عاموس 5
5
ائسرایئلئن گوناهی اوچون مرثئیه
1ای ائسرایئل نسلی، سئزئن باره‌نئزده مرثئیه کئمی اوخودوغوم بو سؤزلری اِشئدئن!
2”باکئره قیز ائسرایئل ییخیلیب،
بئر داها قالخمایاجاق.
اؤز تورپاغی اوسته سَرئلمئش بوراخیلیب،
اونو قالدیران یوخدور.“
3چونکی پروردئگار رب بله دیئر:
”ائسرایئل نسلئندن، بئر شهردن مئن نفر دؤیوشه چیخسا،
یوز نفری صاغ قالاجاق،
یوز آدام دؤیوشه چیخسا،
اون نفر صاغ قالاجاق.“
4رب ائسرایئل نسلئنه بله دیئر:
”منه طرف دؤنون کی، صاغ قالاسینیز!
5بِیت‌ائله دؤنمه‌یئن،
گئلگالا گتمه‌یئن،
بئرشئبایا کچمه‌یئن،
چونکی گئلگال قطعن اسئرلئیه گده‌جک،
بِیت‌ائل بئر هِچه دؤنه‌جک.“
6ربّه طرف دؤنون کی، صاغ قالاسینیز!
یوخسا او، اود کئمی آلیشیب آلوولانار، ای یوسئف نسلی،
بِیت‌ائلی یاندیریب یاخار، سؤندورن ده اولماز.
7ای عدالتی چِوئرئب آجی یووشان ادنلر،
ای صالحلئیی یِره چیرپانلار!
8اودور اولکَر و اوریون بورجلرئنی یارادان،
قارانلیغی آیدین سحره چِوئرَن،
گوندوزو گجه ادئب قارالدان،
دهنز سولارینی امری ائله یِر اوزونه تؤکَن -
اونون آدی ربدئر.
9اودور کی، گوجلولری ائلدیریم کئمی محو ادر،
اِله کی، قالالار وئران اولسون.
10اونلار حاقسیزلیغا اِعتئراضینی بئلدئرَنلردن نئفرت ادئرلر،
دوز دانیشانلاردان ائیره‌نئرلر.
11کاسیبی آیاق آلتینا سالدیغینیزا گؤره،
اوندان تاخیل ائسته‌دئیئنئزه گؤره،
یونولموش داشدان اِولر تئکئب،
اونلارین ائچئنده یاشامایاجاقسینیز.
گؤزل اوزوملوکلر سالیب،
اونلارین شرابینی ائچمَیه‌جکسئنئز.
12چونکی تقصئرلرئنئزئن چوخ اولدوغونو،
گوناهلارینیزین آغیر اولدوغونو بئلئرم.
ای صالح آدامی ائنجئدنلر، روشوت آلانلار،
مؤحتاجلارین حاقّینی اونلاردان اسئرگه‌یَنلر!
13بو زمانه او قدر پئسدئر کی،
آغلی باشیندا اولان ساکئت اولور.
14پئسلئکدن یاخشیلیغا دؤنون کی، صاغ قالاسینیز!
بله‌جه ائدّئعا اتدئیئنئز کئمی
قوشونلار تاریسی رَب،
حقئقتن، سئزه یار اولاجاق.
15پئسلئکدن نئفرت ادئن،
یاخشیلیغی سِوئن،
محکمه‌ده عدالته اوستونلوک ورئن.
بلکه قوشونلار تاریسی رب
قالان یوسئف اؤولادلارینا لوطف اِدَر.
16قوشونلار تاریسی پروردئگار رب بله دیئر:
”بوتون میدانلاردان فغان قوپاجاق،
بوتون کوچه‌لرده وای-وای سَسی قالخاجاق.
کَندلی‌لر یاس توتماغا،
مرثئیه اوخویانلاری دا فغان اتمیه چاغیریلاجاقلار.
17بوتون اوزوم باغلاریندان دا فغان قوپاجاق،
چونکی آرانیزدان من کچه‌جیم.“ رب بله دیئر.
ربّئن گونو، ظولمت گونودور
18وای حالینیزا، ای ربّئن گونونون حسرتئنی چَکَنلر!
ربّئن گونونو نه اوچون گؤزله‌یئرسئنئز؟
او گون ائشیق یوخ، قارانلیق اولاجاق.
19شئردن قاچان آدامین قاباغینا آیی نجه چیخارسا،
و یا اِوه گلئب اَلئنی دووارا دایانانی ائلان نجه سانجارسا،
20ربّئن گونو ده اِله‌جه ائشیق یوخ، قارانلیق مگر اولمایاجاق؟
مگر ظولمت، مگر ائشیقسیز اولمایاجاق؟
21رب بله دیئر:
”بایراملارینیزدان نئفرت ادئرم،
اونلاری ردّ ادئرم،
طنطنه‌لی ییغینتی‌لارینیزدان خوشلانمیرام.
22منه یاندیرما قوربانلارینیزی،
تاخیل تقدئملرئنئزی گتئره‌سئنئز ده، قبول اتمیه‌جیم.
منه کؤکَلدئلمئش حیوانلارینیزدان
باریش قوربانی تقدئم اده‌سئنئز ده،
اونلارا نظر سالمایاجاغام.
23گورولتولو نغمه‌لرئنئزی مندن اوزاق ادئن!
چَنگلرئنئزئن سَسئنه قولاق آسمایاجاغام.
24لاکئن قوی عدالت سولار کئمی تؤکولسون،
صالحلئک دایئمن سل کئمی آخسین!
25ای ائسرایئل نسلی،
قیرخ ائل صحرادا اولاندا، مگر منه قوربان و تقدئملر گتئرمئشدئنئز؟
26اؤز دوزه‌لتدئیئنئز سئکّوت پادشاهینیزی،
کئیّون بوتلرئنئزی، اولدوز آللاهلارینیزی اؤزونوزله گتئرمئشدئنئز.
27اِله بونا گؤره ده سئزی
دَمَشقئن او تایینا اسئرلئیه آپاراجاغام.“ رب بله دیئر.
اونون آدی قوشونلار تاریسی‌دیر.
Currently Selected:
عاموس 5: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
