मूल 26
26
1जमाहेन्से अग्रिपास ग्लेसे पावलदा “दाहेन्से एसे ह्राङला बारेरी ताम पाङ्म्याङ्ला” भिसी पाङ्जी। ओच्छे पावलसे याला चाल लबान ह्राङला बारेरी चुह्रङ् भिसी ताम लबारी छ्याइजी,
2“अग्रिपास ग्ले, यहूदीगदेसे ङादा लबा जम्मान दोषला बारेरी तिनी ह्राङला ङाच्छापट्टि पाङ्म्याङ्मा ङा ल्हानान ताङ्बा मुला। 3यहूदीगदेला जम्मान रिमठिमएनोन ह्राङदा था मुला, ओच्छे थेनीगदेला गुङ्री आढिक्बा तामएनोन ह्राङदा ज्यना लसी था मुबासेलमा ङाला ताम आछेर्ना ज्यना लसी ङ्यन्सी पिन्गो भिबा ङाला बिन्ती मुला।
4“ङाला य्हुल्ला गुङ्रीदेन यरूशलेमरीनोन ङा जजाहेन्से दन्देधोना खाह्रङ् लसी भ्रबा मुला भिबा ताम यहूदीगदेदा था मुला। 5ङन्ना यहूदी धर्म तेन्बा म्हिगदे न्हङ्ला ह्राङसे तेन्बा ताम जे जम्मान भन्दा ठीक हिन्ना भिबा फरिसीगदेला समूह न्हङ्ला ङाएनोन गिक मुबा भिबा ताम थेनीगदेदा था मुला। थेतबासेलमा चु ताम पाङ्बा सेम मुसम थेनीगदेसे पाङ्खम्ला।#मूल २३:६; फिलि ३:५ 6परमेश्वरसे ङन्ना आखेम्हेमेदेन छ्याम लबा कबुलरी ङाइ विश्वास लबासेलमा तिनी ङादा चु मुद्दा तबा मुला। 7अग्रिपास ग्ले, ङन्ना च्युक न्ही वंशगदेसेन चु कबुल याङ्बाला लागिरी धिन म्हुननोन सेम गिक लसी परमेश्वरदा तेन्बा मुला। चुनोन कबुलरी ङाइ विश्वास लबासेलमा यहूदीगदेसे ङादा दोष लबा हिन्ना। 8परमेश्वरसे सिबागदेदा दोःसी सोना लला भिबा तामरी विश्वास लबारी ह्राङनीदा तिग्दा गाह्रो तबा?
9“हिन्बाम ङाइएनोन खम्देधोना नासरतला येशूला बिरोध लतोःला भिसी म्हन्बा मुबा।#मूल ८:३; २२:४-५ 10ङाइ यरूशलेमरी चुह्रङ् लसी बिरोध लजी। ङाइ मूल पूजाहारीगदेग्याम अधिकार किन्सी परमेश्वरला म्हिगदेदा झ्याल्खानरी झाङ्जी। ओच्छे थेनीगदेदा साइबा गेरीनोन ह्रो लजी। 11ओच्छे यहूदीगदे ह्रुप तबा जम्मान दिमगदेरी थेनीगदेदा ल्हानान रेम सजाय पिन्सी परमेश्वरदा बिरोध लउ भिसी कर लबा मुबा। ओच्छे थेनीगदेदेन छ्याम ल्हानान बोमो खसी ङाइ थेनीगदेदा अर्गु य्हुल्साला सहरगदेरीनोन दुख पिन्जी।
पावलसे ह्राङसे येशूदा विश्वास लबाला बारेरी पाङ्बा
मूल ९:१-१९; २२:६-१६
12“चुह्रङ् लसी मूल पूजाहारीगदेग्याम अधिकारदेन कुल्बा तामला चिठी याङ्माहेन्से ङा दमस्कस भिबा ग्लापट्टि निजी। 13अग्रिपास ग्ले, ङनी निबानलमा धिनी गुङ्री ङाइ स्वर्गग्याम धिनीला य्हाल भन्दा ल्हानान य्हाल खबा म्राङ्जी। थे य्हाल ङादेन ङाला ह्रोगदेला क्युर्सीन झ्वालङ् तजी। 14ओच्छे ङनी जम्मान सरी ह्रिल्जी। जमाहेन्से ङाइ हिब्रू ग्योइरी चुह्रङ् भिबा काइ थेःजी, ‘शाऊल, शाऊल, एसे ङादा तिग्दा दुख पिन्बा? ङादेन छ्याम छेसी एसे ह्राङसे ह्राङदान दुख तना लबा मुला।’#२६:१४ ग्रीक बाइबलरी “सुइरोरी काङसे छेक्मा एदान स्हु खला” भिसी भ्रिबा मुला। चु भिबा चा “ङादेन छ्याम छेसी एसे ह्राङसे ह्राङदान दुख तना लबा मुला” भिबा हिन्ना।
15“जमाहेन्से ङाइ, ‘प्रभु, ह्राङ खाला हिन्ना?’ भिसी ङ्योइजी।
“प्रभुसे ङादा चुह्रङ् भिसी सुङ्जी, ‘एसे दुख पिन्बान लबा येशू ङानोन हिन्ना। 16तर रेःगो, तिग्दा भिसम ङाइ एदा ङाला गे लबा म्हिदेन ङाला साक्षी पिन्बा म्हि स्होबाला लागिरी ङा ए मुबा ग्लारी खबा हिन्ना। एसे ङाला बारेरी म्राङ्बा तामदेन ङाइ एदा लिच्छा उन्बा तामगदेएनोन स्य्हान्दो म्हिगदेदा थेःना लतोःला। 17ओच्छे एदा ङाइ यहूदीगदेदेन अर्गु य्हुल्ला म्हिगदे मुबा ग्लारी पुइबारी छ्याइबा मुला। थेनीगदेसे एदा पिन्बा दुखग्याम ङाइ एदा जोगब लला। 18एसे थेनीगदेला मी म्राङ्ना लसी थेनीगदेदा धोपधोपग्याम य्हाल य्हाल मुबापट्टिदेन शैतानना शक्तिग्याम फेसी परमेश्वरपट्टि भतोःला। जमाहेन्से थेनीगदेसे पापग्याम माफ याङ्ला ओच्छे ङादा विश्वास लबासेलमा थेनीगदे परमेश्वरसे धम्बा म्हिगदेदेन छ्याम चिम्याङ्ला।’
19“थेतबासेलमा अग्रिपास ग्ले, ङादा स्वर्गग्याम उन्बा ताम ङाइ ङ्यन्बा हिन्ना। 20ङाइ ङाच्छा दमस्कसरी, जमाहेन्से यरूशलेमरीदेन यहूदिया य्हुल्सा नाङ्नोन चिबागदेदा, ओच्छे अर्गु य्हुल्ला म्हिगदेदाएनोन ह्राङ ह्राङला पाप ख्लासी परमेश्वरपट्टि दोःगो ओच्छे ह्राङ ह्राङला पाप ख्लासी परमेश्वरपट्टि दोःबा अन्छारला गे लउ भिसी थेःना लजी।#मूल ९:२०,२८-२९ 21ङाइ चुह्रङ् लसी थेःना लबासेलमा यहूदीगदेसे ङादा परमेश्वरला मन्दिररी चुङ्सी साइबारी म्हाइजी। 22तर तिनीधोना परमेश्वरसे ङादा ह्रो लबान मुला। थेतबासेलमा ङा चुरी राप्सी य्हुल्साला जजा घ्रेन जम्मादान चु ताम पाङ्बान मुला। ओच्छे ङाइ अगमवक्तागदेदेन मोशासे पाङ्बा ताम पूरा तनोन तला भिबा ताम बाहेक अर्गु तिगै ताम पाङ्बा आरे। 23थेनीगदेसे पाङ्बा ताम चा चुनोन हिन्ना, थार्बा पिन्बा ख्रीष्टसे दुख नानोन तोःला, ओच्छे सिबागदे न्हङ्री थे जम्मान भन्दा ङाच्छा सोसी थेसे ह्राङला य्हुल्ला म्हिदेन अर्गु य्हुल्ला म्हिगदेदा थार्बा पिन्बा य्हाल्ला बारेरी पाङ्ला।”#यशै ४२:६; ४९:६; १ कोरि १५:२०
24पावलसे चु ताम पाङ्बान लमा फेस्तससे घ्रेन काइ तेःसी चुह्रङ् भिसी पाङ्जी, “पावल, ए म्योबा हिन्ना, एसे ल्हानान पढब लबासेलमा एदा थेसेन म्योना लबा हिन्ना।”
25तर पावलसे चुह्रङ् भिसी पाङ्जी, “जम्मासेन मान लबा फेस्तस, ङा म्योबा आहिन, तर ङाइ सत्य तामदेन बुद्धिला ताम जे पाङ्बा मुला। 26चु तामला बारेरी अग्रिपास ग्लेदाएनोन था मुबासेलमा ङाइ ढुक्क तसी चु ताम पाङ्बान मुला। ङाइ पाङ्बा चु जम्मान ताम ग्लेदा थानोन मुला भिबा ताम ङादा पक्का था मुला। तिग्दा भिसम चु ताम खालैसे आम्राङ्बा ग्लारी लबा आहिन। 27अग्रिपास ग्ले, तिग ह्राङसे अगमवक्तागदेदा विश्वास लमुला? ङादा था मुला, ह्राङसे विश्वास लमुला।”
28जमाहेन्से अग्रिपास ग्लेसे पावलदा चुह्रङ् भिसी पाङ्जी, “तिग एसे ङादा चुदे योनान ख्रीष्टियान स्होबारी म्हाइबा?”
29पावलसे चुह्रङ् भिसी जोहाब पिन्जी, “योना तसै घइसी तसैनोन चु च्याल्दागदे बाहेक, ह्राङ जे आहिन, तर तिनी ङाला ताम ङ्यन्बागदे जम्मान ङा ह्रङ्बान तगै भिसी ङाइ परमेश्वरदेन छ्याम प्रार्थना लबा मुला।”
30जमाहेन्से ग्लेदेन शासन लबा म्हि ओच्छे बरनिकीदेन थेरी मुबा जम्मान म्हिगदे रेःसी निबारी छ्याइजी। 31ओच्छे थे ग्लाग्याम थोन्माहेन्से थेनीगदेसे ह्राङ ह्राङ न्हङ्री चुह्रङ् भिसी ताम लजी, “चु म्हिसे साइनोन तोःबा अथवा झ्याल्खानरी झाङ्तोःबाधोनाला तिगै गे लबा आरेम।”
32ओच्छे अग्रिपाससे फेस्तसदा चुह्रङ् भिसी पाङ्जी, “चुसे रोमी ग्याल्बोला ङाच्छा ह्राङला ताम थान्बा सेम आलबा हिन्सम पुइसै तसेला मुबा।”
© 2026 Eastern Tamang Language Team and Wycliffe Bible Translators, Inc.