هوشَع 8
8
ائسرایئلئن بوتپرستلئیی
1کَره‌نای چالماغا حاضیرلاش!
ربّئن اِوئنئن اوستونه
دوشمن حاضیردیر کی، کرکس کئمی هوجوم چکسئن.
چونکی ائسرایئللی‌لر منئم عهدئمی پوزوبلار،
منئم قانونوما عاصی چیخیبلار.
2اونلار منه باغیریرلار:
”تاریم، بئز ائسرایئللی‌لر سنی تانی‌ییریق.“
3ائسرایئل یاخشیلیغی ردّ ادئب،
دوشمن اونو تعقئب اده‌جک.
4اؤزلرئنه پادشاه قویدولار، آمّا منئم واسئطَمله یوخ.
من بئلمه‌دن اؤزلرئنه باشچیلار سِچدئلر.
اؤزلرئنه قیزیل و گوموشلرئندن،
اؤلوملرئنه یول آچان بوتلر دوزَلتدئلر.
5ای سامئره، سنئن دانا بوتونو ردّ اتمئشم!
منئم قضبئم اونلارین ضئدّئنه آلوو چکئر.
نه واختا قدر معصوم اولمایاجاقلار؟
6چونکی بو بوت ائسرایئلئن ائشی‌دئر؛
اوستا بئری اونو دوزَ‌لدئب،
اونا گؤره ده تاری دیئل.
سامئره‌ده‌کی دانا بوتو تئکه-تئکه اولاجاق.
7اونلار یِل اَکئرلر،
طوفان بئچه‌جکلر.
سونبول بئتئرمه‌ین بوغدا اون ورمز،
ورسه ده، یادلار اونو اودار.
8ائسرایئل اودولموشدور،
ائندی اونلار مئلّتلر آراسیندادیرلار،
هچ کَسئن بَیَنمه‌دئیی بئر قاب کئمی اولوبلار.
9اونلار تک گزن وحشی اِششَک کئمی
آشورون طرفئنه گدئبلر.
اِفرایئم اوجرتله اؤزونه اویناشلار توتوب.
10حتّا اگر مئلّتلر آراسیندا اوجرتله اویناش توتسالار دا،
من ائندی اونلاری بئر یِره ییغاجاغام.
اونلار پادشاهین و باشچیلارین ظولموندن
آزالماغا باشلایاجاقلار.
11اِفرایئم گوناه تقدئمی اوچون،
چوخلو قوربانگاه تئکدئیئنه گؤره،
بونلار اونون گوناها باتیران قوربانگاهلاری اولوب.
12گرچی اونلار اوچون چوخلو قانون یازدیم،
آمّا اونلار بونلاری یاد بئر شی حساب اتدئلر.
13منه کَسئلَن قوربانلارا گلئنجه،
اَتی منه قوربان گتئرئب اؤزلری یِیئرلر.
رب اونلاردان راضی دیئل.
ائندی اونلارین تقصئرلرئنی یادا سالاجاق،
گوناهکارلارینی جزالاندیراجاق.
اونلار مئصئره قاییداجاقلار.
14چونکی ائسرایئل یارادانینی یاددان چیخاردیب،
اؤزونه سارایلار تئکئب.
یهودا دا چوخلو قالالی شهرلر بئنا ادئب،
لاکئن من اونون شهرلرئنه اود یاغدیراجاغام کی،
سارایلارینی آلوو یِسئن.
Currently Selected:
هوشَع 8: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
