مئکا 4
4
رب بوتون دونیادا اَمئن-آمانلیقلا حؤکم سوره‌جک
(اِش. ۲:۱-۴)
1آخیر گونلرده ربّئن اِوی اولان داغ
داغلارین لاپ اوجاسی،
تپه‌لرئن لاپ اوجاسی اوجالاجاق.
خالقلار اونا ساری گله‌جکلر.
2چوخ مئلّتلر گلئب دئیه‌جکلر:
«گلئن، ربّئن داغینا،
یعقوبون تاریسینین اِوئنه قالخاق،
قوی رب بئزه اؤز یوللارینی اؤیرَتسئن،
و بئز اونون طرئقلری ائله گِدَک.»
چونکی شرئعت صَحیوندان،
ربّئن سؤزو اورشلئمدن یاییلاجاق.
3رب چوخ خالقلار آراسیندا حؤکم اده‌جک،
گوجلو اوزاق مئلّتلر حاقّیندا قرار چیخارداجاق.
اونلار قیلینجلاری کَچوجلارلا دؤیوب اونلاردان کوتان،
نئزه‌لردن ده حَرَس اَره‌سی دوزَ‌لده‌جکلر.
مئلّت، مئلّتئن ضئدّئنه قیلینج قالدیرمایاجاق،
آرتیق موحارئبه اتمه‌یی اؤیرَنمیه‌جک.
4هر کس اؤز اوزوم آغاجینین،
اؤز انجئر آغاجینین آلتیندا اَیلَشه‌جک،
اونلاری قورخودان اولمایاجاق.
چونکی قوشونلار ربّئنئن آغزی بله دیئب.
5بوتون خالقلار،
اؤز آللاهلارینین آدی ائله یاشاسالار بِله،
بئز، ابددن ابده‌جک تاریمیز ربّئن آدی ائله یاشایاجاغیق.
اسئرلئکدن قاییتماغین وعده‌سی
6رب بویورور:
«او گون من شئکَستلری ییغاجاغام،
قوودوغوم، ذلئل اتدئیئم خالقی بئر یِره ییغاجاغام.
7شئکَستلری صاغ قالان خالق اده‌جیم،
قووولانلاری گوجلو مئلّته چِوئره‌جیم.
رب اونلارا صحیون داغیندان،
ائندئدن ابده کئمی حؤکم اده‌جک.»
8سنه گلئنجه، ای سورویه نظارت ادن بورج،
ای صحیون قیزینین قالاسی،
اوّلکی حاکئمئیّت سنه تزه‌دن ورئله‌جک،
اورشلئم قیزینین سلطنتی گله‌جک.
9ائندی نه اوچون اوجا سَسله باغیریرسان؟
نئیه دوغان آرواد کئمی آغری چکئرسن؟
مگر سنئن یانیندا پادشاه یوخدور؟
مصلحت وره‌نئن مگر هلاک اولوب؟
10ای صحیون قیزی، آغریدان قوورول،
دوغان آرواد کئمی بَرکدن قیشقیر،
چونکی ائندی شهری ترک ادئب، چؤلده قالاجاقسان،
بابئله قدر گده‌جکسن.
اورادا قورتولوش تاپاجاقسان؛
اورادا رب سنی دوشمنلرئنئن اَلئندن ساتین آلاجاق.
11آمّا ائندی چوخ مئلّتلر
سنئن ضئدّئنه بئرله‌شئب دیئرلر:
«قوی صحیون روسوای اولوب نجئسلَنسئن!
بونو اؤز گؤزوموزله گؤرَک!»
12لاکئن اونلار ربّئن دوشونجه‌لرئنی بئلمئرلر،
اونون مقصدئنی آنلامیرلار؛
چونکی رب اونلاری، خرمنده ییغیلان دَرزلر کئمی
بئر یِره ییغیب.
13رب بله دیئر: «ای صحیون قیزی،
قالخ، خرمنده‌کی تاخیلینی دؤی!
چونکی سنئن بوینوزونو دمئر کئمی،
دیرناقلارینی بورونج کئمی اده‌جیم.
اِله کی، چوخ خالقلاری اَزه‌سن،
اونلارین حاقسیزلیقلا آلان قنئمتئنی،
مال-دؤولتئنی بوتون یِر اوزونون پروردئگارینا وقف اده‌سن.
Currently Selected:
مئکا 4: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
