Rano'a 14
14
1Patke'a ida mak ktaru kirkira-ralma rior samomuou de nhi'inde natu natiak romni mniotni totpena rler la kalwiedwedni.
Mere patke' maka kpodku-kpadku nhi' romni mniotni rahuri-rawo'or nekneka pede edon rdella mtiertierannu.
2La'a riy maka illu-wniehwani plolioi-plele'era de na'unni-namta'ata Orgahi-Orha'a.
Mere la'pa riy maka edonna nwehwa ploi-ple'era, de napolu-naliella Orgahi-Orha'a.
3Riy podku sukni nmeh'a na'uli inon wamueheni, mere lira-tun mak klergot la e nurnu er mak khi' pa rira rliwra-rkaklia e to'orni owa'ana.
Mere la'a riy maka katu de orgahi lirni-tunnu ed maka kruwun rer owa'ana e' inon wamueheni.
4La'pa hayori-orpau hadamonan de awrieha hadamonan wali.
Yoma la'a ruri-lai hayori-orpau pede rieiki-wnio'ora naniutni-namdierna.
5Mak ktutrier niohora (saksi) plola nhi'inde nakot nohora plollolli.
Mere la'pa mak ktutrier niohora (saksi) mak edon kaplola de sukni la nalahara.
6Riy maka kpo'ona-kpei nwahak pa ntutga inonni emeknekama orkirkira-ralma rior samomuoga,
mere la' plollolli de naplin niohor hadomdoma.
Mere riy maka katu de hota nahaka lira nnio'a-wawa niatu
de plet pa natga.
7Olietmi la riy podku-padku. Yana sukmi miora mpiatam putu.
Yoma hota miy edonna mliernana kirkira-ralma rior samomuou la' ira.
8Riy maka kirkirni-ralma riorni samoga niwra nhi' hadom de nwarora pleini hota emkameni la wnialolli.
Mere riy podku-padku podaknu nodi ir inon wamueheni rler tar lia klierat lawanni.
9Riy mak podku edon pusin nohora do'oni-halli pa edon rwak Itmatromni totpa Namou-nawitna ira ihranu ralamni maka kakdeha-kaktiahli#14:9 Namou-nawitna ira ihranu ralamni maka kakdeha-kaktiahli La'a yawala Ibrani kata maka rnairi la' ayat di de nnia'eratni de: “hoihoi-tantiani maka ha rala la Uplerlawna totpena Uplerlawna Namou-nawitna ir do'oni-halli.” .
Mere Uplerlawna ralamni Nal nana riy samomuou yoma rwak Uplerlawna totpena Nolin doinia ir la do'oni-halli#14:9 Uplerlawna ralamni Nal nana riy samomuou yoma rwak Uplerlawna totpena Nolin doinia ir la do'oni-halli Riy dom de rwarora ayat di nnia'eratni de emkadi: “Mere riy samomuou suksukni de totpa ror rimormior wialli rkalwieda.”.
10Samoga onde yata ho'mana nden nek la up apun pa na'apun reria.
La he' to' mana edon nat niohora.
11La' riy samomuou romni-lewnu de hota nayarir atehra,
mere riy yatyata romni-lewnu de anin lawna nwo' doinia la' genni.
12La'a loi-talla dom de tamkeka de samoga,
mere la'awa honi de talan de ntawniokur nana talan maka kler la matmiati-molmuolu ralamni.
13Riy rkakru pa rapolu-ratniani mere hota rala niha-mali ra rtutwua totpena yana rira rat niohora.
Yaniha-yamali liawna hota nwaldioinia de knio'a-kniakru.
14Riy maka khoitio'or doin la talan mak kaplola de hota rlernana nhiakarni la hihi'ini-yapyapni re.
Mere riy samomuou hota rreiki-rwo'or nana wo' samomuou.
15La'a mak kakleh ma'ta wniarora-wnialai kirkira-ralma rior samomuou, de sukni npesiaya lira-tunu rupni-rupni.
Mere la'a riy mak katu de nhi' hadom de de na'ereram la temni.
16La'a mak katu kholi-kleta riwra rhi' hadom de orahniorta pleini totpa#14:16 orahniorta pleini totpa Riy dom de rwarora hadi nnia'eratni de: “ra'unni-ramta'ata Itmatromlawanni pede.” rahal inonni la yatyatni-halalli.
Mere la' riy podku raplinu rodi inonni. Ir edon rwarora pleini mere riwra rhi' hadom de pleta-plet pa rhi' nana.
17La'pa riy maka sukni la yawenna de nhi'inde nhi'a hihi'a-yapyapi mak kpodpodku-kpadpadku.
Mere riy mak katu re, edonna naralmha'ara mere natu nhu'ru-nhelma rimormior wialli. #14:17 La'a yawala Ibrani de riwra emkadi: “Ne riy edon rtelan nana-raut nana riy mak sukni nnia'ohma-nniakatia yatyata-halala la rimormior wialli.”
18La'a riy mak kaplin niohor ma'ta la wniarora-wnialai kirkira-ralma rior samomuou hota nwal lia riy podku.
Mere mak katu de hota lirni-yatnu ra'ititar rer lia.
19Riy yatyata emkameni ho'mana hota rmai lia riy miaka ihranu ralamni raploi-raple'era
pa ruh' idma-rrama lia'ar la totpa rwaka tulla-sniayni.
20La'pa riy maka kre'a-ktaru de mutwualli riy harahu.
Mere riy kleleha de, ir mutwualli nek de ralamni edonna rala.
21La'pa he' ed maka kmakriarni rimormior wialli, de ha nler la do'a-hala olekwa.
Ne la'pa he' ed mak khi' samomuoga mak kakleha-kaplara de hota ha mormiorni nler la kalwiedni-paitiotni.
22La'pa he' ed maka kwarora-kwalai rieri samomuounu de hota Uplerlawna Ntutg la E tulanni-sniayanni makodi liarni.
La'a riy maka kna'ohma yatyatni, de hade nler olek la talan lawna klieratni.
23La'a tulla-kniari re honona de nodia unut lawna.
Mere riy pamalsa de hanni to' yaltieri pede nodi e' la kleha-lara.
24Riy mak katu de riy ra'ulia onnila yatnu.#14:24 Yawala Ibrani riwra: “Mak katu re wutnu-laini de re'a-tniaru.” Riy dom de rwarora hadi nnia'eratni de: “Mak katu re kirkira-ralma rior samomuou emekwalima re'a-tniaru la' ira” me riy dom de rwarora nnia'eratni de: “Riy mak katu hota rwalia la riy mak kre'a-ktaru.”
Mere riy podku de riy raho'a-rawanin podaknu-padaknu.
25La'pa mak ktutrier niohora ida naltier lia plola wawannu, de ha nalewn oleka riy mormiorni.
Mere la'pa nputra-npalka de ha nwotra-ntali oleka mutwualli.
26La'a riy maka na'unni-namta'ata Orgahi-Orha'a, de hota mormiorni namtiernu,
me upni-a'nani mana Orgahi-Orha'a Nruwun reria.
27Ya'unni-yamta'ata la Orgahi-Orha'a de nodi mormiori emeknekama gera matni mak kopli-kha'a.
Totpena tahal doini talan mak toktokla me tlewan la matmiati-molmuolu ralamni.
28Ray rurni-laini plolli-mneheni de tamkek nek la limni-rorni liawanni.
La'pa lima-ror hadamonna de hota edonna nodi plolli.
29Riy maka katu de edonna plet pa nawenna.
Mere riy podku de ta'eni nod niana inonni.
30Ralam maka kamtiertiernu, nhi' it inonni pa edonna namehra-namau.
Mere ralam mehra emeknekama nnieni mak khi' agehpa rurni-kliakallu.
31La'a riy maka khi' kalwiedweda a'na riy patyata, de hade na'unni-namta'at oleka Orgahi-Orha'a Uplerlawna Mempulwatnu.
La'pa he' ed maka kterna riy mak kakleha, de hade napolu-naliel oleka Orgahi-Orha'a, yoma mak kakleha-kaplara re E limni enni ir wali.
32Riy yatyat rler la yatyatni-halalli yatlorni-yatra'ani onnila yatni-halli mak kariei. Mere riy samomuou rlernana riuwun genni yoma rwehwa-rlakat la ploini-ple'erni.#14:32 La'a yawala Ibrani de emkadi: “Mere riy samomuou rlernana riuwun genni la' ler maka rler la matmiati-molmuolu ralamni.”
33Kirkira-ralma rior samomuou e nden rer lia riy maka katu kholi-kleta ihranu ralamni.
Mere it edon tlernan ma'ta mak kpodku-kpadku rtarga kirkira-ralma rior samomuou lia ihranu ralamni.
34Rden nek la plol wawna ed mak krana lodna-hairi pa nakota-nanana.
Mere do'a-hala nhi' amola-ma'a kotni-nanni.
35Ray sukni la tniutnu-nhianni nhielli-liarni mak katu kholi-kleta
mere nawenan la mak khi'a mola-ma' e'a onnila edonna ramkek la tulanni-kniarni.
Currently Selected:
Rano'a 14: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
