روملو‌لارا 7
7
شرئعتدن آزاد اولماق
1ای قارداشلار، مگر بئلمئرسئنئز کی، (بونو شرئعتی بئلَنلره دیئرم) شرئعت آنجاق آدام دئری ائکن اونون اوستونده حاکئمئیّتی وار؟ 2مثلن، اَرلی آرواد قانونلا اَرئنه او زاماناجاق باغلی‌دیر کی، او، دئری‌دئر؛ آمّا اَری اؤلدویو زامان، آرواد نئکاح قانونوندان آزاددیر. 3بونا گؤره، اگر آرواد، اَری دئری‌ائکن، اؤزگه بئر آداما اَره گتسه، زئناکار چاغیریلار. لاکئن اگر اَری اؤلسه، آرواد قانوندان آزاد اولور و اؤزگه بئر آداما اَره گتدئیی واخت زئناکار اولمور. 4اِله‌جه ده سئز، قارداشلاریم، مسئحئن بدنئنئن واسئطه‌سی‌ائله شرئعته اؤلوبسونوز کی، بئر اؤزگه‌سئنئنکی اولاسینیز، یعنی اؤلولردن دئرئلمئش اولان مسئحئنکی اولاسینیز، اِله کی، تاری اوچون ثمره گتئره‌سئنئز. 5چونکی بئز جئسمده یاشایار ائکن، گوناهلی هاوا-هوسلر کی، شرئعتئن واسئطه‌سی‌ائله بلّی اولموشدو، عوضولرئمئزده فعّال ائدی کی، اؤلوم اوچون ثمره گتئرک. 6امّا ائندی، اوّلجه اسئری اولدوغوموز شرئعته اؤلوب، اوندان آزاد اولدوق کی، حرفئن کؤهنه‌لئیئنده یوخ، روحون تزه‌لئیئنده قوللوق ادک.
7بس نه دئیک؟ مگر شرئعت گوناهدیر؟ اصلا! شرئعت اولماسایدی، گوناهین نه اولدوغونو بئلمزدئم. چونکی اگر شرئعت «طاماح اِتمه»#7:7 چیخیش ۲۰:۱۷، تثنئیه ۵:۲۱ دمه‌سَیدی، طاماحین نه اولدوغونو آنلامازدیم. 8لاکئن گوناه فورصت تاپیب، بو امرئن واسئطه‌سی‌ائله منده جوربه‌جور طاماحی حاصئل گتئردی؛ چونکی شرئعت اولماسا، گوناه اؤلودور. 9بئر زامان شرئعت یوخ ائکن، من دئری ائدئم، لاکئن او امر گلن واخت، گوناه دئرئلدی و من اؤلدوم. 10بله‌جه بو امر کی، منه حیات گتئرمک اوچون ائدی، منه اؤلوم گتئردی. 11چونکی گوناه او امرئن واسئطه‌سئله فورصت تاپیب منی آلداتدی و اونونلا منی اؤلدوردو. 12پس شرئعت موقدّسدئر، امر موقدّس، صالح و یاخشی‌دیر.
13بله‌جه، مگر یاخشی اولان شی منه اؤلوم گتئردی؟ اصلا! گوناه منه یاخشی شیئن واسئطه‌سی‌ائله اؤلوم گتئردی کی، امرئن سببئنه گؤره گوناهین نهایت درجه گوناهلی اولدوغو تانینسین.
14بئز بئلئرئک کی، شرئعت روحانی‌دئر؛ آمّا من جئسمانی‌یَم، نؤکر کئمی ده گوناها ساتیلمیشام. 15چونکی نه اتدئیئمی آنلامیرام؛ ائسته‌دئیئم شیی اتمئرم، لاکئن نئفرت اتدئیئم ائشی گؤرورم. 16اگر ائستمه‌دئیئم ائشی گؤرورم، اوندا تصدئق ادئرم کی، شرئعت یاخشی‌دیر. 17بونا گؤره ده، اونا عمل ادن آرتیق من دیئلم، منده اولان گوناهدیر. 18بئلئرم کی، منده، یعنی جئسمئمده یاخشی بئر شی یاشامیر. چونکی یاخشی شی اتمه‌یئن ائسته‌یی منده وار، لاکئن اونو اتمه‌یه قادئر دیئلم. 19چونکی ائسته‌دئیئم یاخشی شیی اتمئرم، لاکئن ائستمه‌دئیئم پئس ائشی گؤرورم. 20آمّا اگر ائستمه‌دئیئم شیی ادئرم، اونو ادن آرتیق من یوخ، منده اولان گوناهدیر. 21بله‌جه، بو اصلی تاپیرام: یاخشیلیق اتمک ائسته‌ین حالدا، منده پئسلئک حاضیردیر. 22چونکی ائچئمده‌کی وارلیغیم تارینین شرئعتئندن کف ادئر، 23آمّا عوضولرئمده آیری بئر شرئعت ده گؤرورم کی، عاغلیمین تصدئق اتدئیی شرئعتله موبارئزه ادئر و عوضولرئمده اولان گوناهین شرئعتئنه منی اسئر ادئر. 24نه یازیق بئر آدامام من! اؤلومون بو بدنئندن منی کئم خئلاص اده‌جک؟ 25ربّئمئز عئسا مسئحئن واسئطه‌سی‌ائله تارییا شوکور ادئرم! بله‌جه، من اؤز عاغلیملا تارینین شرئعتئنه، لاکئن جئسمانی طبئعتئمله گوناهین شرئعتئنه قوللوق ادئرم.
Currently Selected:
روملو‌لارا 7: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
