Rano'a 25
25
Salomo lira nnio'oni-wawa niatnu dompali maka Hiskia rhopna pa rtulsi
1Nhoru pua nmai wia hadi de Salomo nakot targa lira nnio'oni-wawa niatnu dom pali. La'pa ntutu-nte'ela Yehuda rayni id nanni Hiskia de lerni dewade nhopan pa rtulsi momuoga lira nnio'a di la puka id owa'ana:
2Ra'uli-rawedia Uplerlawna la'a genni-tienni,
yoma la'a hya' maka Uplerlawna orgahani Nade'a-namoinia de rimormiori ha raplin niohora.
Me la' walia riy rhu'ru-rhelam la ray,
yoma nwahak pa nat niohora hya' mak kayade'a re.
3Ray-ray re ralma-riorni, de ta'enniana rira rwaror nana
yoma emolmolan nekama hletan mak kdieldelma me lyanit mak tutulu.
4Ral doinia leli-mah de karte'eni
totpena hota mak ktukna nhuri-nwewla leli-mah de.
5Emkade walia mhuokar gota riy yatyata maka kano'a-ka'at lia ray
totpena ray lodanni-hairni nawniau kdededa yoma ntorna-nrautu de nodi plola-mneha rhi'ina-rella.
6He' ed mak kiwra kla kwatrom ray pa niwra nakot hadom la, de natu nodi inonni pa nlola yawa.
Me yana nwehwa-nlakat de emeknekama o'ta-mat lalawna ida.
7La' samomuounu de ray nmeh'a ed mak kwak pa tamtatan la gen tiutulu.
Mere la'pa nhopan pa terun la it genni totpena o'ta-mata id namtatan la, de molmola-mama'a hade.
La'pa mumkeka hya' maka ompuarora de nhala, de
8yan memmemna muahrur pua muodia lir la mak ktoran watghudi.
Yoma la'pa hya' maka omukota de nhala de hota omuola-mua'a la rira gaini ralamni.#25:8 Yoma la'pa hya' maka omukota de nhala de hota omuola-mua'a la rira gaini ralamni La' yawala Ibrani riwra: Yoma hota la'pa omhuala de “hota omhi' emkameni ooo?!”
9La' samomuounu de omuora o he' wialmu mhi'a sal hadoma de miy mrio' nekpa ed maka mhi' ahorga,
me rira halli maka kayawunmu de yana mpuahaur nohora totpa riy ratga.
10Yanpa hota omlier la molmola-mama'a yoma rwet o la riy nur yatyata,
me hota la' o mormiormu plahwani de rira edonna rpesia'yu.
11Itala lira nnio'a-wawa niatu mak kaplol meman la genni,
de emeknekama tsuri-twewla leli-maha maka yamkekni samomuou memna.
12Riy mak katu lira pniolliohorni de nodi untu la riy mak katlina-katailla.
Yoma lira pniolliohora de emeknekama leli miaha-kdieli miaha weli wierwerta.
13La'pa riy maka ha rhopna nlernohora reria mak khopna e'a lirni
dewade mak khopan de ralamni namtiertiernu
pa emekwalima ger wokwiok miaka mak kreiki-kwo'ora remnia.#25:13 ger wokwiok miaka mak kreiki-kwo'ora remnia Riy dom de rwarora ayat di nnia'eratni emkadina: “emekwalima salju la rieiki-wnio'ora lerni.”
14He' ed maka kran inonni pa nakottarga hota nala limtutnu-limho'oni, mere edon nala hadomdoma,
de hade emeknekama wowta-kakma mak anin lawna nod lia'a-nod miai mere hota otna edonna ntur wali.
15It edon pleta-plet pa tawenna, mere tala lira mnapla ta taltieri lia,
de hota o'ta-mata rpesiay ita
me hota la'pa he' ed maka kahmen memna rreiniana it wakwakni
de rherun doinia nhiolli de mai ita.
16Herwalia ta'ana-temnia gan tiuru liawanni
yoma hota tiwra tamota.
17Yana lera-lera nekpa ma mpualoha-mpualakat la rom heiwialmu,
yoma hota ralamni npen wua de hota sukni tia'al wa.
18He' ed mak kodniana riy mak khala me nalahar pa nwaghal riy mak kakleha do'a-hala
de hade emekwalima wehla onde au wnianalu onde ra'p'ihi ploklokra.
19La'pa itweiwiei rieri riy maka edon rtorreri lirni totpa rtulla-rsayn ita la' ler maka itler la susa ralamni,
de hade emeknekama it tala it nihini mak kahyoyoi ta takwi'i onde it tala' de it lakni nwaini-nwaini.
20Twatunu-twahniar la'a mak kler la kleha-lara polpuol inni-wakwak amni mere it edon ttulla-tsayni ira,
de emeknekama it tlehwa mak ksusa rella la'a mela wokwioki, onde emekwalia it tawdia'ia sidu la ir no'oni.
21La'pa o' arwalmu naplara, de muala na'ana,
ne tiernu kerna de mual ger la nemnu.
22Yoma hota omhi' emkadella' e'a de hota nmola-nma'a pa nherun doin hihi'ini-yapyapni,#25:22 hota nmola-nma'a pa nherun doin hihi'ini-yapyapni Makden Ibrani riwra “rkeni ai kwiari la o'tani” nnia'eratni de: hota nmola-nma'a pa nherun doin hihi'ini-yapyapni. Mimkek walia la Roma 12:20.
ne hota omliernan memna hihi'imu-yapyapmu de wniahlani la Orgahi-Orha'a.
23Hota plola! Anin mak kgot warta#25:23 warta Yawala Ibrani riwra: ra'i. de nodia otna pa nturu.
Emkade wal lia tapupu-taheria rira de hota nodia yawunu-yawenna.
24Samounu de taliu'ut la'a heyanan la likit ku' di pohnerni,
hornama yan tor wutga it hawni pata maka la' ha kuku'a id to' mana petpue'tu-dadiai niohora yawunu-yawenanni mai ita.
25Tlernana kot samomuou la'a noh olietleta de
emeknekama it temnia ger wokwioki.
26La'pa riy samomuou mere nwaldioin pa nlernohora rira pa nhi' yatyatni-halalli,
de emeknekama ger ormat mak kwalia la ger mak kmokla-kmahu onde ger tnyip muaka kakdieha-kaktiahli.
27Yana muemnia gani lawlawna.
Ne hota emkade walia yana mtiot rer nieka ya'ulmu.
28La'a riy maka takeni nodi samomuou inonni
de emeknekama leta-ruhuna maka lutarni-wa'arni ro' dodioin olekwa.
Currently Selected:
Rano'a 25: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
