनोन येशूदा चुह्रङ् भिसी पाङ्जी, “छोन्बो परमेश्वरला मिनरी घ्रान चसी ङन्दा पाङ्गो, तिग ए परमेश्वरला झा थार्बा पिन्बा ख्रीष्टनोन हिन्ना?”
64येशूसे थेदा चुह्रङ् भिसी सुङ्जी, “थे ताम मि ह्राङसेन सुङ्जी। तसैनोन दाहेन्से ह्राङनीसे परमेश्वरसे पुइखबा म्हिदा शक्तिशाली परमेश्वरला दाहिने छ्यापट्टि चिबादेन स्वर्गग्याम खसुरी खबान लबा म्राङ्ला।”#दानि ७:१३
65जमाहेन्से जम्मान भन्दा घ्रेन पूजाहारीसे ह्राङला क्वान ढेबान चुह्रङ् भिसी पाङ्जी, “चु म्हिसे परमेश्वरला बिरोध लसी ताम पाङ्बा मुला। दाहेन्से य्हाङदा अर्गु प्रमाण तिग्दा तोःजी? ह्राङनीसे दन्दे चुसे ह्राङसे ह्राङदान परमेश्वर स्होसी पाङ्बा ताम थेःनोन थेःजी। 66दाहेन्से ह्राङनीला तिग बिचार मुला?” जमाहेन्से स्य्हान्दोगदेसे चुह्रङ् भिसी पाङ्जी, “चु म्हि, साइनोन तोःबा म्हि हिन्ना।”#लेवी २४:१६
67जमाहेन्से थे म्हिगदेसे येशूला लीरी थो स्वासी तोबा ग्याङ्बा लजी। ओच्छे कोइ कोइसे चा येशूदा तोबान चुह्रङ् भिसी पाङ्जी,#यशै ५०:६ 68“ए थार्बा पिन्बा ख्रीष्ट हिन्सम, लु, अगमवाणी पाङ्गो। एदा खाल्से तोबा हिन्ना?”
पत्रुससे ङाइ येशूदा ङोसेबान आरे भिसी पाङ्बा
मर्कू १४:६६-७२; लूका २२:५६-६२; यूह १८:१५-१८,२५-२७
69थे धुइरी पत्रुस ख्राङ्गारी मुबा। थेदा म्राङ्सी घ्याबास्या गिक थे मुबा ग्लारी खसी चुह्रङ् भिसी ङ्योइजी, “एएनोन गालीलला येशूदेन छ्यामनोन मुबा आहिन?”
70तर पत्रुससे जम्मालान ओन्छाङ्री “एसे खाल्ला ताम लबा, ङादा तिगै था आरे” भिसी 71थे ख्राङ्गाला म्रापक्यार निजी। थेरीनोन थेदा स्य्हान्दो घ्याबास्या गिकसे म्राङ्सी थेरी मुबा जम्मान म्हिगदेदा चुह्रङ् भिसी पाङ्जी, “चु म्हिएनोन नासरतला येशूदेन छ्यामनोन मुबा।”
72दोःसी पत्रुससे घ्रान चबान, “ङाइ थे म्हिदा ङोसेबान आरे” भिसी पाङ्जी।
73जजाकी लिच्छा थेरी मुबा म्हिगदे पत्रुसला ङाम्री खसी थेदा चुह्रङ् भिसी पाङ्जी, “पक्कान, एएनोन थेनीगदे न्हङ्ला गिक हिन्ना भिबा एला तामग्यामनोन था तजी।”
74जमाहेन्से पत्रुससे ह्राङसे ह्राङदान केःबान चुह्रङ् भिसी घ्रान चजी, “ङाइ थे म्हिदा ङोसेबान आरे।”
थेसे थेह्रङ् पाङ्मैछ्याम नागा क्राजी। 75जमाहेन्से येशूसे चुह्रङ् भिसी सुङ्बा ताम पत्रुससे ढन्जी, “च्यागो, नागा क्राबा भन्दा ङाच्छा सोमरेमधोना एसे ङादा ङोसेबान आरे भिसी पाङ्ला।” थेतबासेलमा थे मङ्ग्यार निसी घ्वाँ घ्वाँ क्राजी।
© 2026 Eastern Tamang Language Team and Wycliffe Bible Translators, Inc.