Rano'a 29
29
1La' pa he' ed maka rira takenniana rpolliohor nana
de hota la'a mtatande nekpa nler la yatyatni-halalli yatlorni-yatra'ani.
2La'pa riy maka kholi-klet la ploini-ple'erni ra'ititar rer lia liawanni me rodi plolli,
de hota lima-rora rahepur nande rloi-rhek nohora.
Mere la'pa riy yatyata ida rwet la pa nodi plolli de
hota lima-rora la'a leta mniotni polpuol inni-wakwak amni.
3Upa-a'na mak kwahak totpa rlernana kirkira-ralma rior samomuou
de rhi' amni ralamni pa rahepru.
Mere la'pa he' ralamni sukni la patke' yatyata
de emekwalima e nhoplial to'a kupna-kaini la hletna letgarni.
4La'pa ray ntorna-nrautu nodi plola-mneha
de lodanni-hairni nawniau kdededa.
Mere la'pa eneknek to'ama ntot nan to' kupna la limni-rorni
de hota edon nalo'on wali ne letni-ruhunni ntuini kdieulu.
5La'pa he' ed maka kanur mi'na la e rimormior wialli,
de emekwalima e nhi' owa'ana totota id la ira.#29:5 nhi' owa'ana totota id la ira Riy dom de rwarora ayat di nnia'eratni emkadina: “hota orgahi nmeh'a nler tar lia tototni de ralamni.”
6Riy yatyata do'oni-halli ntot owa'ana orgahani la tototni ralamni.
Mere la'pa riy maka kden la plola-mneha ploi-ple'era ralamni,
de hota nden la mormiori-dardiari miaka kamtiertiernu pa nahei-nahepru nande neniehu-tertera.
7La'a riy maka kwehwa-klakat samomuou de rat niohora riy kleleha genni-tienni wawannu
pa nhi'inde rodniana riy kleleha re lirni-tunnu,
mere riy yatyata-halala raplin niohora rhi' emkade.
8La'a riy maka nhi'inde kapolu-kaliella, hare er maka khi'a kokokna-rariarin la leta-ruhuna ralamni.
Me la' riy mak katu nanpena er maka kodia lina-lera.
9La'pa mak katu rora mak kpodku rhi' lira-tunu,
de hota mak kpoduk de polpuolu-hawaunu onde nahe'i-namali mak katu la maketlia lira-tunu gaini ralamni.
Hade nariei pia kokokna-rariarin to'owa.
10Riy mak kwunu-kwenan lawna sukni tia'ala la riy ralma plele'era,
mere hota riy samomuou re er maka kruwun reri-ka'ahla reria re.
11Riy podku rawenan de rto'pi-rgaur to'owa,
mere la riy mak katu de natahan rer nieka lirni-tunnu re wa.
12La'pa mak kodi plolli ida natlin la riy mak kodia lir lalahara,
de hota riy honona mak kar lia e' de rwalia la riy mak khi' yatyatni-halalli.
13Riy mak kakleha rrora mak kdunti-kwetria ira nekpa ramnenehela' ida,
yoma Itmatromlawanni ed maka kal ir rewre'wa pa rmori-rdari me Nhi' ir matni re ramkeka.
14La'pa ray ida netlia riy kleleha re lirni-tunnu nodia rhi'ina-rella plola-mneha,
de hota ray die nkukmu-nto'ma pa nodi liarni.
15Liwliwra nora lira pniolliohora ed mak khi' pa upa-a'na rwalia riy mak ktaru kirkira-ralma rior samomuou.
Upa-a'na maka inni-amni rlernohor neka hihi'ini-yapyapni de hota nhi' amola-ma'a inni mak kayori.
16La'pa riy yatyata-halala mak kodi plolli la'a leta ida de hota do'a-hala ra'ititar rer lia.
Mere riy yatyata re hota rler la yatyatni-halalli yatlorni-yatra'ani, la'a riy plele'era re gaini ralamni.
17Mliwliwra-mkakaklia mpuatutu-mpuaye'a upmu-a'namu,
ne hota e nodia ihru-ralma mtiertierun la' miy me nhi' miy pia niniha-malmialmi.
18La'a noha-rai miak edon nlernana Itmatromlawanni lira nnio'oni-wawa niatnu mak ktutga talla la' ira,
de hota nariei pia lima-rora kokokna-rariarin to'owa.
La'pa maka katlina-katailla Orgahi-Orha'a riorni-liaini
de hota rler la unut lawna.
19Rwatutu-rwaye'a ata-wa'ara ida de edonna rala lira-tunu nmeh'a,
yoma hota natg oleka wa, mere edon nlernohora ne nhi' owa'ana hadom owa'an de to' owa'ana.
20Riy mak kpodku-kpadku de samou ma'ta la'a
riy maka edon nwarora pleini mere pleta-plet pa natlier tio'owa.
21Hopopna-lili'ir maka it tsur niohora la' kuku' ma'ta
de hota nlawan wa dewade nhi' targho' it pa it o'tani nmehra yoma e na'o'ta kpau.#29:21 Riy dom de rwarora ayat di nnia'eratni de emkadina: “hopopna-lili'ir maka it tsur niohora la' kuku' ma'ta de hota nlawan wa dewade nwaruiya it gahani momuoga.”
22La'a riy maka pleta-plet pa kawenna de nhi' riy rahu pa rawunu-rawenna
me nhi'nande dodo'a-halala na'ititar rer lia liawanni.
23La'a riy po'ona de hota Uplerlawna ed mak kalernia la yawa.
Mere la' riy maka khu'ru-khelma de hota rlernana ya'uli-yawedi.
24Riy maka kwalidan wut lia mak kamnelu-kamna'a
de emekwalima sukni tia'ala e inon wamueheni.
La'pa nwahaur momuoga hare la'a mak ktoran watghudi gaini ralamni
de hota mak ktoran watghudi retlia e lirni.
Ne hota la'pa nahmena nakot lirni ho'mana
hota nlernana niukamnu la Uplerlawna Mempulwatnu.
25La'pa ittuin tiar lia do'a-hala ralamni yoma tamta'at rira pa tlernohora ir yawewalli,
hade emekwalima rtot it la ir tototni ralamni.
Mere la'pa itsa'ar it mormiorni la'a Itmatromlawanni Makdenrer die,
de E ed mak kruwun reri ita.
26Riy rahu nhi'inde rla rwahaka gai lia mak ktorna-krautu totpa rtulan la ira,
mere eneknek to'ama Orgahi-Orha'a Nmeh'a maka kodnian it la'a plola-mneha wawannu.
27Riy samomuou ralamni sukni tia'ala riy yatyata.
Emekwalima riy yatyatni re gaini rpetan la riy samomuou.
Currently Selected:
Rano'a 29: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
