هوشَع 10
10
1ائسرایئل بئر قوللو-بوداقلی مِینه‌دئر کی،
اؤزونه بول-بول بار گتئرئر.
باری آرتدیقجا داها چوخ قوربانگاهلار تئکدی.
تورپاغی برکتلی اولدوقجا
داها گؤزل موقدّس سوتونلار قوردولار.
2اونلارین اورَکلری یالانلا دولودور،#10:2 و یا «اورَکلری بؤلونموشدور.»
ائندی گرک خاطالارینین جزاسینی داشیسینلار.
رب اونلارین قوربانگاهلارینی داغیداجاق،
موقدّس سوتونلارینی سیندیراجاق.
3او واخت اونلار دئیه‌جک:
«بئزئم پادشاهیمیز یوخدور،
چونکی بئز ربدن قورخموروق.
پادشاهیمیز اولسا دا،
بئزئم اوچون نه اده بئله‌جک؟»
4آنجاق بوش سؤزلر دانیشیرلار؛
بوش آندلارلا عهد باغلاییرلار،
بونا گؤره ده محکمه ائشلری
شوخوملانمیش زَمئده‌کی زَهَرلی اوت کئمی بؤیویور.
5سامئره ساکئنلری
بِیت‌آوِنده‌کی دانا بوتونه گؤره تئتره‌یئرلر.
اونون اوچون خالقی یاس توتور.
اونون بوتپرست کاهئنلری ده شئون چکئر،
چونکی جلالی اوندان آیریلیب.
6بوت اؤزو آشورا، بؤیوک پادشاها
خراج آپاریلاجاق.
اِفرایئم بی‌آبیر اولاجاق،
ائسرایئل آلدیغی مصلحتدن اوتاناجاق.
7سامئره و اونون پادشاهی
سو اوستونده‌کی شاخه کئمی
آخیب گده‌جک.
8آوِنده‌کی اوجا یِرلرده اولان پرستئشگاهلار کی،
ائسرایئلئن گوناهی ائدئلر، یوخ اولاجاقلار.
اونون قوربانگاهلاریندا تئکان و قانقال بئته‌جک.
او زامان داغلارا دئیه‌جکلر:«بئزی اؤرتون!»
تپه‌لره ده دئیه‌جکلر: «اوستوموزه ییخیلین!»
9«گئبعادا کچئرتدئیئن گونلردن بَری،
گوناه ادئبسن، ای ائسرایئل؛
اورادا اؤز ائشلرئنی داوام اتدئرئبلر.#10:9 و یا «اورادا منئم ضئدّئمه دایاندینیز.»
مگر موحارئبه حاقسیزلیق اؤولادلارینی
گئبعادا یاخالاماز؟
10من، ائسته‌دئیئم زامان،
اونلاری تنبه اده‌جیم.
خالقلار اونلارین ضئدّئنه بئرله‌شئب،
ائکی‌قات تقصئرلرئندن اؤتری اونلاری اسئر اده‌جک.
11اِفرایئم تربئیه ورئلمئش، تاخیل دؤیمه‌یی سِوَن دانا کئمی ائدی.
من اونون گؤزل بوینونو اسئرگه‌دئم.
ائندی آمّا اِفرایئمی یوغ آلتینا وره‌جیم؛
یهودا گرک یِر شوخوملاسین،
یعقوب گرک اؤزو اوچون دیرمیق چکسئن.
12اؤزونوز اوچون صالحلئک اَکئن،
محبّت بَهَرئنی بئچئن.
دئنجه قویولموش تورپاغینیزی شوخوملایین،
چونکی ربّی آختارماق واختی‌دیر.
اِله کی، گلسئن
و اوستونوزه صالحلئک یاغدیرسین.
13سئز شرارت اَکئبسئنئز،
ظولم بئچئبسئنئز.
یالانین بَهَرئنی یِیئبسئنئز.
چونکی اؤز یوللارینیزا،
چوخلو جنگاورلرئنئزه بِل باغلاییبسینیز.
14بونا گؤره، خالقینیزین ائچئنده موحارئبه گورولتوسو قوپاجاق،
بوتون قالالارینیز داغیلاجاق،
نجه کی شَلمَن، موحارئبه گونونده
بِیت‌اَربِلی داغیتدی؛
آنالار اوشاقلاری ائله بئرلئکده یِره چیرپیلیب پارچالاندیلار.
15ای بِیت‌ائل، پئسلئیئنئن چوخلوغو اوزوندن
سنئنله ده بله رفتار ادئله‌جک.
سحر آچیلاندا ائسرایئل پادشاهی بوسبوتون هلاک اولاجاق.
Currently Selected:
هوشَع 10: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
