Dan. 2
2
La'a Nebukatnesar mi'ini
1La'pa ray Nebukatnesar nodi plolli la anni worwua. La' anin de ralamni dewade enmi' pa nhi'nande ihranu ralamni nden rer lia yamta'ata pa edonna nanin matni la mela-mela. 2La' hade pede npolgawoka riy maka nhi'inde katu kakwie'eta mi'a-lo'a, makatu khi'a ukru-rehera, maka kat niohora lira-yatu nohkerna me mak kala' talla, yoma ray niwra namkek teka la'pa ratga hya' ed maka enamkek nana la' mi'ini ralamni me' edonna? La'pa honona re rtutrier lia ray gaini ralamni 3na'nama ray nakot la re niwra: “A'g mui'a mere a'uplin niohor ma'ta nnia'eratni pede a ralmu emeknekama ha wniayata-wnianaga.”
4Noma rawala Aram#2:4 La' onni (pasal) 2:4 la'pa nsampe la' 7:28 Puka Lululi la' ululu gahani de rhorta de rnairia yawala Aram, nhor diewade rhorta ayat-ayat korni la' yawala Ibrani owa'ana. pa rakot la ray riwra: “E! Mmuormior lia genmu pa naplahwa tune!! Mukot nohora teka mi'imu de mai ami totpena amakot nohora nnia'eratni.”
5Noma ray nakot la re niwra: “A orgah'u ukot oleka totpa mikot teka hya' ed maka amui' nana me mikwie'eta nnia'eratni. La'pa miplinu mhi' nana de hota aghopan pa rte'ta-rtah'u hononmi me la' wali miy rommi-lepmi mana rwo'dodoinia la. 6Mere la'pa mimpiet nana de hota agala a limtu'tu maka samomuou muemna, me aghi'a pa riy honona ra'unni-ramta'at miy. Nah! Mikota teka mai a lia' dodo'ondi! Hya' ed maka amui'a me emkamenila nnia'eratni?”
7Noma honona re rwak la riwra: “Mere matro'mu nakot nohor teka mi'ini dena! Totpena amakwie'eta nnia'eratni.” 8La'pa ray natlina lirni re noma ray nakot la re niwra: “Agat niohora mikot emkade onnila mihak talan totpena yana pleta-plet pa agukum miy emeknekama a'ukot oleka de. 9Plola pa hota agiwra gukum mneneha miy hononmi yoma takeni mpie'er nana mi' de nora nnia'eratni mai a'u. Mimlia' oleka lir id wa totpena mimpiakdior a'u. Yanpa mimpiarora de hota orgah'u gherni owa'ana a li'ru maka aukot hota agukum penan mi re?! Hoi mikot teka mi' de mai a'u totpena agatga de plol toto' pa miat niohor walia mi' de nnia'eratni!”
10Noma makatu kakwieta mi'a-lo'a wtiona honona rwalolla ray riwra, “Hota la'a rimormiori mai nohkeran di wawannu de, riy id mana ta'enniana nwalol nohor nana tun ray wakwakni de. La'a ray mieni tullu-petanni mai noh di wawannu ho'mana edon nwak emkade la'a makatu kakwieta mi'a-lo'a, makhi'a ukru-rehera, la'pa mak kala' talla makdella e istanni ralamni. 11Tun ray wakwakni de ta'enniana rwet nana. Enekneka uplera-upmati maka makden Babel ita tpesiaya re rat niohor hare honona, ne uplera-upmati re edonna rden wut lia rimormiori it temanni pede ta'enniana tatiana ira.”
12La'pa ray natlin tutga mak ha rakota re dewade ray nwunga limni la mei, ne nhopan pa rwunu-rwenan momuoga makhi' ukru-rehera la'pa makatu re honona la'a Babel. 13Noma marinyu nhaun lola Babel etnu-liolli pa nakot nohora ray lirni, niwra makatu re honona hota rwenna. Pa riy rla' rwahak Daniel nora mutwualli re mana totpa hota rwenan walia re.
Uplerlawna Nakot nohora mi' de nora nnia'eratni la'a Daniel
14Dewade Daniel nwarora-nwalai mtatah'a na'nama nla nahaka Ariokh pa niwra natian nohora hya' maka kariei piede ray niwra nwunu-nwenna. Mere Daniel nwatrom nana Ariokh nora makodi keki-rautu la' talan letgara pa riwra rla' rwunu-rwenan rira. 15Daniel nakot la Ariokh niwra: “Ei! Hya' nrei pia ray nalgota tit panpahna dina?” Noma Ariokh nwahauru momuoga hya' maka ray nakot oleka re honona wa. 16Dewade Daniel nla pa nwak la ray totpena nelga lera-mel maka hota ralharia mi' de nora nnia'eratni.
17Daniel wakwakni de ray nreiniana, noma Daniel nla'awa romni la'pa nwahaur nohora hare honona la Hanania, Misael, me Asaria. 18Nhopan pa honona re rsumbain la Uplerlawna makdella Ilyamou-Watyatoha totpena Nhuria ralma kalwieda-paitiotni la ira pa rakot nohora mi'a-lo' de yade'eni. Totpena la hade pede yana ir ror wutga makatu re korni rler la niukum matmiati.
19La' mel de nekpa Uplerlawna Nalharia lira kniukum della la'a Daniel la' mi'ini ralamni.
Dewade Daniel na'uli-nawedia Uplerlawna makden la Ilyamou-Watyatoha pa nakot la 20niwra:
“Orgahi-Orha'a Uplerlawna-Mempulwatnu O' ed mak kodi plolli la haneka-harah wuawannu!
O kirkirmu-ralma-riormu wniatetmu-wnianehemu narehi-nalawan memna.
Omdien rer lia ya'uli-yawedi la'a tullu-lyanti pa nodi liarni.
21O' ed mak kodi plolli la lera-mela wenu-wolla.
O' ed maka kwaliernia riy maktoran lodna me mak krana mak krautia hairi.
O' mana ed mak kala ralma-riora la rimormiori. Yoma la' O' pede rira o'ta-kriahlanu re yeher to' pa naphyar wia pede rat niohora hya'-hya' to'owa.
22O' ed maka kakot nohora lira kniukamnu maka riy raplin niohora ma'ta.
La'pa hya' mak kayawunum ma'ta ho'mana, Omuat niohora momuoga re.
Yoma hare honona re rahniari momuou lia O'a pa Mualharia la rimormiori.
23Uplerlawna maka u'pu-tga'ru ha rhoi-rta'nu ne! A'g e u'uli-uwedia O'a
yoma O' ed mak kodi plolli la haneka-harahu wawannu!
La' dodo'ondi de Omhi' olek a o'tu naphyari pede agat niohora hare honona.
A wuakwak mamni la O' de Ompuahla nan oleka wa.
Yoma la'a ray mi'ini maka amiwra makot nohora la' ray mana, Omtiutg oleka la mai am pia.”
Daniel nalharia ray mi'ini de me nakot nohor walia nnia'eratni
24La'pa nhorwua noma Daniel nla'a Ariokh. Ariokh di maka ha rtutmuat oleka pa hota kwunu-kwenna maka katu re la' Babel. Noka Daniel nakot la Ariokh niwra: “Yana mpunu-mpuenna riy makatu re. Miodia a pua tla'a ray die yoma agiwra ukot nohora mi' de la'a tun ray die.”
25Dewade Ariokh leretniekla nodia Daniel pa nla ntutga la ray Nebukatnesar noma nakot la niwra: “A'g e liernan oleka riy id la'a riy Yehuda maka ha rhoplial taru mai Babel di. Hota e nakot nohora tun ray mi'ini-lo'oni de!”
26Noma ray nakot la Daniel maka nhi'inde rwet nana la Baltasar niwra: “Oi! Hota plola pa muatu mukot nohora hya' ed maka amui' nana me mpue'er nohora walia nnia'eratni mai a'u?!”
27Noma Daniel nwahla ray lirni niwra: “Am ray! Riy makatu, de makatu khi'a ukru-rehera, makala' talla me maka kakwieta mi'a-lo'a, id mana ta'enniana rwe'er nohora tun ray mi'ini.
28Mere Uplerlawna-Mempulwatnu mak kdella Ilyamou-Watyatoha de ed maka kwe'er momuoga hya' maka kayawunmu re, me E' ed maka kakot nohor wali oleka hota hya' maka tuna ha nlernana la' ler maka kmai nieka. Pa la' dodo'ondi de tuna nwayow nan a' pua ukot nohora hya' maka tun ha nmi' nan oleka re wa. 29La tuna nanina noma, Uplerlawna, maka kalharia hya' mak kayawunum ma'ta la' rimormiori de, Nala pa tuna enmi' nana la hya' maka hota tuna ha nlernan la lera mak kmai nieka.
30Mak kayawunmu re de Uplerlawna Nakot oleka mai a wua mere edonna Nhi' emkade yoma a riehi nohkeran di mniotni honona la'a lira-yatu, mere totpena tuna nat niohora mi'imu de nnia'eratni maka tuna ta'eni nwaror nan de.
31Hadi ed maka tuna ha nmi'a. Maka tuna ha namkek la mi' de, de la'a tuna gaini de tuna enapal reria atiehra (patung) ida. Atiehra de sapon lawanni me nlipa-nka'ma mere herni-gaini nhi' it wullu pa napriri. 32La o'tani de rhi' nana la maha ihini. Ihranu nora limni mak sapon de rhi' nana la mah wawahra (perak), apannu nora nehlani de rhi' nana la pi'ra tnieri. 33Kowarnu de rhi' nana la mnotna, me lakni oke' de rhi' nana la mnotna me oke' de rhi' nana la tan miera. 34Mak tuna ha namkek tertehra de, de watu tpo' lawna id maka kadwo' doin la, mere riy limni enni atia'a hade. Na'nama wat die nwaklolierun pia nutni mkokoha atiehra de lakni mak ha rhi' nana la mnotna me tan mier de. 35La'pa mtatande nekpa atiehra de namkokohola genni pa naniutni-namdieran nohora mnotna, tan miera, pi'ra tnieri mah wawahra, me maha ihi maka kwali olek la eni-tani emekto'ama metma watra lawna kownu nniutni-mdieran genni la'a lerwarnu lerni. Kownu naniutni pa nwal tio'ola haga'u-hamda'ar maka anni ha nten dioinia la pa nakleh lu'wu-makmu. Mere wat tpo' lawna maka kwaklolierun pa katpie'era atiehra de nwalia wo'or lawan maka napen niana noheri woru-lyanti nayanni.
36Hade ed maka tuna ha nmi'a pa la' dodo'ondi wal pia agiwra ukot#2:36 La'a yawala Aram de riwra “amiwra makota”. nohora nnia'eratni la' tuna. 37Tuna, o di de ray mak karehi-kalawan la ray honona makden la noheri woru-lyanti nayanni. Uplerlawna makdella Ilyamou-Watyatoha ed mak kala lodna-hairi plolli-mneheni rurni-laini tiy o'a pa riy honona rhu'ru-rhelma ratota-rawa'wu.
38Uplerlawna Nhi' o' pa muodi plolli la noha-rai honona la noheri woru-lyanti nayanni, maka kpenpuen niohora rimormiori nor neka onu-ma'nu me nhiuri-wnia'ana mak kala lakni, la'pa mak kawrika-kawriai kawlola-kawniai'ti, me mak kpora-kdawra. Tuna inon muanmuannu de, emeknekama mah makden la la'a atiehra sapon lawan de o'tani.
39Mere la'pa ompuair wa, demade ray mak kodi plolli la lodna-hair (kerajaan) dom to'a nmai pia rhernu-rwau o'a mere edonna naruri-nalai emekneka tun ray la' ler maka nodi plolli ma'ta. Lodna-hairi de tuna namkek nana la mi'imu de ralamni emeka maha wawahra (perak). Nhor demade ray id owa'ana, mak kodi plolli la lodna-hairi (kerajaan) dom to'a nmai pia nhernu-nwaga. Lodna-hairi de tuna namkek nana la' mi'imu de ralamni emeka pi'ra tnieri la'a atiehra de pa hota hade makodi plolli la nohkerna-raimiaran di wawannu. 40Nhor demade ray id owa'ana, mak kodi plolli la lodna-hairi (kerajaan) dom to'a nmai pia nhernu-nwaga. Lodna-hairi, de naruri emekwali mnotna pa nwakoha-nwanannia hya' to'a. Emkade pede nwakoha-nwananni mtialta'ala lodna-hairi mak kala' ulu re 41Nhor demade ray id owa'ana, mak kodi plolli la lodna-hairi (kerajaan) dom to'a nmai pia nhernu-nwaga. Lodna-hairi di tuna namkek nana la mi'imu de ralamni emeka atiehra de lakni nora okarni maka oke' de tan miera, me la oke' de mnotna, ha ntutga de hota lodna-hairi de rahniakra. Mere hota ruri-lai oke'a ed ma'ta la'a lodna-hair die emeknekama mnotna maka e nawaha' ma'ta tan mier de. 42Lakni okarni oke' de mnotna, oke' de tan miera pa hota nnia'eratni de lodna-hair de la' lera dom de itamkeka naruri, me ler dom de nakleh ruri. 43Mnotna nawniah'a wutga tan miera nnia'eratni wal die, hota makodi plolli la' lodna-hair de nahak totpa rurni-laini na'ititar rer lia pede rla' pa nora o'ta-mata marna-wuhura dom to'a rmehlima, mere emkade ho'mana hamamuamua, emeknekama mnotna nora tanmiera, de hota edonna rwakulit wutu.
44-45Noma tuna orgahani namkek memna la' mi'imu, de wat tpo' lawan id maka riy limni enni atia'a me?! Wat tpo' lawan de nwatiawu wo'ora pa nwaklolierun na'nama nwunga lola atiehra de, de nutni amkoha-amnanin wutga la mnotna, pi'ra tnieri, tan miera, maha wawahra, nora maha ihi maka ha nawniah'a pa rhi'a la atiehra de. Watpo' lawan de nnia'eratni de, Uplerlawna makdella Ilyamou-Watyatoha hota Nariria lodna-hairi id owa'ana mak hota nayarir pia nodi liarni. La' lodna-hairi id mana edonna lola lokarni. Lodna-hair de hota ed maka kwakoha-kwanannia lodna-hairi re honona pede nawniau kdededa pa nodi liarni.
Tuna, Uplerlawna Mak kodi plolli ed maka ktutu-kte'a harella la'a tuna, yoma hota la lera ida, de ramkek memna de! La' mi' de plol toto'a pa emkade, ne a yakwie'etu mana plola mdududga la geni.”
Daniel nlernana yawahla la ray
46Dewade ray Nebukatnesar nwaltiora-nwaltieman la'a Daniel gaini ralamni, na'nama nhopan pa riy rhu'ru-rhelma Daniel de rala nhiurliwtu-wnialodwa me wu'ru hup mikmikarni la e'a. 47Noma ray nakot la Daniel niwra: “Daniel ee! Plol toto' pa O Uplerlawanmu de ed makodi plolli la mak riy nhi'inde rkola tieru-rawur nehla me rhoi-rtania re honona. E' mana ed mak kodi plolli walia la'a ray-ray re honona, me E' nanpena ed mak kalharia hya' maka kayawunum ma'ta re honona la' rimormiori, pede Nakot nohora hare honona la' tuna totpa tuna nat niohor memn oleka. Ne onnila o'a pede agat niohor meman de Uplerlawna Nmeh'a ed mak kodi plolli la haneka-harah wuawannu.”
48La'pa nhorwua noma ray ntutmuata-rkewra'a Daniel pa nre'ela naliwna-namtatan la ina-am leta me rwaro'ona hya'-hya' honona maka wel wierwerat la me nrana pa la'a gubernur Babel me la' walia makodi plolli owa'an la riy honona maka nhi'inde kano'a-ka'at lia la'a ray kruwungeni (istana). 49Mere Daniel nwak pa ray nala Sadrak nora Mesak, me Abednego pa rtorna-rraut wualia la propinsi Babel, ne pena Daniel nmeh'a nden la ray kruwungenni (istana).
Currently Selected:
Dan. 2: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
