Nhiara 17
17
Riy mak kakleh hala sniumbainni
1Daud sniumbaini:
Matroma! Mutlin reria a li'ru mak kwaka plola-mneha la' O'a Matroma!
Mhueri tlinmu-mpuali matmu mai a polpuo'lu-wakwa'ku
mak klola a ralma plele'eru di Matrome!
2Mtiulan pa Muod nian a lia' lira-tun di Matroma,
yoma la' O' nanpena ed mak kat niohora plolli-halli.
3La'pa orgahamu Mueh'a mak Mumkek a lia' lera melli
yoma Omiwra Mtia'aga a ih'ru-ralmu de emeka riy rala ai ra rhudia maha,
de hota Mumkek nana a ih'ru-ralmu mak kaploi-kaple'era.
La' lira-tun maka a'ukot la O'a, de ha rwatiaga a ih'ru-ralmu mak awuaror nana.
4La'a hya' maka Omukota de hare er maka aghi'a,
pede oliet a lia talan mak riy maklekla-makdiaini rlola.
5La' a mormio'ru di de, awuo'la-liekur la'a loi-talan maka ha Mtiutu-mtie'a,
ne a'g edon gokur la malwiru onde la malganna.
6A puol lia O'a, Uplerlawnu ne! Yoma la' O' nanpena ed mak klin reri-kmat reria a'u,
pede Mpuahla mai a'u, Matroma.
Hota tlinmu nta'i nan momuoga hya' maka ukota re honona.
7Mtiut momuoga tniulla-sniayanmu mak kdait la lyanti.
Yoma O' ed maka kamori-kalewna rimormiori mak kakriuwun la O nayanmu.
Yoma la' O' inonmu onni nanpena riy edonna ramta'at la arwalli mak hota rwakriania.
8Mutiak reria a' die emeknekama mat wamuehemu.
Mude'a-mumoinia a'u emeknekama hiwi tei mak kreka-krek a'nani la liwarni nayanni,
9totpena riy yatyata-halala re ta'enniana rte'la nan a'u.
Yanpa mak kle'lu reri a'u re hota rwenan nan a'u.
10Ir de riy kospo'ona
mak kakleha sniayanni la ir rimormior wialli.
11Rmai die rwaleran pa rle'lu rer a'u
yoma riwra ror au mpakdordiorni, totpa rwehya litr a'u.
12Wniehwani re emeknekama ohpora-ahdiawra mak kiwra klihira-knaiya mak ha riwra ra'ana,
ne lala'a-tattiaya pa emeknekama ohpor mak kwei nieka hya' maka niwra nlihira.
13Mupriri-mukdeda pa Muora re mpiahapra lia'ara totpena orgahamu Mutowra re.
Ne Mulewn a'u, Matrome! Mual wehlamu mua Muorindoini riy yatyata re.
14 Matrome! Mulewn a lia'a
riy mak kawoka-kale'ga re'a-tniarga nohkeran di wawannu.
Muala ir pa rler la yatlorni-yatra'ani maka Omhi' targ oleka de.
Mukum wutga rora di'nani-lohorni honona.#17:14 Makatu Puka mana raplin niohora plollola ayat di nnia'eratni.
15Mere a' die hota umke'ku yoma a'g edonna diel la'a do'a-hala re ralamni.
La'pa umat wa, de umkekna'nu pede a ralmu nahepur memna.
Currently Selected:
Nhiara 17: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
