मत्ती 12
12
येशू ब्लप्बा न्हबा धिननाएनोन प्रभु हिन्ना
मर्कू २:२३-२८; ३:१-६; लूका ६:१-११
1येशूदेन थेला चेलागदे ब्लप्बा न्हबा धिनकुनु भुग्याम फेप्बान मुबा। थे धुइरी फोख्रेन्बासेलमा थेला चेलागदेसे ग्वाला नम थुसी चबारी छ्याइजी।#ठिम २३:२५ 2थेनीगदेसे चुह्रङ् लबा म्राङ्सी फरिसीगदेसे येशूदा चुह्रङ् भिसी पाङ्जी, “च्यागो, ह्राङला चेलागदेसे ब्लप्बा न्हबा धिनकुनु ठिम अन्छार लबारीन आतबा गे लबा मुला।”
3जमाहेन्से थेनीगदेदा येशूसे चुह्रङ् भिसी सुङ्जी, “दाऊददेन थेला ह्रोगदेदा फोख्रेन्बा धुइरी थेनीगदेसे तिग लजी? तिग एनीगदेसे खाइमै परमेश्वरला बचन पढब लबा आरे?#१ शमू २१:१-६ 4थे धुइरी दाऊदसे परमेश्वरला दिमरी वाङ्सी परमेश्वरदा फुल्बा गेङ भसी ह्राङला ह्रोगदेदेन छ्याम ढिक्सी चजी। थे गेङ थेनीगदेसे चबारीन आतमुबा। तिग्दा भिसम थे गेङ पूजाहारीगदेसे जे चबारी तमुबा।#लेवी २४:९ 5ओच्छे एनीगदेसे परमेश्वरसे मोशादा पिन्बा ठिम पढब लबा आरे? ब्लप्बा न्हबा धिनकुनुएनोन पूजाहारीगदेसे गे लमुला, तसैनोन थेनीगदेसे पाप लबा मुला भिसी आम्हन्मुला।#झ्याबा २८:९-१० 6तर एनीगदेसे ङाला ताम ङ्यन्गो, परमेश्वरला मन्दिर भन्दा घ्रेन चुरी स्य्हान्दो खालै मुला। 7थेतबासेलमा ‘ङाइ म्हाइबा चा बलि आहिन, तर एनीगदेसे स्य्हान्दोदा लबा दया हिन्ना’ भिसी बचनरी भ्रिबा ताम घोबा हिन्सम एनीगदेसे तिगै दोष आरेबा म्हिदा दोष आलसेला मुबा।#मत्ती ९:१३; होशे ६:६ 8तिग्दा भिसम परमेश्वरसे पुइखबा म्हि ब्लप्बा न्हबा धिनना प्रभु हिन्ना।”
ब्लप्बा न्हबा धिनकुनु येशूसे आखम्बा म्हिदा खम्ना लबा
9थेग्याम येशू यहूदीगदे ह्रुप तबा दिमरी फेप्जी। 10थेरी या गिक खर्बा म्हि मुबा। फरिसीगदेसे येशूदा दोष लबाला लागिरी “तिग ब्लप्बा न्हबा धिनकुनु खालै म्हिदा खम्ना लबा ठीक हिन्ना?” भिसी ङ्योइजी।
11जमाहेन्से येशूसे थेनीगदेदा चुह्रङ् भिसी सुङ्जी, “एनीगदे न्हङ्री खालैला ग्यु गिक ब्लप्बा न्हबा धिनकुनु व्हाङ्री ताइजी भिसम एसे थे ग्युदा आतेःना थेह्रङ्नोन थान्ना?#लूका १४:५ 12एनीगदेसे ग्युदा मि तेःमुला भिसम म्हि ग्यु भन्दा घ्रेन आहिन? थेतबासेलमा ठिम अन्छार ब्लप्बा न्हबा धिनकुनु खालैदा ज्यबा लबा ठीक हिन्ना।”
13जमाहेन्से येशूसे थे म्हिदा “एला या तन्गब लउ” भिसी सुङ्माहेन्से थेसे या तन्गब लजी। तन्गब लमैछ्याम थेला या अर्गु या ह्रङ्बान ज्यबा तजी। 14जमाहेन्से फरिसीगदे थेग्याम थोन्सी निजी, ओच्छे येशूदा खाह्रङ् लसी साइबा भिसी ह्राङ ह्राङ न्हङ्री सल्लाह लबारी छ्याइजी।
परमेश्वरसे धम्बा म्हि
15फरिसीगदेला ताम था याङ्सी येशू थेग्याम फेप्जी। जमाहेन्से म्हिला हुलएनोन येशूदेन छ्यामनोन खजी, ओच्छे येशूसे आखम्बा जम्मान म्हिगदेदा खम्ना लजी। 16ओच्छे येशूसे ह्राङ खाला हिन्ना भिबा ताम खालैदान आपाङ्गो भिसी थेनीगदेदा होशियार तना लजी। 17यशैया अगमवक्ताग्याम परमेश्वरसे सुङ्बा चु बचन पूरा तबारीन चुह्रङ् तबा हिन्ना,
18“ङाइ धम्बा ङादा तेन्बा म्हि म्राङ्सी ङा ताङ्बा मुला।
ओच्छे थेदा ङाइ माया लसी ङाला आत्मा थेथोरी थान्सी पिन्बा मुला,
थेसे ङाइ लबा निसाफला बारेरी जम्मान य्हुल्ला म्हिगदेदा पाङ्ला।
19थे छेबा बङ्बा लसी आभ्र
ओच्छे ल्हानान क्रिङ्सीएनोन आभ्र।
थेतबासेलमा थे ग्यामरीक्यार क्रिङ्सी भ्रबा खालैसे आथेः।
20थिबा मादा आक्युइना जोगब लसी थान्बा ह्रङ् लसी दुखरी मुबा म्हिगदेदा थेसे जोगब लसी थान्ना।
थेह्रङ् लसीन छ्युगु जिन्सी सिबारी छ्याइबा नाङ्सलदा सिआपुङ्बा ह्रङ् लसी
थेसे विश्वासरी कमजोर तबा म्हिगदेदाएनोन जोगब लसी थान्ना।
ओच्छे जम्मादान ठीक निसाफ लसी थार्ना लला।
21थेतबासेलमा जम्मान य्हुल्ला म्हिगदेसे थेथोरी आश लला।”#यशै ४२:१-४
येशूदेन म्हाङ्ला ग्ले बालजिबुल
मर्कू ३:२०-३०; लूका ११:१४-२३
22जमाहेन्से म्हिगदेसे म्हाङ्से स्याप्सी ताइ दोबादेन मी आम्राङ्बा म्हि गिकदा येशू मुबा ग्लारी भजी। येशूसे थेदा खम्ना लजी, जमाहेन्से थेसे म्राङ्खम्जी, तामएनोन पाङ्खम्जी। 23चु म्राङ्सी थेरी मुबा जम्मान म्हिगदे उदेक तसी “चु दाऊद ग्लेला सन्ताननोन हिन्ना?” भिसी पाङ्जी।#मत्ती ९:२७
24तर चुह्रङ्बा ताम थेःसी फरिसीगदेसे येशूदा चुह्रङ् भिसी पाङ्जी, “चु म्हिसे मि म्हाङ्गदेला ग्ले बालजिबुलला#१२:२४ “बालजिबुल” भिबा शैतानना अर्गु मिन हिन्ना। शक्तिग्याम जे म्हाङ्गदे ताप्बा हिन्ना।”#मत्ती ९:३४; १०:२५
25तर थेनीगदेला सेमला ताम था याङ्सी येशूसे थेनीगदेदा चुह्रङ् भिसी सुङ्जी, “च्यागो, जुन य्हुल्साला म्हिगदे ह्राङ ह्राङ न्हङ्री आढिक, थे य्हुल्सा नाश तला, ओच्छे दिम गिकलान म्हिएनोन ह्राङ ह्राङ न्हङ्री आढिक्नी भिसम थे दिमनामएनोन न्होङ्ला। 26थेतबासेलमा शैतानसे शैतानदान ताप्जी भिसम थेनीगदे ह्राङ ह्राङ न्हङ्री फेला। थेह्रङ् लजी भिसम थेनीगदेला य्हुल्सा खाह्रङ् लसी टुला? 27ङाइ बालजिबुलला शक्तिग्याम म्हाङ् ताप्मुला भिसम एनीगदेला चेलागदेसे चा खाल्ला शक्तिग्याम म्हाङ् ताप्बा हिन्ना? थेतबासेलमा एनीगदेला गल्ती थेनीगदेसेन उन्ना। 28तर ङाइ परमेश्वरला आत्माग्याम म्हाङ् ताप्बा मुला भिसम एनीगदेला गुङ्री परमेश्वरला य्हुल्सा खसी जिन्बा मुला।
29 “भङ्बा म्हिला दिमरी वाङ्सी ङाच्छा थे म्हिदा आखीना खालैसे थेला धन सम्पत्ति य्हो लखम्ला? थे भङ्बा म्हिदा#१२:२९ येशूसे चु कथा थेसे भङ्बा म्हि ह्रङ्बा शैतानना ग्लेदा ढाजी भिसी घोना लबारी सुङ्बा हिन्ना। तिग्दा भिसम थेसे म्हाङ्दा म्हिला ल्हुइग्याम ताप्बा मुबा। खीमाहेन्से जे थेसे थेला धन सम्पत्ति भोर्खम्ला।
30 “जुन म्हि ङादेन छ्याम आढिक, थे म्हि ङाला बिरोधी तला। ओच्छे जुन म्हिसे ङा मुबा ग्लारी म्हिगदे आभ, थे म्हिसे ङाला बिरोधरी गे लला। #
मर्कू ९:४०
31थेतबासेलमा म्हिगदेसे जस्तोन पाप गेदेन पाप तामगदे लसैनोन थेनीगदेदा माफ लला। तर पवित्र आत्मादा बिरोध लसी पाप ताम लबा म्हिसे खाइमै माफ आयाङ्। 32थेह्रङ् लसीन खालै म्हिसे परमेश्वरसे पुइखबा म्हिदा बिरोध लसी ताम पाङ्सै थेसे माफ याङ्ला। तर पवित्र आत्मादा बिरोध लसी ताम पाङ्जी भिसम थेदा दन्देला धुइदेन लिच्छाला धुइरीनोन माफ आयाङ्।#लूका १२:१०
दोङ खाह्रङ् लसी ङोसेबा
लूका ६:४३-४५
33 “ज्यना लसी सयार लबा दोङरी ज्यना लसीन रोला। ओच्छे ज्यना लसी सयार आलबा दोङरी ज्यना लसी आरो। थेतबासेलमा सयार लजीम कि आलजीम भिबा ताम रोग्यामसेन था तला। #
मत्ती ७:२०
34पुख्रीला कोलागदे, एनीगदेला सेमरीन पाप मुला भिसम खाह्रङ् लसी ज्यबा ताम पाङ्खम्ला? तिग्दा भिसम सेमरी जुन ताम मुला, थेनोन ताम एनीगदेला सुङग्याम थोन्मुला।#मत्ती ३:७; २३:३३; १५:१८; लूका ३:७ 35ज्यबा सेम मुबा म्हिला सेम न्हङ्ग्याम ज्यबान ताम थोन्मुला ओच्छे नाइबा सेम मुबा म्हिला सेम न्हङ्ग्याम नाइबान ताम थोन्मुला।#मत्ती १५:१८ 36थेतबासेलमा एनीगदेसे ङाला ताम ङ्यन्गो, परमेश्वरसे निसाफ लबा धिनकुनु आतोःबा ताम पाङ्बा म्हिगदेसे ह्राङ ह्राङला हिसाब उन्तोःला। 37तिग्दा भिसम एला दोष मुला कि आरे भिबा एला तामग्यामसेन था तला।”
म्हिगदेसे उदेकला चिनु म्हाइबा
मर्कू ८:११-१२; लूका ११:२९-३२
38जमाहेन्से यहूदी धर्मगुरुगदेदेन फरिसीगदे न्हङ्ला कोइ कोइसे येशूदा “गुरु, ङन्दा ह्राङसे लबा उदेकला गे च्याबा सेम मुला” भिसी पाङ्मा,#मत्ती १६:१
39येशूसे थेनीगदेदा चुह्रङ् भिसी जोहाब पिन्जी, “नाइबा बानीबेहोर थोसी स्य्हान्दोदेन छ्याम ब्रेल्सी भ्रबा म्हिगदे#१२:३९ ब्रेल्सी भ्रबा म्हिगदे थार्बा पिन्बा समाचारगदेरी येशूसे ब्रेल्सी भ्रबा म्हिगदे भिसी सुङ्बा चा परमेश्वरथोरी विश्वास लबा ख्लासी भ्रबा म्हिगदेदा सुङ्बा हिन्ना। से उदेकला चिनु जे म्हाइमुला। तर दन्देला म्हिगदेदा चा योना अगमवक्ताला चिनु बाहेक अर्गु चिनु आउन।#मत्ती १६:४ 40तिग्दा भिसम धिन सोम म्हुन सोमधोना योना घ्रेन तार्ङाला फोरी चिबा ह्रङ् लसी परमेश्वरसे पुइखबा म्हिएनोन धिन सोम म्हुन सोमधोना धुर्सारी तला।#योना १:१७ 41च्यागो, परमेश्वरसे निसाफ लबा धुइरी निनवे सहरला म्हिगदे रेःसी दन्देला म्हिगदेला दोष उन्ना। तिग्दा भिसम योना अगमवक्तासे पाङ्बा परमेश्वरला य्हुल्साला समाचार थेःसी थेनीगदे ह्राङ ह्राङला पाप ख्लासी परमेश्वरपट्टि दोःबा मुबा। तर चुरी योना अगमवक्ता भन्दा घ्रेन म्हि गिक मुला।#योना ३:५ 42निसाफ लबा धुइरी लोग्याम खबा ग्लेस्यासे दन्देला म्हिगदेला दोष उन्ना, तिग्दा भिसम थे सोलोमन ग्लेला ज्ञान बुद्धिला ताम ङ्यन्बारी ल्हानान थारेङ्ग्याम खबा मुबा। तर च्यागो, चुरी सोलोमन ग्ले भन्दा घ्रेन म्हि मुला।#१ ग्ले १०:१-१०; २ काइ ९:१-१२
ङाच्छा थोन्सी निबा म्हाङ् दोःसी खमाहेन्से
लूका ११:२४-२६
43 “म्हाङ् म्हिला ल्हुइग्याम थोन्सी निमाहेन्से थेसे ब्लप्बा न्हबारी तोङ्तोङ्बा ग्लारीक्यार ग्ला म्हाइसी भ्रला। ओच्छे खानङ्एनोन ब्लप्बा न्हबा ग्ला आयाङ्माहेन्से 44‘ङा जुन म्हिला ल्हुइग्याम थोन्सी खजी थेनोन म्हिला ल्हुइरी चिबारी निइ’ भिसी दोःसी निला। दोःसी खमा थेसे ङाच्छा ह्राङ चिबा ग्ला खालै आरेबा साङ्साङ्बा म्राङ्ला। 45जमाहेन्से थे म्हाङ् निसी ह्राङ भन्दा नाइबा अर्गु गोर निस म्हाङ्गदे भसी थे म्हि न्हङ्री वाङ्सी चिमुला। थेतबासेलमा थे म्हिला गति ङाच्छाला भन्दा लिच्छाला गति झन नाइबा तला। दन्देला म्हिगदेदाएनोन थेह्रङ्बान तला।”
येशूला आमादेन आलेगदे
मर्कू ३:३१-३५; लूका ८:१९-२१
46येशू म्हिगदेदेन छ्याम ताम लबान लबा धुइरी येशूदेन छ्याम ताम लबारी भिसी थेला आमादेन आलेगदे मङ्ग्यार खसी चिबा मुबा। 47जमाहेन्से म्हि गिकसे येशूदा चुह्रङ् भिसी पाङ्जी, “ह्राङदेन छ्याम ताम लबारी भिसी ह्राङला आमादेन आलेगदे मङ्ग्यार खसी चिबा मुला।”
48तर येशूसे थे म्हिदा चुह्रङ् भिसी सुङ्जी, “ङाला आमा खाला हिन्ना? ङाला आलेगदे खाला हिन्ना?” 49ओच्छे येशूसे ह्राङला चेलागदेदा उन्बान चुह्रङ् भिसी सुङ्जी, “च्यागो, चुरी मुबा जम्मान ङाला आमादेन आलेगदे हिन्ना। 50तिग्दा भिसम जुन म्हि स्वर्गरी धन्छ्याबा ङाला आबासे म्हन्बा अन्छार भ्रला, थेनोन ङाला आमा, ङाला आङा ओच्छे ङाला आले हिन्ना।”
© 2026 Eastern Tamang Language Team and Wycliffe Bible Translators, Inc.