Nhiara 124
124
Itmatromlawanni Makdenrer die ed maka kruwun reria rimormiorni
1Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni la'a letlawna Yerusalem (Nhiara Ziarah Daud):
La'pa Itmatromlawanni Makdenrer die edonna Nodnian it de, hota it tsi'a hya' o?!
Makden Israel miy re, mikot teka!
2La'pa it arwalli re rler rtemn ita,
ne Itmatromlawanni Namkek rer tiertehra to' ita, de hota it tsi' emkameni o?!
3Yoma la'a ira ralam mehrani la ita
pede rahankeran nan de riwra rlumu-rtelan to' it wa.
4La'pa Itmatromlawanni edonna Ntulan mai ita, de emeknekama it taner olek it wa,
pa tayaton la gera ralamni.
5Pa hota it tmati lia gera ralamni,
yoma twuwul wenna ita la'a ger maka kmota-kaulu letgarni.
6Mmiai pia ta'uli-tawedi Orgahi-Orha'a Uplerlawna-Mempulwatnu,
yoma E edonna Nolin limni la mai ita pa la'pa it arwalli re rehgoru ita.
7It emolmolan nekama ma'nu
maka katiewar doin la dedesu tniokla,
pa nnem olietlet wa
yoma tniokla netnian oleka wa.
8Tniulan de ha nwatiaga Orgahi-Orha'a Uplerlawna-Mempulwatnu
Maka Kakoki-kayapi niana lyanti nora nohkerna wawannu re honona.
Currently Selected:
Nhiara 124: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
