سایلار 11
11
جاماعات شئکایت ادئر
1جاماعات چکدئیی سیخینتیدان ربّه شئکایت اتدی. رب بونو اشئدنده قضبی آلوولاندی. ربّئن اودو اونلارین آراسیندا یاندی و دوشَرگه‌نئن اطرافلارینی یاندیریب یوخ اتدی. 2جاماعات موسایا فریاد اتدی. موسا ربّه یالواردی و اود سؤندو. 3بونا گؤره او یِرئن آدی تَبعِرا#11:3 عئبرانی دئلئنده «اود» قویولدو، چونکی ربّئن اودو اونلارین آراسیندا یانمیشدی.
4خالقین آراسیندا اولان آلچاق یاد اِللی‌لرئن طاماحلی هَوَسلری وار ائدی. ائسرایئل اؤولادلاری دا گئنه آغلاییب ددئلر: «کئم بئزه یمک اوچون اَت وره‌جک؟ 5مئصئرده موفته یِدئیئمئز بالیقلاری، خئیارلاری، قوحونلاری، کاوارلاری، صوغانلاری، و ساریمساقلاری یادیمیزا سالیریق. 6آمّا ائندی ائشتاهامیز گدئب، یِمه‌یه مانّادان باشقا هچ بئر شی گؤرموروک.»
7مانّا کِشنئش توخومو کئمی ائدی، رنگی ده قَطران رنگئنده ائدی. 8جاماعات دولانیب اونو ییغاردیلار و دَیئرماندا دارتیب، یا دا هَوَنگدسته ائله دؤیَردئلر. قازاندا قاینادیب اوندان کؤکه دوزَ‌لدَردئلر. اونون دادی یاغلا پئشئرئلمئش کؤکه‌لره اوخشاییردی. 9مانّا گجه دوشَرگه اوستونه دوشَن شِحله برابر دوشَردی.
10موسا اشئتدی کی، خالق، هر عایئله چادیرینین گئرئشئنده آغلاییر؛ و ربّئن قضبی چوخ آلوولاندی. موسا ناراضی ائدی. 11اونا گؤره ربّه ددی: «سن نه اوچون قولونلا بو قدر چتئن رفتار ادئرسن؟ نه اوچون سنئن گؤزونده لوطف تاپمامیشام کی، بو خالقین یوکونو منئم اوستومه قویوبسان؟ 12مگر من بوتون بو خالقا بویلو اولموشام؟ مگر من بونلاری دوغموشام کی، دیئرسن: ”سود اَمن اوشاغی گَزدئرن دایه کئمی اونلاری قوجاغیندا او اؤلکه‌یه آپار کی، سن اونون ورمه‌سئنی اونلارین آتالارینا آند ائچئبسن؟“ 13بوتون بو خالقا یِدئرتمَک اوچون اَتی من هارادان تاپیم؟ چونکی اونلار قاباغیمدا آغلاییب دیئرلر: ”بئزه اَت ور، یئیَک.“ 14من بو خالقی تک باشیما داشییا بئلمه‌رم، چونکی بو منئم اوچون چوخ آغیردیر. 15بونا گؤره ده اگر منئمله بو جور رفتار اده‌جکسن، اگر گؤزونده لوطف تاپمیشام، منی یوباتمادان اؤلدور و قویما کی، بدبختچئلئیئمی گؤروم.»
16رب موسایا ددی: «منه خالق آراسیندا رهبر و مؤعتبر سایدیغین ائسرایئل آغساقّاللاریندان یتمئش نفر بئر یره ییغ. اونلاری حوضور چادیرینا گتئر و قوی سنئنله دورسونلار. 17سونرا من اِنئب، اورادا سنئنله دانیشاجاغام. سنده اولان روحدان گؤتوروب اونلارا وره‌جیم. اونلار دا خالقین یوکونو سنئنله برابر چکه‌جکلر، اله کی، بو یوکو تک باشینا داشیمایاجاقسان. 18خالقا دِه: ”صاباح اوچون اؤزلرئنئزی تقدئس ادئن، و اَت یئیه‌جکسئنئز. چونکی آغلاییشلارینیزی ربّه اشئتدئرئب دِدئنئز: کاشکی اَتئمئز اولایدی! مئصئرده حالیمیز یاخشی ائدی. اونا گؤره رب سئزه اَت وره‌جک، سئز ده اَت یئیه‌جکسئنئز. 19نه بئر گون، نه ائکی گون، نه بش گون، نه اون گون، نه ده ائیئرمی گون، 20دوز بئر آی، بورنونوزدان گلنه قدر، ائیرنه‌نه قدر یئیه‌جکسئنئز؛ چونکی آرانیزدا اولان رَبّی رَدّ اتدئنئز و اونون قاباغیندا آغلاییب دِدئنئز: نه اوچون مئصئردن چیخدیق؟“» 21لاکئن موسا ددی: «آراسیندا اولدوغوم بو خالقدا آلتی یوز مئن پئیادا وار و سن بویورورسان: ”من اونلارا بئر آیلیق یمک اوچون اَت وره‌جیم.“ 22بوتون قویون-کچی و مال-حیوان کَسئلسه ده، اونلار مگر دویار؟ دهنزئن بوتون بالیقلاری توتولسا دا، اونلار مگر دویار؟» 23رب موسایا ددی: «مگر ربّئن اَلی قیسالیب؟ ائندی گؤره‌جکسن سنه ددئکلرئم یرئنه یِتئشئر یا یوخ.»
24بله‌جه موسا چیخدی و ربّئن سؤزلرئنی خالقا چاتدیردی. خالقین آغساقّاللاریندان یتمئش نفری ده ییغدی و چادیرین اطرافیندا دایاندیردی. 25او واخت رب بولوددا اِندی و موسا ائله دانیشدی. اونداکی روحدان گؤتوروب، یتمئش نفر آغساقّاللارا وردی؛ اونلارین اوستونه روح تؤکَن زامان پیغمبرلئک اتدئلر. آمّا بئر داها اتمه‌دئلر.
26دوشَرگه‌ده ائکی آدام قالمیشدی؛ بئرئنئن آدی اِلداد و او بئرئنئن آدی مئداد ائدی. اونلار یازیلان یتمئش نفر آراسیندا ائدئلر، لاکئن چادیرین یانینا گتمه‌مئشدئلر. روح اونلارین دا اوستونه دوشدو و اونلار دوشَرگه‌ده پیغمبرلئک اتدئلر. 27بئر جاوان قاچاراق موسایا خبر ورئب، ددی: «اِلداد و مئداد دوشَرگه‌ده پیغمبرلئک ادئرلر.» 28نون اوغلو یوشَع کی، جاوانلیغیندان بَری موسانین کؤمکچئسی ائدی، ددی: «آغام موسا، اونلاری قدغن ات.» 29آمّا موسا ددی: «منه گؤره مگر حسودلوق ادئرسن؟ کاشکی ربّئن بوتون خالقی پیغمبر اولایدی و رب اونلارا روحونو وِرَیدی!» 30سونرا موسا و ائسرایئل آغساقّاللاری دوشَرگه‌یه قاییتدیلار.
31رب بئر کولَک اَسدئردی و کولَک دهنز طرفئندن بئلدئرچئن گتئردی. کولَک بئلدئرچئنلری دوشَرگه‌نئن هر طرفئندن بئر گونلوک یول قدر اوزاقلیغا، یِرئن اوستوندن ائکی قولاچ#11:31 تقرئبن ۹۰ سانتئمتر قدر اوجالیغا سالدی. 32بوتون او گون، او گجه و او گونون صاباحی جاماعات چیخیب بئلدئرچئنلری ییغدی. لاپ آز ییغان اون حومِر ییغدی. بئلدئرچئنلری اؤزلری اوچون دوشَرگه‌نئن اطرافینا سَردئلر. 33آمّا اَتی حله دئشلری آراسیندا چئنه‌مه‌مئشدن، ربّئن قضبی خالقین ضئدّئنه آلوولاندی. رب اونلارا شئدّتلی بئر بلا گؤندَ‌ردی. 34بله‌جه او یِرئن آدی قئبروت-حاتّاوا#11:34 عئبرانی دئلئنده دئلئنده حسرت قَبئرلری قویولدو، چونکی طاماحکار اولانلار اورادا باسدیریلدی. 35جاماعات قئبروت-حاتّاوادان خَصِروتا کؤچوب اورادا قالدی.
Currently Selected:
سایلار 11: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
