حِزِقیال 44
44
معبدده خئدمت ادنلر
1او آدام منی موقدّس مکانین شرقه باخان باییر دروازاسی یولوندان گری قایتاردی. دروازا باغلی ائدی. 2رب منه ددی: «بو دروازا باغلی قالاجاق، آچیلمایاجاق، هچ کس اورادان ائچه‌ری گئرمیه‌جک، چونکی ائسرایئلئن تاریسی رب اورادان ائچه‌ری گئرئب، بونا گؤره ده باغلی قالاجاق. 3فقط رهبر، رهبرلئیئنه گؤره، ربّئن حوضوروندا چؤرک یمک اوچون اورادا اوتوراجاق. دروازا ایوانی یولوندان گئرئب، او یولدان دا چیخاجاقدیر.»
4او آدام منی شئمال دروازاسی یولوندان معبدئن قاباغینا گتئردی. من باخیب گؤردوم کی، ربّئن عئزّتی اؤز معبدئنی دولدوروب. بو زامان اوزو اوسته دوشدوم. 5رب منه ددی: «ای بشر اوغلو، ربّئن معبدئنئن بوتون قایدا-قانونلاری باره‌ده دئیه‌جیئم سؤزلره یاخشی-یاخشی قولاق آس، گؤزلرئنله گؤر، اونلارا قولاق آس، هر شیه دئقّتله باخ. معبدئن گئرئشئنه و موقدّس مکانین بوتون چیخیشلارینا دئقّت ات. 6عاصی اولان ائسرایئل نسلئنه دِه کی، پروردئگار رب بله دیئر: ”ای ائسرایئل نسلی، آرتیق بَسدئر! اتدئیئنئز ائیرنج ائشلره داها آخیر قویون. 7اوره‌یی و بدنی ختنه ادئلمه‌مئش یاد اِللی‌لری موقدّس مکانیما گتئردئنئز، منه یمک اولماق اوچون پئی و قان تقدئم اتمکله معبدئمی نجئسله‌دئنئز. بله‌جه ائیرنج ائشلرئنئزله عهدئمی پوزدونوز. 8موقدّس شیلرئم حاقّیندا اولان وظئفه‌نی یرئنه یتئرمه‌دئنئز. موقدّس مکانیمدا بو شیلره نظارت اتمه‌یی آیریلارینا تاپشیردینیز.“ 9پروردئگار رب بله دیئر: ”ائسرایئل خالقی آراسیندا یاشایان اوره‌یی و بدنی ختنه ادئلمه‌مئش هچ بئر یاد-اِللی موقدّس مکانیما گئرمه‌سئن.
10او لاوئلی‌لر کی، ائسرایئل یولدان آزدیغی زامان مندن اوزاقلاشدیلار و یولدان آزیب بوتلری دالینجا گِتدئلر، اؤز گوناهلارینین جزاسینی چکه‌جکلر، 11لاکئن موقدّس مکانیمدا بو ائشلری گؤره‌جکلر: معبدئن دروازالارینا نظارت اده‌جکلر، معبدئن خئدمت ائشلرئنی گؤره‌جکلر، خالق اوچون یاندیرما قوربانلاری و باشقا قوربانلیق حیوانلاری کَسه‌جکلر، خالقین قاباغیندا دوروب اونلارا خئدمت اده‌جکلر. 12ائندی کی، اونلار بوتلرئنئن قاباغیندا ائسرایئل نسلئنه خئدمت اده‌رَک خالقی گوناها باتیردیلار، من رب ده آند ائچمئشم کی، اونلاری گوناهلارینا گؤره جزالاندیریم.“ پروردئگار رب بویورور. 13”اونلار کاهئن آدیندا خئدمت اتمک اوچون منه یاخینلاشمایاجاقلار، بوتون موقدّس شیلرئمه، لاپ موقدّس قوربانلاریما توخونمایاجاقلار. اتدئکلری ائیرنج عمل‌لرئنئن روسوایچیلیغینی چکه‌جکلر. 14آمّا حله ده معبدئن خئدمت وظئفه‌سئنی و اورادا گؤرولَن بوتون ائشلری اونلارا تاپشیراجاغام.
15آنجاق ائسرایئل اؤولادلاری منی قویوب یولدان آزدیغی زامان، موقدّس مکانیمین خئدمت وظئفه‌سئنی یرئنه یتئردئیی صادوق نسلئندن لاوئلی کاهئنلر حوضورومدا خئدمت اتمک اوچون منه یاخینلاشاجاق. اونلار پئی و قان تقدئم اتمک اوچون حوضوروما چیخاجاقلار.“ پروردئگار رب بویورور. 16”اونلار موقدّس مکانیما گئره‌جکلر، حوضورومدا خئدمت اتمک اوچون سوفره‌مه یاخینلاشیب امرئمی یرئنه یتئره‌جکلر.
17کاهئنلر، ائچه‌ری حیطئن دروازالاریندان گئره‌جکلری زامان، گرک کتان پالتار اَیئنلرئنده اولسون، ائچه‌ری حیطئن دروازالاریندا و یا معبدده خئدمت اِدَرکَن یون پالتار گِیمه‌سئنلر. 18باشلارینا کتان عمّامه ساریسینلار، بِل‌لرئنه کتان آلت پالتاری گِیسئنلر. بدنلرئنی تَرله‌دن بئر شی گِیمه‌سئنلر. 19باییر حیطده، باییر حیطده اولان خالقین یانینا چیخمادان قاباق، او پالتارلاری کی، خئدمت اِدَرکَن اَیئنلرئنده وار ائدی، چیخاردیب موقدّس اوتاقلارا قویسونلار و باشقا پالتارلار گِیسئنلر کی، پالتارلاری ائله خالقی تقدئس اتمه‌سئنلر. 20کاهئنلر باشلارینی قیرخماسینلار، ساچلارینی اوزاتماسینلار، فقط ساچلارینی کَسئب دوزَ‌لتسئن. 21هچ بئر کاهئن، ائچه‌ری حیطه گئره‌جیی واخت، شراب ائچمه‌سئن.
22کاهئنلر دول و یا بوشانمیش آرواد آلماسینلار، آمّا ائسرایئل نسلئندن اولان بئر باکئره قیز، یا دا باشقا کاهئندن دول قالمیش آروادی آلا بئلرلر. 23اونلار منئم خالقیما موقدّس اولان شیی عادی شیدن، نجئس شیی تمئز شیدن آییرماغی اؤیرَده‌جکلر. 24موباحئثه‌لی ائشلرده اونلار داور اولاجاقلار؛ حؤکملرئمه گؤره قرار ورمه‌لی‌دئرلر. بایراملاریملا باغلی، قایدا-قانونلاریما عمل اتمه‌لی، سَبّت گونلرئمی موقدّس سایمالی‌دیرلار.
25کاهئن بئر اؤلویه یاخینلاشیب اؤزونو نجئسلَمه‌سئن، آمّا اگر اؤلو آناسی، آتاسی، اوغلو، قیزی، قارداشی و یا باکئره سوبای باجیسی اولسا، اؤزونو نجئسلَیه بئلر. 26پاک اولدوقدان سونرا حله یدّی گون گؤزله‌سئن. 27معبدده خئدمت اتمک اوچون ائچه‌ری حیطه گئره‌جیی گون، اؤزو اوچون بئر گوناه قوربانی تقدئم اتسئن.“ پروردئگار رب بله بویورور.
28”کاهئنلرئن ائرثی وار: اونلارین ائرثی منم. ائسرایئلده اونلارا مولک ورمه‌یئن. اونلارین مولکو منم. 29کاهئنلر تاخیل تقدئملرئنی، گوناه و تقصئر قوربانلارینی یِسئنلر. ائسرایئلده ربّه وقف اولونان هر شی اونلارینکی اولسون. 30بوتون نوبارلارین لاپ یاخشیسی و بوتون خوصوصی هدئیّه‌لرئنئز کاهئنلرئنکی اولسون. تاخیلینیزین ائلکئنی اونلارا ورئن کی، اِوئنئزه برکت یاغسین. 31کاهئنلر اؤلو حالدا تاپیلمیش و یا وحشی حیوانلار طرفئندن پارچالانمیش هچ بئر قوش و حیوان یِمه‌سئنلر.
Currently Selected:
حِزِقیال 44: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
