Lom 1

Pɔlu fɔkpaa Lomadeɔwa

1Ma Pɔlu, Kilisi Yesu zɔblena, Lua ma sisi à ma dilɛ a zĩna ũ baona 2pɔ à dɔ̀aa à a lɛgbɛ̃̀ a ãnabiɔnɛ, aa kɛ̃̀ a yã taalau kpana ũ. 3-4Aà Nɛ Yesu Kilisi wá Dii yã mɛ́ baonapi ũ. Aà dɛa gbɛ̃nazĩna ũ guu à bɔ̀ Davidi bui guuɛ. Aà luakɛ guu sɔ̃ aà bɔa gau ń gbãao mɛ́ ɔlɔ̀wɛ̃ɛ kɛ́ Lua Nɛn aà ũ. 5Ɔ̃mɛ gbɛ̃kɛkɛ̀wɛ̃ɛ à wa zĩ bui piiwa, kɛ́ aa a naaikɛ, aai gɔ̃ a yãmanaɔ ũ, i tɔbɔ. 6Á ku ń guu sɔ̃, á gbɛ̃́ pɔ Yesu Kilisi á sisì à á sɛ́ɔ. 7Mamɛ ma lápi kɛ̃̀ á Lomade pɔ Lua yeázi à á sisì a á sɛ́ a gbɛ̃́ɔ ũɔnɛ pii. Lua wá Mae ń Dii Yesu Kilisio gbɛ̃kɛkɛɛ́, aai á gba aafia.

8Sɛ̃ia gĩ́a ma Lua saaukɛ̀ ń Yesu Kilisi gbãao á yãmusu ápii, kɛ́ á luanaaikɛa lì dũniaa pii yãi. 9Lá malɛ wabikɛ pii, á yã lí sãmaguo. Lua mɛ́ ma seelade ũ. Aapi malɛ zɔbleɛ̀ ń nɔsɛmɛndoo, malɛ aà Nɛ baokpa. 10Miɔ wabikɛwà aà zɛkɛkɛmɛɛ lá a yeiwa, kɛ́ mà e mà mɔ á gwai sa, 11asa wɛsiaálɛ ni lɛ́ ma dɛ maamaaɛ, kɛ́ mà Lua Nisĩna gbae daɛ́ á zɛdɔa yãi. 12Beewa á luanaaikɛa ń ma pɔo a wá baade gba sɔ̃̀. 13Ma gbɛ̃́ɔ, má ye àɔ dɔ̃ kɛ́ miɔ dilɛ mɔɔmɔɔ mà mɔ á gwai#Zĩn 19.21 kɛ́ mà a zĩ gbɛ'e á guu, lá má è buipãleɔ guuwa, ãma e tia mi zɛ'e mà mɔo.

14Gɛlɛkiyãmanaɔ ń gɛlɛkiyãmansaiɔ pii, ladɔ̃naɔ ń ladɔ̃nsaiɔ pii, an yã gɔ̃̀ ma yã ũɛ. 15Bee yãi ma mɛ wã̀ mà baonapi kpá á Lomadeɔnɛ sɔ̃. 16Mili widɛ ń baonapi yãoo.#Maa 8.38 Ɔ̃mɛ gbãa pɔ Lua ì gbɛ̃́ pɔ aalɛ a naaikɛɔ suabaò ũ, atɛ̃sa Yudaɔ, an gbɛa buipãleɔ. 17Baonapi lɛ́ owɛ̃ɛ lá Lua ì to yã bɔńnɔ na. A dɛ luanaaikɛa yã ũ adoɛ, lá wa kɛ̃̀wa wà mɛ̀: Gbɛ̃́ pɔ Lua tò yã bɔ̀aanɔ na a naai pɔ àlɛ kɛ yãi aɔ ku.#Hab 2.4

Gbɛ̃nazĩnaɔá taaedeɔnɛ Luaɛ

18Za musu ɔ̃ Lua ì pɔkũmabɔbɔ gbɛ̃nazĩna pɔ an vãikɛa ì zɛzɔ̃ sĩanaɛɔwa an pãkpaaazi ń ń vãikɛao yãi. 19Yã pɔ wa dɔ̃ Lua musu ulɛanɛ́o, Lua mɛ́ yãpi bɔ̀nɛ́ gupuau. 20Za gɔɔ pɔ à dũnia kàlɛ, aà gbãa laasai ń aà luakɛ pɔ wìli e ń wɛ́oo bɔ̀ gupuau aà zĩɔ guu wasawasa. Ayãmɛto gbɛ̃nazĩna awakpaa vĩo. 21Aa Lua dɔ̃, ãma aali aà kpɛla a zɛ́wa aa aà saaukpào. An laasooɔ sɔũkũ̀, ɔ̃ aa gɔ̃̀ gusiau an misai yãi.#Ɛfɛ 4.17-18 22Aa ńzĩa dìlɛ ɔ̃nɔnaɔ ũ, ɔ̃ aa sɔũkũ̀. 23Aaì kulɛ pɔ pɔ ì ga taaɔnɛ, gbɛ̃nazĩnaɔ ń bãɔ ń nɔbɔɔ ń pɔtaa'onkuawaɔ Lua pɔ lí gao gbɛu.#Iko 4.16-18

24Ayãmɛto Lua ń kpá gbãsĩkɛaa#Soũ 81.13, aa wisaiyã kɛ ń kɔ̃o, lá aalɛ a nidɛ ń nɔ̀sɛ guuwa. 25Aa Lua sĩande lɛũkpakɛ̀ ń ɛɛo. Aaì kulɛ Lua pɔkɛaɔnɛ aa zɔblenɛ́ Lua pɔ pɔpii kɛ̀ gbɛu. Ɛfãaiden aà ũ gɔɔpii! Ãmi.

26Ayãmɛto Lua ń kpá wisaiyã nidɛaa. Baa an nɔɛɔ, aa yã pɔ wì kɛ lɛũkpakɛ̀ ń yã pɔ wìli kɛoo. 27Màa gɔ̃ɛɔ lɔ, aa yã pɔ wì kɛ ń nɔɛɔ tò, ɔ̃ aaì luakɔ̃i. Gɔ̃ɛ ń gɔ̃ɛo aaì wisaiyã kɛ ń kɔ̃o, aaì a gbɛ'e ńzĩawa an sãsãa lɛu. 28Lá aai we zɛ̀ ń Lua dɔ̃aoo, ɔ̃ à ń kpá laasookpaanlayãa, kɛ́ aaɔ yã pɔ dɛ wà kɛoɔ kɛ. 29Yãvãi pii pɛ̀ɛmá: Nɔsɛpãsĩ, bĩi, ĩisɛa ń kɔ̃o, wɛdɔakɔ̃ɛ, gbɛ̃́dɛa, sole, gbɛ̃blea ń kɔ̃nikɛanɛ́o. Gupɛaanaɔn ń ũ, 30gbɛ̃yaanaɔ, Lua ibɛɛɔ, gbɛ̃taiinkɛnaɔ, yɔ̃ɔdeɔ, ĩandãnaɔ, vãi laasookɛnaɔ, de ń dao yãmansaiɔ, 31yãgbadɔ̃saideɔ, naaisaideɔ, gbɛ̃yãkɛnsaiɔ, sosobisaideɔ. 32Aa dɔ̃ Lua dìlɛ kɛ́ yãbeetaakɛnaɔ kà wà ń dɛdɛ, kási aali zɛ ń a kɛao adoo, aaì tɛkpa a kɛnaɔgu lɔɛ.

Currently Selected:

Lom 1: Boo2024

Highlight

Copy

Compare