Dan. 10

Daniel yamkekni la'a gerlawna Tigris aratni

1-3La'pa anni wotel lia ray Koresy nodi plolli la Persia, de Daniel a'u maka ha rwet wali a lia Beltsasar aliernan nnio' id mak kwatiawua Uplerlawna. La'a nnio' de de hota plola, mere nnia'eratni de tsakomu-tsakam niohora. La' ler de awuaror la'a-maiya#10:1-3 Makatu Puka ho'mana raplin niohora nnia'eratni mak kaplollola. La' yawala Lgona la' ayat di de nlernohora BIS: “nnia'eratni de tsakomu-tsakam nohora” mere TB niwra: “sniusa ralamni”. Riy dom de rwarora lir di nnia'erit nana: “ya'ar lawna”. mere auplin niohora ma'ta nnio'a de nnia'eratni. Pede a ralmu nmawal doin la krei wotel rialamni. La'a ler penpuenu re de a'g edonna una-gemnia mikmikarni-lamliamni, la'pa ha'anna onde anggur turnu me nhiola-knia'ata a mortu nek de edonan wali. La' hohoni aliernan nnio' de nnia'eratni la'a yamkeka id ralamni de emkadile:

4La'pa la'awa lera-melli terampworu weh'rani wogata la' wolan yanulu la' anin de#10:4 La wolan de makden Yahudi re nhi'inde e rhoratreria ir tuini-wedni la ler maka Uplerlawna Nalewan nan ir la' Mesir., de a'g e tiutrier lia' gerlawna Tigris aratni de. 5Plin-plinnianamde a'umkek nana riy id de nnairia naniaria koka mnurnuhru, me rewa maha molanni. 6Inonni liplipa-kamka'ma pa emeknekama wat mi'na permata. Gaini reparni emeknekama hita-tlena me matni lomarni-dayani emeknekama ai mormiori. Limni-lakni pihrani, de nmo'a-nmar pa emolmolla pi'ra tnieri maka kmomuou muemna me nhar lirni de emeknekama rirahu lirni.

7Amuemeh'a ed maka kamkek nan to' yamkek de. Riy mak kor a'u, la riy id mana edonna namkek nana de mere rawlar momuou pua rade' inonni yoma ramta'at wenna. 8Ne nal tar amueh'a pa umkek reria yamkek maka hedhedga riy ihranu ralamni de. A ino'nu nmatlawar ne a ga'yu lakputputi. 9La'pa utlin lirni dewade ga'yu nmokal pa uplinga halolola. A'upru'wu tar lia yaw de a'ukow lia tani wawannu.

10Noma u'eram reria riy lima ida e nlok la ino'nu, na'nama nhi' a' pua umat de awualtior a li'mu-la'ku la e gaini ralamni. 11Dewade Uplerlawna hopopanni-lili'irnu de nakot ma'u niwra: “Daniel, Uplerlawna Ensayn reri o'a. Mumat pa muprir dioin la me mtia'wa tlinmu la a li'ru-tu'nu ri yoma Uplerlawna Nhopan pa amua ukot nohora hadi tiy o'a.” La'pa nakot lir de, de a'g e tiutrier niekpa diwra-dia'ala.

12Noma nakot mai a'u niwra: “Daniel, yan mumta'ata. Yoma Uplerlawna Nheri tlinni-nwali matni la o sniumbainmu la'a lera yanullu maka omhu'ru-mhelma lol yawa pa mutatahan lara#10:12 La'a yawala Ibrani de riwra: “omhu'ru-mhelma lol wawa”. Daniel ntutga ralamni mak emkade yoma natatahan lara me nsumbain rer lia pa nwaka tniulan la Uplerlawna. me ompuak la E'a totpena E Nhi' o ralma-riormu pa naphyari. Pede a'g e muai di, totpena a'ukot nohora hya' maka ompuaka re. 13Maka ha riwra noha utnu-liannu (roh jahat) makodi plolli la Persia lodna-hairni de nhi' yawuhi-yawe'et la mai a'u la lera terampworu wehrani id ralamni. Noma Mikail maka khi' o'ta lawanni id la Uplerlawna lili'irnu-hopopanni re nmai pia ntulan la mai a'u. Ntulan mai a'u noma agaltarga e la' Persia nor wutga makodi plolli la' hande, na'nama amuai.#10:13 Riy dom rwarora ayat di nnia'eratni de emkadi: “Mikail maka khi' o'ta lawanni id la Uplerlawna lili'irnu-hopopanni re nmai pia ntulan la mai a'u yoma raltarg a lia hande nor wutga makodi plolli re la' Persia”. 14Amuai die agodia nnia'erti la o'a, la'a hya' maka o hair wialmu hota rlernana. Yoma yamkek di de nakot nohora la'a lera-mela maka kmai nieka.”

15La'pa nakot nohor hade, de awualtiora-wualtieman la e'a mere a lirta'a-wawta'a. 16Nhor nioma lili'ru-hopopan id maka emeknekama rimormiori nalgot limni pa nheik la a niwtu. Noma ukot la agiwra: “Tune, yamkek di de nhi'nande a ralmu nmaduka-nmadak rehia la'pa aruple'a ntai a' pua a' ino'nu nakleh et miemna ruri-lai. 17Aghi' emkameni totpena agora tuna matlieri?! Yoma a'g emolmolla ata-wa'ar maka ktutrier lia upni matromni gaini ralamni. A ru'ru-la'yu rhorwua me a arnu la a' irnu mana tututg oleka wa.”

18Noma nheiki owa'an la a' ino'nu dewade u'eram reria a ru'ru-la'yu na'itar la. 19Noma nakot ma'u niwra: “O' ed mak Uplerlawna Nsayn reri o'a, pa yan ihramu nteplu onde mumta'ato! Mutehra ralammu! Murur wia pena!”

La'pa nakotkot rer mia'ta lirni de, dewade a'ueram reria a ru'ru-la'yu yeher to'ama na'itar la pede ukot la giwra: “Awuaka pa multieri tuna! Yoma tuna nal oleka ruri-lai mai a'u.”

20-21Noma nwalol ma'u niwra: “Omuatga de hya' ed mak kariei piede amuai o dina? Amuai die totpena ukot nohora hya' ed maka ha rhorat targa la' puka la'a hare honona maka plol tot'a pa hota rtutu-rte'ewa. Nhor diewade a'uwal wia totpena agora maka ha riwra noha utnu-liannu (roh-roh jahat) makodi plolli la Persia lodna-hairni ama'ara. La'pa nhorwua demade maka ha riwra noha utnu-liannu makodi plolli la Yunani hota nmai pa agora ma'ara wali. Eneknek to'ama Mikail Uplerlawna lili'rnu-hopopanni maka katiak reria o hairmu Israel de ed mak ktulan la mai a'u.”

Currently Selected:

Dan. 10: LEX

Highlight

Copy

Compare