Nhiara 108
108
Rsumbain pa rwaka tniulla-sniayni la Uplerlawna totpena Nal ir arwalli la yawa
1Hadi de Daud nhiar ya'ulli-yawedni:
2A pesia'yu toto' meman la O'a Matroma!
Agiwra gala a nhi'wu-nhio'nu di honona
pa wuatunu-wuahniar pa a'u'uli-uwedi O'a.
3La'pa lokloka-laklak meman ma'ta de
giwra umat a'u pa a'udowna tiwla-prai hitara-fiola totpa a'u'uli-uwedi O'a.#108:3 Agiwra gala tiwla-prai hitara-fiola pa ga' wuatunu-wuahniara pa umata lera nhia' yawyawarni.
4 Matromlawnu ne! O' ed Makdenreri O'a! Agiwra u'uli-uwedi O'a la rimormiori mak kwatiawu lodna-hairi re gaini ralamni.
A ralmu sukni meman pa nodia nhiara ya'uli-yawedi la O'a la'a lol meni-meni to'a maka rimormiori ha rden la.
5Yoma la'a O sniayanmu mak kodi liarni.
Sniayanmu de emeknekama nareh niana lyanti
me O ralam kalwiedmu de ho'mana nden rer lia wowta-kakma ha ndella.
6Uplerlawnu ne! Mtiutga O prehemu-mkaimu la lyanit lawna,
me plolmu-mnehemu hitmu-lomarmu la nohkerna-rai miaran di wawannu.
7Matroma! Mumori-mulewna am lia'a plolmu-mnehemu.
Mpuahla nana a wakwa'ku totpena la' rimormior miaka Omtiulla-msiayni re rler la mormiori-lewlewna.
8Uplerlawnu ne! Omdien nek la genia mounu-witanni pa orgahamu Mhar lirmu pa Mukot oleka Miwra:
“Yoma Urehi olek la ar ralma pede hota Agala geni-tiena Sikhem nohananni-taniaratni
me lembah Sukot la A rimormio'ru.
9Noha Gilead nora Manasye de A tieman reria.
Noha Efraim de emeknekama karpusa pi'ra tnieri mai A'u,
ne la' noha-rai Yehuda de A lie'enu la'a A lodnu-hairu.
10Mere Moab nohoni-raini de A niohma lak ge'nu.
Ne hota A riarni-riarin nohora A'unut nana Filistea.
Ne la' Edom de Aghopil targa A la'ku wniowni la' hande, de emekwalima A gah'u hade.”
11Pede dodo'on di a'utiana O'a Matrome! Hota Omuor a tialla pa alia Edom me edonna?
Hota O' ed mak kalakr a lia'a let maka arwa'lu yaro'wa genni (benteng) deno?!”
12Uplerlawnu ne! Omukottar oleka hota Omual a' ar wal miamni la' yawa!
Nihya' pede la' dodo'ondi de O' edonna Muor am tialla?!#108:12 Omukottar oleka hota Omual a' ar wal miamni la' yawa! Nihya' pede la' dodo'ondi de O' edonna Muor am tialla?! Yawala Ibrani riwra: “Nihya' pede Mpuayotlia ami?!”
Hota O' edonna Mpuer nohora makodi keki-raut mamni rena?!
13Matrome! Mtiulan pa Mdieh'a reria arwal miamni re,
yoma hota am mpaka tniulan la rimormiori de hota edonna nodia hadom mai ami.
14Mere am mora Uplerlawna O'a de hota a hair mamni nawnianin pa nodi liarni.
O' ed mak kala a' arwal miamni la yawa.
Currently Selected:
Nhiara 108: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
