لاوئلی‌لر 17
17
حیات ورن قاندیر
1رب موسایا دانیشیب، ددی: 2«هارونلا اوغوللارینا و بوتون ائسرایئل اؤولادلارینا دِه: ربّئن امر اتدئیی بودور: 3”اگر ائسرایئل خالقیندان بئری دوشَرگه‌ده، یا دا دوشَرگه‌دن اِشئک، بئر اؤکوز، و یا بئر قوزو، و یا بئر کچی کَسسه 4و اونو حوضور چادیرینین گئرئشئنه، ربّئن خیمه‌سئنئن قاباغیندا ربّه بئر قوربان کئمی تقدئم اتمه‌سه، قان تؤکمکده موقَصّئر ساییلسین. بله آدام قان تؤکوب و گرک خالقی آراسیندان قووولسون. 5بو امره دلئل بودور کی، ائسرایئل اؤولادلاری چؤلده کسدئکلری قوربانلارینی، ربّئن حوضورونا، حوضور چادیرینین گئرئشئنه، کاهئنئن یانینا گتئرئب، ربّه باریش قوربانلاری اولاراق تقدئم اتسئنلر. 6کاهئن بله قوربانین قانینی او قوربانگاها سپسئن کی، حوضور چادیرینین گئرئشی یانیندادیر. پئیئنی ده ربّئن خوشونا گلن عطئرلی تقدئم اولاراق توستوله‌دئب یاندیرسین. 7ائسرایئل اؤولادلاری بئر داها ربّه خَیانت ادئب، کچی تئمثالینداکی ائبلئسلره قوربان کسمه‌سئنلر. بو، نسئلدن-نسئله اونلار اوچون ابدی قایدا اولسون.
8بئر ده کی اونلارا دِه: ائسرایئل خالقیندان، و یا آرالاریندا یاشایان یاد اِللئلردن، کئم یاندیرما قوربانینی، یا دا بئر قوربان کَسسه، 9و اونو ربّئن حوضورونا تقدئم اتمک اوچون حوضور چادیرینین گئرئشئنه قوربان گتئرمه‌سه، او آدام خالقی آراسیندان قووولسون.
10ائسرایئل خالقیندان، یا دا آرالارینیزدا یاشایان یاد اِللی‌لردن هر جور قانی یئیَن آدامدان من اوز دؤندَ‌رئب، اونو خالقی آراسیندان قوواجاغام، 11چونکی هر مخلوقون حیاتی اونون قانیندادیر. من اونو حیاتینیزین کفّاره‌سی اوچون قوربانگاهدا تقدئم اولونماغا تعیئن اتمئشم؛ چونکی حیات وردئیئنه گؤره کفّاره ادن قاندیر. 12بونا گؤره ده من ائسرایئل اؤولادلارینا دمئشم: سئزدن هچ بئر کس، آرانیزدا یاشایان یاد‌اِللی ده قان یمه‌سئن.
13ائسرایئل اؤولادلاریندان، یا دا آرالاریندا یاشایان یاد اِللی‌لردن هر کس، اگر یِیئله بئلن حیوان، یا دا قوش اوولایا، اونون قانینی یره آخیدیب، تورپاقلا اؤرتسون. 14چونکی هر مخلوقا حیات ورن اونون قانی‌دیر. بونا گؤره من ائسرایئل اؤولادلارینا ددئم کی، هچ بئر مخلوقون قانینی یِمه‌یئن. چونکی هر مخلوقا حیات ورن اونون قانی‌دیر. اونو یئین هر کس خالقینین آراسیندان قووولسون. 15او آدام کی، اؤلموش و یا وحشی حیوان واسئطه‌سی‌ائله پارچالانیب اؤلموش حیوانی يِیئر، ائستر یرلی اولسون، ائستر یاد اِللی، گرک پالتارینی یوسون، سو ائله یویونسون، آخشاماجاق نجئس، سونرا تمئز ساییلسین. 16اگر بله آدام پالتارینی و بدنئنی یوماسا، تقصئری اؤز بوینوندا اولاجاق.“»
Currently Selected:
لاوئلی‌لر 17: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
