ECCLESIASTES 12

1Kanyan nunot yoy Manamalsa yo#12:1 Diad salitay Hebreo say balikas a Manamalsa yo singa say lobuk yo so tanul to. legan a wala ki nid kalangweran, kasakbayan ya onsabi ray magunigon ya agew tan taon ya ikuanyo, Ag ak la manliliket ed sayan bilay. 2Saraya so panaon a say liwaway agew, say bulan, tan saray bitewen et ombilonget la rad matam, tan ag la naandi so oran na lorem. 3Diad satan, onggiwgiw la ray taklay mon angyaagel na bilay mo nen saman, tan onkalug la ray pueg mo. Nangileb-ngileb ka met lad satan kanyan ag mo la nagatgat so kanen mo, tan onkuyep met lay pakanengneng mo. 4Ag mo met lad satan narengel so tanul ed dalan. Singa labat esaes so pakarengel mod ungol na gilingan, odino say togtog na musika, balet nabangon kad oni na manok. 5Ontakot ka ed atagey iran pasen, tan ag mo la nayarian so manakar a mambukbukor. Ompoti so buek na olom, tan kerengkereng ka met lan manakar. Naandi lad sikay amin a pilalek.

Onla itayo ed andi-anggaan a panayaman tayo tan diad saray dalan narengel iray kanta na kaermenan. 6Napoltut so pilak a golunggolung, tan napelag tan nabetag so balituk a lamparaan; napoltut so lobir na bobun tan namekmek so boyug. 7Ompawil ed dabuk na dalin so laman to tan say ispiritu to ompawil ed Dios ya angiter ed sikato.

8Andi-kakanaan, andi-kakanaan, kuay Managpulong. Amin et andi-kakanaan.

Say Segek na Amin da ra yan Nisulat

9Lapud makabat imay Managpulong, ag to tinondaan so nambangat ed saray totoo. Inaaral to ray probirbio, tan inapiapiger ton sinusubok so katwaan da. 10Sinali nen Managpulong ya inanap iray makaligliwan salita, balet katwaan iray insulat to. 11Saray balikas da ray makabat a totoo et singa ra maotuk a baston da ray pumapastol ya ikakana rad panangiwanwan ed saray karniro. Saray atipon a probirbio et mansiansia ran singa saray malmalet a nipanek a pasak. Say Dios a Pumapastol ed sikatayon amin so angiter na sarayan probirbio.

12Anak ko, wala niy sakey a panalwaran. Anggapoy samput na pansulat na libro, tan pakesawen ka na mapalalon panagaral.

13Kayari na sarayan amin, wala niy sakey a nibaga: Pagalangan moy Dios tan onur mo ray ganggan to, ta sikato yay makasengeg na impamalsaan na Dios ed too. 14Sintinsiaan na Dios ya amin iray gagawaen tayo, maung may makapoy, anggan saray ginagawa ed maamut.

Currently Selected:

ECCLESIASTES 12: PnPV

Highlight

Compare

Copy