عئبرانئلره 5
5
1چونکی ائنسانلار آراسیندان سِچئلَن هر باش کاهئن، تارییا مربوط اولان ائشلرده ائنسانلار اوچون وکئل قویولور کی، گوناهلار اوچون هدئیّه‌لر و قوربانلار تقدئم اتسئن. 2او، جاهئل‌لر و آزانلارلا مولایئم رفتار اده بئلر، چونکی اؤزو ده ضعئفلئک ائچئنده‌دئر. 3بو سببدن ده، گوناهلار اوچون قوربان تقدئم اتمه‌لی‌دئر؛ هم خالقین گوناهلاری اوچون، هم ده اؤز گوناهلاری اوچون. 4و هچ کس بو احتئراما اؤز-اؤزونه نایئل اولا بئلمز، تارینین طرفئندن دعوت اولوندوقدا نایئل اولا بئلر، نجه کی، حتّا هارون دا بله ائدی. 5اله‌جه مسئح ده اؤز-اؤزونو عئزّتلندئرئب باش کاهئن اولمادی، آمّا او تاری کی، اونا ددی: «سن منئم اوغلومسان. بو گون من سنه آتا اولدوم.»#5:5 مزمور ۲:۷ 6نجه کی، آیری بئر یرده ده دیئر: «سن ملکئصدق ترتئبئنه موطابئق، ابدی بئر کاهئنسن.»#5:6 مزمور ۱۱۰:۴ 7عئسا، جئسمئنده اولموش گونلرئنده، اوجا سس و گؤز یاشلاری ائله اونو اؤلومدن نئجات وره بئلن تارییا دوعالار و نئیازلار تقدئم اتدی و تقواسی سببئندن اشئدئلدی. 8اوغول اولدوغو حالدا، چکدئیی عذابلارلا ائطاعتی اؤیرندی. 9و کامالا چاتیب، اوندان ائطاعت اِدَن هر کسه ابدی نئجاتین بولاغی اولدو. 10و تاری طرفئندن ملکئصدق ترتئبئنه موطابئق، باش کاهئن تعیئن اولوندو. 11اونون باره‌سئنده دمک اوچون چوخ سؤزوموز وار و آچیقلاماسی دا چتئندئر، چونکی قولاقلارینیز آرتیق آغیر اشئدئر. 12گرچی سئز بو زامان عرضئنده موعلّئم اولمالی ائدئنئز، حله ده بونا مؤحتاجسینیز کی، کئمسه سئزه تارینین سؤزلرئنئن ائبتئدائی قایدالارینی اؤیرتسئن. و سئز قووّتلی یمه‌یه یوخ، سوده مؤحتاج اولوبسونوز. 13چونکی هر کس کی، آنجاق سود ائچئر، کؤرپه اوشاقدیر و صالحلئیئن کلامینا عادت اتمه‌یئب. 14لاکئن قووّتلی یمک بؤیوموشلر اوچوندور کی، عمل اتمکله، حئسلری یاخشی و پئسی بئربئرئندن آییرلاماغا تربئیه تاپیب.
Currently Selected:
عئبرانئلره 5: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
