Nhiara 102
102
Sniumbaini la'a rler la sniusa
1La'a maka kler la sniusa ralamni pa npolpuol inni-nwakwak amni pa nakleh oleka ruri-lai wia dewade npol lia Itmatromlawanni Makdenrer die, niwra:
2 Matrome! Muheri tlinmu-mutatar matmu la'a a wakwa'ku di!
Aghaun tiy O' de Mtiulan la mai a'u Matroma!
3Alier la polpuol inni-wakwak amni de
yana Muolin limmu-mpue'er rormu mai a'u!
Mhueri tlinmu-mpual miatmu
pa pleta-plet pa Mpuahla nan a'u.
4Yoma a mormio'ru di emekneka ai miokal maka kekeneka klar doin la wa.
Te'mu nhi'a pa emeknekama a ru'ru-kliaklu rwal lia ai kwiari mak kharn a'u.
5A' di de ukleha ruri-lai emeknekama wewan keran mak kerna-khau
me a'uhmena u'una-gemnu.
6Apuolpuol i'nu-wuakwak a'mu
nande tre' ma'ta to'a ulti ntoman ruri la a te'mu.
7A'g emeknekama ma'nu mak kdella gen miaka riy hadamonan la
onde la' let maka riy rweyata-rwaniawu oleka wa.
8Lelera-melmel de yanin onna-yamat onna.
A'g emeknekama ma'nu prowta maka nmemeh'a tar lia likti id wawannu.
9Lelera-melmel nek mana arwa'lu re rapolu-raliella a'u.
Mak ralamni sukni tiala mai a'u, de rlokra-rhautia rira de rweta a na'nu.#102:9 rlokra-rhautia rira de rweta a na'nu Rlokra-rhautia rira de rwak pa riy rler la yatyatni-halalli yatlorni-yatra'ani pa emekwalima e nlernan olekwa.
10Lera-lera nekpa aken reri awu la a o'tu wawannu totpena atiutg a ralma mayo'u.#102:10 aken reri awu la a o'tu wawannu totpena atiutg a ralma mayo'u La'a yawala Ibrani la ayat di riwra: “Yoma a'una awu emeknekama roti”. Makden Yahudi re, la'pa ralamni re rmolu-rhelam doin la, de ramtatan rer lia awu wawannu na'nama rken niek awu la o'tani wawannu. Lera-ler nekpa ramtatan emkade pa nhi'nande awu nawniah'a wutga la ir yamananni maka ira'ana. Hade pede niwra: “a'una awu emeknekama roti”.
Apuolu-kiakur nande a lu'yu-nuhru nawniah'a wutga la' a niemnu.
11Yoma la'a O yawenanmu ralamni de
Omuhankeran pa Mpualiakra a lia walli.
12A mormio'ru de emeknekama memnu-tatra mak ktuin nohora lera,
ne upliau pua emeknekama wewna.
13Mere Matroma Makdenreri O'a. O' ed maka khi' Ray mak kodi liarni pa,
tuwu nhernu tuwu mana, edonna rhoratdoinia O' inponmu.
14 Matroma! Ntutg olek la lerni-melli
pa hota Omumat pa Mtiutga tniulanmu-sniayanmu la leta Sion.
15Yoma O rimormiormu mak khima-kre'a O'a sukni ir let wamueheni Sion de.
La'pa rira rweyata-rwaniaga ir letni nhi'nande nwal nieka la watu-watu nor wutga enni-tanni to'a,
mere emkade ho'mana, rsayn ma'ta letni genni.
16 Itmatromni Nodi plolli nhi'nande riy mak kwatiawua noha-rai honona ra'unni-ramta'at wenna,
ne la walia ray-ray honona mana, ihranu ntepul wenna la'a Itmatromni preheni-mkaini.
17Yoma hota Itmatromlawanni Makdenrer die, Nariri owa'ana leta Sion la genni.
Emkade hota ramkek nana E rurni-laini plolli-mneheni.
18Ne hota Natlin la rimormiori mak kakleha-kaplara sniumbaini.
Ir wakwakni re de edonna Nwayotlia.
19Mmiai pia tsorat tar momuoga Matromlawanni Makdenreri de, hihi'ini-yapyapni la Puka totpena rimormior miak ktawli'iru de ratga,
totpena rimormior miak edon rmor mia'ta la dodo'ondi mana, hota ra'uli-rawed reria E'a.
20Yoma Itmatromlawanni Makdenrer die Ndella tutullu-lolo'oni la'a Ilyamou-Watyatoha
pa Nta'wa matni la nohkerna wawannu.
21Me Nta'wa tlinni la mak kden la roma nhio'la ralamni re polpuollu-wakwakni.
Nolin doinia riy mak klernana niukum matmiati.
22Nhi'nande Itmatromlawanni nanni mana rwahaur nohora la' Sion,
de ra'uli-rawedia E'a la Yerusalem,
23la' ler maka makden la lodna-hairi, noh pa'etu-rai piatatra rawowioin
pa rla rkola tieru-rawur nehla la Itmatromlawanni la hande.
24Mere Itmatromlawanni Nhi' a pua ukleha ruri-lai lia a ino'nu la'a ler maka a tuwarwiar mia't a'u,
ne la a mormio'ru plahwani la nohkerna wawannu mana, Nhi' akpuria.
25Dewade a'ukot la giwra: “Uplerlawnu ne!
Yana mliehga a arnu yoma a mormio'ru edon nla ma'ta mto'oni-pe'eni.
Matroma, tuwu nerun la tuwu mere Omdien ma'ta la.”
26La'a ululu memna, la' noha gergera-tatiah'i ma'ta de O' ed mak kakoki-kayapia noh maran di
me O orgahamu ed maka khi' nana lyanti.
27Hota hare honona re rmol wua, emeka raini mak yatyat olek wa, mere O' di de Omdiella genmu.
Nohkerna-rai miaran di hota Omhi'a pa rmolu wa emeknekama rain maka edon rnairi owa'ana.
Honona re hota Mhuoplial momuoga. Na'nama O ed mak kala warwuarnu ma Mhuerun doinia.
28Mere O' edonna Mhuerun doinia oke' eti.
Me O mormiormu edonna la ntutu-la nte'ewa mere nodia pa la nodi liarni.
29Ne la'a am die mak khima-kre' O'a, de hota a' up mamni-a'na mamni rmori-rdar lia mtiertierannu.
Hota rden la mtemtemanni la O limmu ralamni.
Currently Selected:
Nhiara 102: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
