عئبرانئلره 10

عئسا، آخیر قوربان

1شرئعت، اوندان اؤتری کی، گله‌جک یاخشی شیلرئن اصل شکئلی یوخ، اونلاردان آنجاق بئر کؤلگه‌دئر، ائلدن ائله دائمی بئر شکئلده تقدئم اولونان همن قوربانلارلا یاخینلاشانلاری هچ واخت کامئل اده بئلمز. 2یوخسا مگر قوربانلارین تقدئم اولونماسی بوراخیلمازدی؟ چونکی پرستئش اِدَنلر بئر دفه تمئزلشمئش اولاندان سونرا، اؤزلرئنده گوناه ائدراکی اولمازدی. 3حال بو کی، بو قوربانلارلا گوناهلار ائلدن ائله یادا سالینیر. 4چونکی قیری‌‌مومکوندور کی، اؤکوزلرئن و کچئلرئن قانی گوناهلاری آرادان گؤتورسون.

5بونا گؤره مسئح، دونیایا گئرنده دیئر:

قوربان و تقدئمه ائستمه‌یئبسن،

لاکئن منه بئر بدن حاضیرلاییبسان؛

6یاندیریلان تقدئمه‌لر

و گوناه اوچون ادئلن قوربانلاردان

سن راضی اولماییبسان.

7او زامان ددئم:

(کئتابین طوماریندا منئم باره‌مده یازیلیب)

باخ، ای تاری،

گلمئشم کی، سنئن ائراده‌نی یرئنه یتئرئم.#10‏:7 مزمور ۴۰‏:۶‏-۸

8یوخاریداکینی دئیندن سونرا کی، «قوربانلار و تقدئمه‌لری، یاندیریلان تقدئمه‌لر و گوناه اوچون ادئلن قوربانلاری سن نه ائسته‌یئبسن، نه ده اونلاردان راضی اولوبسان» (کی، شرئعته موطابئق تقدئم اولونورلار.) 9سونرا او، ددی: «باخ، گلمئشم کی، سنئن ائراده‌نی یرئنه یتئرئم.» و بئرئنجئنی لغو ادئر کی، ائکئنجئنی برقرار اتسئن. 10بونون ائراده‌‌سی ائله، عئسا مسئحئن بدنئنئن بئر دفه‌لئک قوربان اولونماغی ائله بئز تقدئس اولونوروق.

11هر کاهئن گوندن-گونه دایانیب خئدمت ادئر و گوناهلاری هچ واخت آرادان گؤتوره بئلمه‌ین همن قوربانلاری دفه‌لر‌له تقدئم ادئر. 12لاکئن او، تک بئر قوربان تقدئم ادئب، همئشه‌لئک تارینین صاغیندا اوتوردو. 13و او زامانی گؤزله‌یئر کی، دوشمنلری اونون آیاقلاری آلتیندا کتئل اولسونلار. 14چونکی او، آنجاق بئر قوربان تقدئم اتمکله تقدئس اولونانلاری همئشه‌لئک کامئل‌لَشدئرئب.

15موقدّس روح دا بئزه شهادت ورئر؛ چونکی دیئر:

16رب دیئر کی:

او گونلردن سونرا، اونلارلا باغلایاجاغیم عهد بودور:

شرئعتلرئمی اونلارین اوره‌یئنده یرلشدئره‌جه‌یم،

اونلارین ذهئنلرئنده یازاجاغام.#10‏:16 اِرِمیا ۳۱‏:۳۳

سونرا دا دیئر:

17و اونلارین گوناهلار و حاقسیزلیقلارینی

بئر داها یادا سالمایاجاغام.#10‏:17 اِرِمیا ۳۱‏:۳۴

18ائندی بونلارین باغیشلانماسی اولان یرده، گوناهدان اؤتری داها قوربان تقدئم اولونماز. 19بونا گؤره، قارداشلار، چونکی عئسانین قانی واسئطه‌‌سی‌ائله لاپ موقدّس یره یقئنلئکله گئره بئله‌رئک؛ 20او تزه و جانلی یوللا کی، بئزئم اوچون پرده‌نئن آراسیندان، یعنی اؤز جئسمئنئن واسئطه‌سئله حاضیرلاییب، 21و تارینین اِوی اوستونه بؤیوک بئر کاهئنئمئز اولدوغو اوچون، 22گلئن ائمانین کامئل یقئنلئیئنده، اورَکلرئمئز هر پئس بئر شوعوردان تمئزله‌نمئش، بدنلرئمئز ده تمئز سو ائله یویولموش، صادئق بئر اورَکله تارییا یاخینلاشاق. 23گلئن ائقرار اتدئیئمئز اومئدی تردّود اتمه‌دن برک توتاق، چونکی وعده‌نی ورن وفالی‌دیر. 24گلئن بونون قیدئنه قالاق کی، بئربئرئمئزی نجه محبّت و یاخشی ائشلر اتمه‌یه تشوئق ادک. 25و بعضئلرئن عادتی کئمی بئربئرئمئز‌له بئر یره ییغیلماغی ترک اتمه‌یک و بئربئرئمئزی داها دا چوخ تشوئق ادک، عَلَل‌خوصوص گؤرورسونوز ده کی، او گون یاخینلاشیر. 26چونکی اگر حقئقتئن معرئفتئنی آلاندان سونرا قصدن گوناه اِدَک، گوناهلار اوچون آرتیق قوربان قالمیر. 27لاکئن موحاکئمه‌نئن دهشتلی بئر ائنتئظاری و ضئدّ دورانلاری یاندیریب تؤکن بئر اودون قضبی قالیر. 28موسانین شرئعتئنی هچ سایان آدام، ائکی و یا اوچ شاهئدئن شهادتی ائله رحم ادئلمه‌دن اؤلور، 29فئکر ادئرسئنئز تارینین اوغلونو آیاق آلتینا سالان، واسئطه‌سی‌ائله تقدئس اولوندوغو عهدئن قانینی ناپاک سایان، و فیضئن موقدّس روحونو تحقئر ادن بئر آدام نه قدر شئدّتلی بئر جزایا لایئق اولاجاق؟! 30چونکی بونو دئیه‌نی تانی‌ییریق: «قئصاص منئمدئر، من عوضئنی وره‌جه‌یم.»#10‏:30 تثنئیه ۳۲‏:۳۵ و گئنه «رب خالقینی موحاکئمه اده‌جک.»#10‏:30 تثنئیه ۳۲‏:۳۶ و مزمور ۱۳۵‏:۱۴ 31یاشایان تارینین اَللرئنه دوشمک دهشتلی بئر شیدئر.

32لاکئن اوّلکی گونلری یادا سالین کی، مونوّر اولوندوغونوزدان سونرا، عذاب دولو بؤیوک بئر موبارئزه‌یه تاب گتئردئنئز. 33گاه سؤیوشلر و عذابلارلا تاماشایا قویولدونوز، گاه دا بو جور رفتار ادئلنلر‌له شرئک اولدونوز. 34چونکی محبوسلارلا بئرلئکده عذاب چکدئنئز و اؤزونوز اوچون یاخشی و دائمی بئر مالین اولدوغونو بئلئب، اموالینیزین تاراج اولماسینی شادلیقلا قبول اتدئنئز.

35بونا گؤره، یقئنئنئزی اؤزونوزدن آتمایین کی، بؤیوک بئر اجری وار. 36چونکی سئزئن تاب گتئرمه‌یه احتئیاجینیز وار کی، تارینین ائراده‌سئنی یرئنه یتئرندن سونرا، ورئلمئش وعده‌نی آلاسینیز. 37«دوغرودان دا کی، عنقرئب ”گلن اولان“ گله‌جک و یوبانمایاجاقدیر. 38منئم صالح اولانیم، ائمانلا یاشایاجاق و اگر دالی چکئلسه، جانیم اوندان راضی اولمایاجاق.»#10‏:38 حَبَقوق ۲‏:۳ و ۴ 39آمّا بئز دالی چکئلئب هلاک اولانلاردان دیئلئک، جانین حئفظ ادئلمه‌سئنه ائمان گتئرنلردنئک.

Currently Selected:

عئبرانئلره 10: موقدس کتاب

Highlight

Copy