سایلار 23
23
بَلعامین بئرئنجی دفه گله‌جکدن خبر ورمه‌سی
1بَلعام بالاقا ددی: «بورادا منه یدّی قوربانگاه دوزَلت و منئم اوچون بورادا یدّی گامیش و یدّی قوچ حاضیرلا.» 2بالاق بَلعامین ددئیی کئمی اتدی. بالاقلا بَلعام هر قوربانگاهدا بئر گامیش و بئر قوچ تقدئم اتدئلر. 3بَلعام بالاقا ددی: «سن یاندیرما قوربانینین یانیندا دور، من گدئم. بلکه رب منئم گؤروشویومه گلسئن و منه نه گؤرسدسه، سنه بئلدئره‌رم.» سونرا چیلپاق بئر تپه‌یه چیخدی.
4تاری بَلعاملا گؤروشدو و بَلعام اونا ددی: «یدّی قوربانگاه حاضیرلادیم و هر قوربانگاهدا بئر گامیشلا بئر قوچ تقدئم اتدئم.» 5رب بَلعامین آغزینا بئر کلام قویوب ددی: «بالاقین یانینا قاییدیب بله دِه.» 6بَلعام بالاقین یانینا قاییتدی. گؤردو کی، بالاق و موآبین بوتون باشچیلاری یاندیرما قوربانینین یانیندا دورورلار. 7بَلعام سؤزونو باشلاییب ددی:
«بالاق منی اَرامدان،
موآب پادشاهی منی شرق داغلاریندان گتئرئب کی،
”گل، منئم خیرئمه یعقوبو لعنت ات،
گل ائسرایئله قارغیش ات.“
8تارینین لعنت اتمه‌دئیئنه من نجه لعنت ادئم؟
ربّئن قارغیش اتمه‌دئیئنه من نجه قارغیش ادئم؟
9قایالارین باشیندان اونلاری گؤرورم،
تپه‌لردن اونلارا باخیرام.
باخ، موستقئل یاشایان بئر خالق،
اِللَردن اؤزونو آییران بئر خالق!
10یعقوبون توزونو کئم سایا بئلر؟
ائسرایئلئن دؤردده بئرئنی کئم حسابلار؟
قوی صالح آداملارین اؤلومو ائله اؤلوم!
قوی منئم آخیریم اونلارینکی کئمی اولسون.»
11بالاق بَلعاما ددی: «منه نه اتدئن؟ دوشمنلرئمه لعنت اتمک اوچون سنی گتئردئم، باخ، سن اونلارا برکت وردئن!» 12بَلعام جاواب ورئب ددی: «مگر من گرک ربّئن دئلئمه قویدوغونو دِمه‌یه دئقّتلی اولماییم؟»
بَلعامین ائکئنجی دفه گله‌جکدن خبر ورمه‌سی
13بالاق اونا ددی: «خاهئش ادئرم، منئمله گل، باشقا بئر یره گدک کی، اورادان اونلاری گؤره‌سن. اونلارین هامیسینی یوخ، آخیر قئسمئنی گؤرَرسن. اورادان منئم خیرئمه اونلاری لعنت ات.» 14بله‌جه بالاق اونو پئسگاه تپه‌سئنده‌کی صوفئم یایلاغینا آپاردی. یدّی قوربانگاه دوزَلتدی و هر قوربانگاهدا بئر گامیش و بئر قوچ تقدئم اتدی. 15بَلعام بالاقا ددی: «سن بورادا یاندیرما قوربانینین یانیندا دور، قوی من بئر آز ائره‌لی گدئب رَبله گؤروشوم.» 16رب بَلعاما گؤروندو و اونون آغزینا بئر کلام قویوب ددی: «بالاقین یانینا قاییت و بله دِه.» 17بله‌جه، بَلعام بالاقین یانینا گلدی. گؤردو کی، بالاق یاندیرما قوربانینین یانیندا دوروب. موآب باشچیلاری دا اونونلا برابر دوروبلار. بالاق اوندان سوروشدو: «رب نه ددی؟» 18بَلعام سؤزونو باشلاییب ددی:
«قالخ، ای بالاق! و اشئت؛
منه قولاق آس، ای صئپّور اوغلو.
19تاری ائنسان دیئل کی، یالان دانیشسین.
بشر اوغلو دیئل کی، فئکرئنی دیئشدئرسئن.
ددئیئنی حیاتا مگر کچئرتمَز؟
وردئیی سؤزو مگر یرئنه یتئرمَز؟
20باخ، برکت ورمک اوچون امر آلدیم؛
او، برکت وردئکده، من اونو دیئشه بئلمه‌رم.
21یعقوبدا بدبختلئک، ائسرایئلده ده بلا گؤرمه‌یئب.
تاریسی رب اونونلادیر.
پادشاهین شادلیق نعره‌سی اونلارین آراسیندا!
22تاری اونلاری مئصئردن چیخارتدی؛
تاری اونلارا چؤل اؤکوزونون قووّتی کئمی‌دئر.
23یعقوبون ضئدّئنه افسون یوخدور.
ائسرایئلئن ضئدّئنه فالچیلیق اولماز.
واختی واختیندا یعقوبا، ائسرایئله دیئله‌جک:
”تاری نه‌لر اتدی!“
24باخ، خالق دئشی آصلان کئمی اویانیر،
شئر کئمی قالخیر،
شئکاری یمه‌یئنجه،
اؤلَنلرئن قانینی ائچمه‌یئنجه یاتمایاجاق.»
25بالاق بَلعاما ددی: «اونلارا نه لعنت ات، نه ده برکت ور.» 26لاکئن بَلعام بالاقا جاواب ورئب ددی: «مگر سنه دمه‌دئم کی، رب نه دسه، اونو اتمه‌لی‌یم؟»
بَلعامین اوچونجو دفه گله‌جکدن خبر ورمه‌سی
27بالاق بَلعاما ددی: «خاهئش ادئرم گل، سنی باشقا بئر یره آپاریم؛ بلکه تارینین گؤزونه خوش گلر کی، اورادان اونلاری منئم خیرئمه لعنت اده‌سن.» 28بالاق بَلعامی چؤله باخان پِعور تپه‌سئنه آپاردی. 29بَلعام بالاقا ددی: «بورادا منه یدّی قوربانگاه دوزَلت و بورادا منئم اوچون یدّی گامیش و یدّی قوچ حاضیرلا.» 30بالاق بَلعامین ددئیی کئمی اتدی. هر قوربانگاهدا بئر گامیش و بئر قوچ تقدئم اتدی.
Currently Selected:
سایلار 23: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
