Nhiara 143
143
Daud nsumbain pa nwaka tniulla-sniayni la Itmatromlawanni Makdenrer die
1Hadi de Daud nhiar ya'ulli-yawedni:
Matroma, Mutlin reria a sniumbain la O'a.
De, Mutail rer lia'a hya' maka ukotkota.
Mpuahla a li'ru di onnila Omdien nek la plol wawannu
me hya' ed maka Muno'taru re, hota Mhi' nana.
2 Matroma, a' di de hopopna-lili'irmu mak ktutu-khana O'a.
Yan Mhudi-mpuar a'u, yoma la'pa riy id mana edon naplol la O gaimu ralamni.
3 Matroma, a' arwa'lu nal a lia yawa,
pa nhi'nande rhokra-rlai olek a pua
rho'la targ a lia'a roma nhio'la mak mel'uta ralamni
pa a'g emeknekama riy mak kmati miemn olekwa.
4A ino'nu nakleh et miemna ruri-lai lia a te'mu
pa nhi'nande aghakomu-ghakamu.
5Mere a'g e ghoratrer mia'ta O hihi'imu-yapyapmu honona la' ler ululu.
A wniaro'ru-wniala'yu nod rer lia hihi'imu-yapyapmu mak kamehi-kayona re.
6Noma ariana a li'mu pa asiumbaini.#143:6 pa asiumbaini Lira ri re edon ndella Puka yawala Ibrani mere rwe'er nohora yawala Ibran die lirni. Yana olie'tu la mai a'u, Matroma,
yoma agha'ar a' arnu la' O'a pa emeknekama tani mak keran tar lia genni yoma rwei niek otna pa nturu.
7 Matroma, Mpuahla a li'ru la dodo'ondi wa
yoma a'ukleh et miemna ruri-lai lia a te'mu nhi'nande aghakomu-ghakamu.
Yan Mude'u mai a'u.
Yanhi'pa a'g emeknekama riy mak kmat pia kanietar la hoi-kietra ralamni.
8Matroma, awuak pa la' yawyawar la' lera-ler nekpa Mual a' pua agat niohor memna sniayanmu mak Omtiut rier nieka mai a'u,
yoma agha'ar targ a arnu la Omueh'a.
Mtiutga talan mak hota aliola
yoma arian a ralmu pa asiumbain tiy O'a.
9Amuai die giwra dien to'ola O limmu ralamni,
totpena Omuolin doinia a lia'a arwali re limni ralamni.
10Mpuatutg a'u totpa aliernohor reri O ralma-riormu.
Yoma a Uplerlawnu O'a. Matroma,
Muala pa Nhiw Lululmu Nalakra a lia'a loi-talla mak kaplele'era,
yoma E ralam kalwiedni.
11 Matroma, Mulewna a'u totpena hota riy ra'uli-rawedia O kotmu-nanmu onnila ramkek nana ralam kalwiedmu mai a'u.
Muhal doinia a lia'a yatyatni-halalli yoma O' ed mak khi' rer nieka kalwiedni-paitiotni la rimormiormu.
12Onnila Mtiut rier nieka ralam kalwiedmu de mai a'u, pede Mukum penna a arwa'lu re.
Mpunu-mpuenna re yoma nhiolli-lietni rpa'ei-rpahala la O hopopanmu-lili'irmu a'u.
Currently Selected:
Nhiara 143: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
