Rano'a 12
12
1La'a riy maka kirkirni-ralma riorni samoga de sukni riy ra rwale'era ira la'pa rhi'a do'a-hala.
Mere riy maka kpodku de rahmena rpolliohora.
2 Itmatromlawanni Makdenrer die, ralamni nodi rerlia riy samomuou.
Mere la'pa riy maka kna'ohma yatyatni de hota hare nhiakarni niukum lawna.
3Riy yatyata-halala de mormiorni-dardiarni edon namtemna.
Mere la'pa riy maka ralamni nora wniehwani plolioi-plele'era de
ntutrier pit lia genni de edonna nwo'la.
4La'pa patke' mak nhiolli-lietni samoga me ntulla-nkaria la hya'-hya' to'owa de
ed maka khi'a muanke'eni pa nanni samoga.
Mere patke' mak khi'a mola-ma'a muanke'eni de
emeknekama nnieni mak khi' agehpa rurni-kliakallu.
5La riy ploloi-plele'era nhi'inde rwarora-rwalaiya ha samomuou maka hota riwra rhi'a.
Mere la'pa riy yatyata de rwarora-rwalai nieka ohpa-lahara klili-kdiori.
6Riy yatyata nurnu-tiernu de emeknekama mak e rwuw rer lia talan letgara totpena rwunu-rwenna rira.
Mere riy plele'era lirni nodi rira la yamori-yalewna.
7Riy yatyata hota rtuin de rakleh lira-wawa memnu-tatra.
Mere la'pa riy samomuou de, hota riy edon rawo'la ir la genni
me nodia pa duratni-waitni emkade wali.
8Nhi'inde ra'uli-rawedia riy mak katu yoma la'a kirkira-ralma rior samounu,
mere riy maka ralma-riorni nkoili-nkaili de hota e rapolu-raliella.
9La' samomuounu de tla'a lima-rora mere ita kniarni etla,
mere yana tutga it inonni emeknekama maktaru mere takleha ya'ana-yemnu kupna-kai.#12:9 Riy dom de rwarora ayat di emkadina: “La' samomuounu de tla'a lima-rora mere it hopopanni-lili'irnu id edama, mere yana tutga it inonni emeknekama maktaru mere takleha ya'ana-yemnu kupna-kai.”
10La'a riy samomuou de namkek la nhiurni-wnia'anni.
Mere riy yatyata nmaklekla-nmakdiain to'owa.
Raplinu-raplo'a la wniehwa-liakat mnapla.
11Mak kahnyi'a klialli pala penga la ya'ana-yemnu.
Mere la'a riy maka khi'a-kyapia hihi'a-yapyapi mak edon kperkuna de podaknu neee!
12La'a riy dodo'a-halala de e riwra ra'ala riy yatyata-halala dom unatnu.
Mere la'a riy samomuou de emekwalima ora-au lialawan maka uhwanu nwalapi
me ga'arni nwahipni pa wo'oni na'unu-nayeha.
13La'a riy yatyata re de nhi'inde lira-tunu yatyatni emek toktokla pa na ntokla inon wamueheni.
Mere la'pa riy samomuou nler la susa ralamni de hota Uplerlawna Nalewan nan ira.
14Riy rlernana yara'a-yapalu edon nhal la la'a e lirni-tunnu mak ksamomuou
pa emeknekama la'a riy maka klernana siewni-kaini de edonna nhal la la'a tulanni-kniarni.
15Riy mak kpodku natniekame hya' ed maka nwarora-nwalaiya de naplol olekwa.
Mere la'a riy mak katu de sukni natlina lira nnio'a-wawa niatu.
16La'pa riy rapolu-raliella riy mak kpodku de pleta-plet pa rawenna.
Mere riy mak katu nodia inonni, edon rawenna la'pa riy ramola-rama' ira.
17La'pa riy ploi-plele'era de ntutrier nohora (saksi) de nakot nohor neka hya' ed mak kaplola.
Mere riy yatyata ntutrier niohora de nakota nohora kdiori-kdieha ohpa-lahara.
18La'pa ita edon twarora-twalai pa taltieri-taltiani de it lirni de emeka nhior lawar kokoki-tawta'wa la rira ihranu ralamni.
Mere la'pa riy mak katu de ir lirni-tunnu re emeknekama koda atiap maka ha rala rwatunu-rwatah'a nnieni-nhiena.
19Ohpa-lahara de hota pleta-plet pa riy rat niohora.
Mere la'pa lira-tun mak kaplola de hota riy rhoratreria pa nodi liarni.
20La'a riy maka kna'ohma yatyatni-halalli, de ralamni nhoratreria kdiori-kdieha ohpa-lahara.
Mere he' ed mak kahak totpa rimormior wialli re rmori-rdar lia kalwiedwedni, de nden rer lia ralam yaheparnu.
21Riy plolioi-plele'era de hota edonna nler la kropna-krieutu.
Mere rimormiori yatyata-halala de nler la yatyatni-halalli yatlorni-yatra'ani.
22 Orgahi-Orha'a Nagai pietan la'a riy maka kputra-kpalka ohpa-lahara.
Mere ralamni nahepru la riy maka kwehwa-klakat rer lia ploi-ple'era ralamni.
23La'a riy mak katu de edonna nwarehia lirni-yatnu.
Mere riy podku de nwarehia podaknu la' meni-meni to'owa.
24Kniari werwerta de nhi'a rira pa rodi plolli.
Mere riy mak kpamalsa hota rwalia la hopopna-lili'iru.
25Ralma-rior maka kworworga de nhi' rira pa ralamni nmolu-nhelam reri.
Mere lira-tun samomuou nhi'a rira pa rahmuakru owa'ana.
26Riy ploi-ple'era ntutga talan plollola la rimormior wialli.
Mere riy yatyata de nler la klierat lawna yoma la'a hihi'a-yapyapi maka kyata-khala.#12:26 Lir di la'a yawala Ibrani de nnia'eratni woru-wotelu. Riy dom de rwarora ayat di nnia'eratni de emkadi: “Riy samomuou rlernana ya'unut lawna de rareh dioinia riy dom to'a.” Mere riy raplin niohora ayat di nnia'eratni mak kaplollola
27He' ed maka kodi rer nieka inon weratni de hota edonna nlernan walia hya' maka ha nahniar niana.#12:27 Riy dom de riwra ayat di nnia'eratni emkadina: “Riy pamalsa re inon nwerta la kniari pede rahmena rwatunu-rwatah'a ha'anna maka ir rlernan oleka wa.”
Mere mak kape'el la kniari de hota riy de nlernana re'a-tniaru.
28La'pa he' ed maka khapar reri plollolli, de hota nlernana mormiori-dardiari.
Mere he' ed maka sukni la loi-talla koili-kaili de e nla' pa nler tar lia matmiati-molmuolu ralamni.#12:28 Riy dom de rwarora ayat di emkadina: “La'pa he' ed maka khapar reri plollolli, de hota nlernana mormiori-dardiari. Yoma he' ed maka sukni nlola loi-talla mak kaplola de nharan rer lia mormiori plalahwa pa nodi liarni.”
Currently Selected:
Rano'a 12: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
