Dan. 7

Daniel namkeka hamormiori wogata la mi'ini ralamni

1La' mela ida la ler maka Belsyasar nla ma'ta ray, de la' anni maka na'nama nte'ela kniarni la Babel, de Daniel a'g e unina'u la lewu wawannu na'nama a'g e mui'a, pa aliernan yamkeka ida. Mi' de aghorat targa de emkadile:

2La a yamke'ku ralamni de anin lawna mak kodia kakmoranni nten liola etnu-liolli#7:2 La' yawala Aram la Puka Lululli la' ululu de riwra anin di de nwatiawua ra'i, tranna, warta me tipru. pa nhi'nande nayo'ora-na'anin la hletan lawna-yoir lawna de. 3Nhor nioma hamormior liawna matmiati-molmuolu wogata e rlergot la hletna letgarni, de idma edonna namnehela ida.

4Mak kala'ulu, emeknekame singa, mere nnairia ih liwra. La'pa a'g e umkeka noma plinu-plinnianama liwarni ratlieh dioin la me lakni woru nayarir lia heyanna totpa ntutrieri emeknekama rimormiori, noma rala ralma-riora rimormiori la.

5Na'nama hamormiori wornu de nayamkeka. Hamormior di emeknekama beruang. Ntutrier die nnairia lak li'irnu, me tamkek nan memna ha ruh'u wotelu e nho'wa rer lia pa nayamkek la nihini letgarni. Utlin de lira e nakot la niwra: “Mlia' pa mu'un toto' memna ha'ihi-ha'anna lawanni maka o sukmu!”

6La'pa a'g e umkek rer mia'ta de hamormior id owa'ana nmai. Yamkekni de emeknekama oh dawra mak nhi'inde nlol au hananni (macan tutul), mere la onni wawannu de ma'nu liwarni wogat erla, me hamormior die o'tani wogata. Hamormior di de rala pa nodi plolli.

7La'pa a'g e umkek reria dewade hamormiori id owa'ana nma nayamkek wa. Hamormiori di to'ama la'a hamormior miak kala' ulu re wotelu. E nodia dudallu termida ne naruri-nalai miemna. Gaini yota-yata pa nayamta'ata. Ne nihini re petna-petna pa tehrani emeknekama mnotna, pa nala naut mkokoha-mnanannia maka ha nlihira-naiya. Me nwatei-nwahapra mak ha na'an atrea.

8La'pa a'g e lili-lioh ma'ta dudallu re dewade plinu-plinnianama dudallu ida nmori owa'an la. Dudallu de kuku'a, mere nwakdieh'a pa nleh dioinia dudul mak kmori ulu re wotellia. Dudul ku' de nodia matni de emeknekama rimormior matni, me nodia nurnu pa nakot nohora mamainia e tullu-petanni.

Yamkeka la E' maka kmori plalahwa

9La'pa a'g tiepartarlia umkeka de:

Er re'era-rtatra liwangeni-mtatangeni wo'ira-wo'ira. Dewade Uplerlawna makden la' ululu meman pa la'pa nodi liarni de Namtatna la liwangeni re ida. Naniayarni nora moratnu de wawahra emekneka me ah'wa yakidma. Liwangen die nodi rodni pa nora rodni re rdudmu-rlairi, yoma ai lomarni. 10Me ai mormioria lomarni nlergot la liwangen die pa nwawuau emeknekama ger wawuau. Makalima-kalaka E'a re riwnu-halli. Hopopanni-lili'irnu yuta-yuta rtutrier lia E gaini ralamni totpa rlernohora E lirni. Nhor nia'nama mak ktorna watghudi lokarni-tatiaili lahannu (hakim-hakim) rewre'wa pa ramtatna la nhio'ota-liewta la, me rwe'er doinia puka-puka re wa.

11La'pa a'g e tiepartarlia yamkekni, a'g e utlin rer dudul ku' de yoma e nakot nohora inon wamueheni niwra e de de mak kreh niana hare honona. Noma rwenna hamormiori mak kmai pia wogatni de me rnaklia la ai ralamni pa nmutni-nki'ira. 12Me hamormiori re korni de ralernia la mtatangenni wawannu totpa edon rodi plolli owa'ana, me rala pa rmormior mia'ta la'a tuwu maka ha reti olek la.

13La'a yamke'ku ralamni, la' mel de, de a'g umkek nana emeknekama rimormiori ida#7:13 La'a yawala Aram la Puka Lululli la' ulul de riwra “rimormiori a'nani”. La' pa ntutu-nte'ela Yesus lerni de nhi'inde e Nwet la inon wamueheni de Niwra: “Rimormiori A'nani”. nmai. La'pa nmai die nodia kakma nwatiawu la lyanit tulu. Noka rod tiemna la Uplerlawna makden la' ululu meman pa la'pa nodi liarni de, gaini ralamni. 14E' de ral oleka ya'uli-yawedi nora tniorna-riautu pa emekneka ray pede rimormiori noheri woru-lyanti nayanni rkola tieru-rawur nehla la. Hare e rwatiawua nohkeran di lodanni-hairni honona, la'pa noh pa'etu-rai piatatra nora leta-leta ror wut nieka wniareini-wniahaurnu. Ne hota e nodi plolli pa nodi liarni. Lodanni-hairni mana hota edonna niata mere nawniau kdededa pa nodi liarni.

Rakot nohora Daniel yamkekni de nnia'eratni

15Maka umkeka re de aghakomu-ghakam nohora me a ihru ntepul wenna. 16Dewade alia wuakriania riy ida la riy harahu mak ktutrier lia hande pa a'utian nohora hare honona nnia'eratni.

Noma nakot nohora hare honona mai a'u. 17Niwra: “Hamormiori mandadata matmiati-molmuolu re, de hota lodna-hairi wogata raprir lia'a noha wawannu. 18Noma Uplerlawna-Mempulwatnu Makden la Tutullu-Lolo'oni Nala rimormiorni totpa rlernana tultul geni pa rodi plolli-mneheni me hota tnioranni-riautnu edon nhoru eti.”

19Nhor nioma a'uhak pa gat niohor walia hamormiori miaka kmai pia wogatni de mak to'a la'a hamormior mak kala' ulu re wotelu, mak gaini yota-yata me nayamta'ata me maka knairia idma (kuku) pi'rani me niha mnotanni pa naut amkoha-mnanin targa ha ihi maka ha nlihira-naiya me la' walia nwatei-nwahapra mak ha na'an atrea. 20Me agiwra gat niohor walia la'a dudul termida makden la o'tani me la' walia dudul ku'uni maka na'nama kmor die, noma na nlehga dudallu wotelu mak kmori ulu re. Dudul ku' de nnair matni me nodia nurnu pa nakot nohora mamainia e tulanni-petanni. Itamkeka de it wullu rapriri yoma lol to'am la dudallu re korni#7:20 La' yawala Aram riwra: Itamkeka de narehi-nalawna la dudallu re korni. 21La'pa a'g e umkek reria de e nora Uplerlawna rimormiorni rtepartarlia ya'ara, ne nal ir la' yawa. 22Nhor nioma E' makden la' ululu meman pa la'pa nodi liarni de, de Uplerlawna-Mempulwatnu Makden la Tutullu-Lolo'oni, Nmai pia Ntutga ralam kalwiedni la E rimormiorni. E Netlia totpa E rimormiorni re hota er maka kal ir arwalli de la' yawa yoma nte' olek la' lerni-melli pa ir rlernana plolli pa rtorna-raut wua.

23Noma nakot nohora hare honona mai a'u, niwra la'pa hamormiori mak kmai pia wogatni de hota hade de lodna-hairi mak re'eni wogatni inhata makden la nohkerna wawannu de lol to'ama la'a lodna-hairi korni. Lodna-hair de ed maka kwakoha-kwanannia me nwatei-nwahapra riy mak kden la noheri woru-lyanti nayanni. 24La'pa dudallu termida re de ray termida maka hota rodi plolli la la'a lodna-hair de. Nhor nioma hota ray id to'a mak kmai owa'ana, de lol to'a la'a ray miaka kala'ulu re, ne hota e' ed maka kala ray wotelu re la' yawa. 25Nhor diewade ntutga tullu-petanni pa nalernu-naha'ana Uplerlawna Makdella Tutullu-Lolo'oni, me nutni-ndahla Uplerlawna rimormiorni wali. Hota ray die nahak talan pa nherun doini deulu-tatra nor wutga he'i-hepur la lerlalawna maka Uplerlawna Nakottarg oleka pa rimormiorni rhi' nana. La' walia ray die nodi plolli la Uplerlawna rimormiorni la'a anni wotelu rehenu.

26Dewade maktoran tatiaili Ilyamou-Watyatoha hota rle'lu mei totpena rwakloliernia la tnioranni-riautnu nanpena rhi' amkoha-amnannia. 27Nohkerna rurni-laini nor wutga preheni-mkaini de hota Uplerlawna Makdella Tutullu-Lolo'oni Nala la E' rimormiorni. Hota ir er maka kodi plolli la Uplerlawna lodanni-hairni de pa edonna nla nhoru. Ne hota makodi plolli la nohkerna wawannu honona rma rodia inonni la de ratu rhu'ru-rhelam E'a.

28Emkadella a wniahauru nhoru la'a maka aliernan de. A ih'ru ralmu wolwo'la pa nhi'nande A ga'yu lakputputi mere a'g edonna ukot etia hadilla la' riy ida.

Currently Selected:

Dan. 7: LEX

Highlight

Copy

Compare