Mat 9

Gbɛ̃́ kaaũa gbãgbãa

(Maa 2.1-12; Luk 5.17-26)

1Yesu gɛ̃̀ gó guu, à ɛ̀a bùa isidawa, à kà a bɛ wɛ̃lɛu.#Mat 4.13 2Ɔ̃ wà mɔ̀ɛ̀ ń gbɛ̃́ kaaũao wulɛa makɛlɛu. Kɛ́ Yesu è gbɛ̃́piɔ a naai vĩ, ɔ̃ a ò gbɛ̃́ kaaũapiɛ: Ma gbɛ̃́, sɔ̃dilɛ! N duuna kɛ̃̀ma. 3Mɔizi ikoyãdanɛdeeɔ ku we, ɔ̃ aa ò ń sɔ̃ guu: Gbɛ̃́pi lɛ́ dɔɛ ń Luaoɛ. 4Yesu ń laasoo dɔ̃̀, ɔ̃ à ń lá à mɛ̀: Bɔyãi a laasoo vãi dà á sɔ̃ guui? 5Tó má ò aà duuna kɛ̃̀wà, ge tó má ò aà fɛlɛ taa'o, a kpele mɛ́ àai? 6Má ò màa kɛ́ àɔ dɔ̃ Gbɛ̃nazĩn Nɛ duunakɛ̃ama iko vĩ dũniauɛ. Ɔ̃ a ò gbɛ̃́ kaaũapiɛ: Fɛlɛ ǹ n makɛlɛ sɛ ǹ ta bɛ. 7Ɔ̃ à fɛ̀lɛ tà a bɛ. 8Kɛ́ bila è màa, vĩa ń kṹ, aa Lua pɔ iko bee taa kpà gbɛ̃nazĩnaɔwa saaukpà.

Matie sisia

(Maa 2.13-17; Luk 5.27-32)

9Yesu bɔ̀ we àlɛ gɛ̃, ɔ̃ à gbɛ̃́ pɔ wì mɛ Matie è zɔ̃lɛa a ɔsikpɛu. Yesu òɛ̀: Mɔ ǹ tɛmazi. Ɔ̃ a tɛaazi. 10Kɛ́ Yesu lɛ́ pɔble aà bɛ, ɔsinaɔ ń luayãdansaiɔ ku we dasi, aalɛ pɔbleaanɔ ń aà iwaɔ sãnu. 11Kɛ́ Falisiɔ è màa, ɔ̃ aa aà iwaɔ là aa mɛ̀: Bɔyãi á dii lɛ́ pɔble ń ɔsinaɔ ń luayãdansaiɔi? 12Kɛ́ Yesu yãpi mà à mɛ̀: Gbɛ̃́ gbãa bàa ku ń lootoooo, sema gyãe. 13À gɛ laasookɛ yãɛ bee miwa, wà mɛ̀:

Gbɛ̃kɛkɛakɔ̃ɛ ɔ̃ má yei,

i kɛ sa'oa no.#Oze 6.6

Mi mɔ gbɛ̃maaɔ sisiio, sema duunkɛnaɔ.

Lɛyea

(Maa 2.18-22; Luk 5.33-39)

14Ɔ̃ Zãa Da'ilɛna iwaɔ mɔ̀ aa Yesu là aa mɛ̀: Bɔyãi wapiɔ ń Falisiɔ, wiɔ lɛye mɔɔmɔɔ, mɛ́ n iwaɔ lí ye sɔ̃o? 15Ɔ̃ Yesu yãlɛ̀ɛũnɛ́ à mɛ̀: Nɔsɛna gbɛ̃́ɔ pɔsiakɛ gɔɔ pɔ a kuńnɔ nɔsɛ guue? Aawo, ãma a gɔɔ lɛ́ mɔ́ kɛ́ wa nɔsɛnapi bɔ ń guu, gɔɔ bee ɔ̃ aa lɛye sa. 16Gbɛ̃e lí pɔlɛ dafu di pɔkasa ziuo, asa a dafu a sɔ̃ɔuɛ, aai kɔ̃ga, a yaaa i kãfĩ. 17Wìli vɛ̃ɛ dafu ká báa tuu zi guuo. Tó wa kɛ̀ màa, tuupi a pũnaɛ, vɛ̃ɛ i kɔlɛ, tuu i ɔ̃ɔkpa. Aawo, wì vɛ̃ɛ dafu ká báa tuu dafu guuɛ, an kee a ɔ̃ɔkpao.

Nɛnɔɛna vua ń nɔɛ pɔ ɔkã̀ Yesu ulawao

(Maa 5.21-43; Luk 8.40-56)

18Gɔɔ pɔ Yesu lɛ́ yãpiɔ onɛ́, gbãadee mɔ̀ kùlɛɛ̀ à mɛ̀: Ma nɛnɔɛna kɛ̀sai tia. Mɔ ǹ ɔnawà, i vu. 19Ɔ̃ Yesu fɛ̀lɛ tɛ̀aazi ń a iwaɔ.

20Nɔɛe ku we, au lɛ́ bɔlɛwà, à kà wɛ̃̀ kuɛpla. À mɔ̀, à ɔkã̀ Yesu ula lɛ́wa aà kpɛ. 21Asa nɔɛpi lɛ́ mɛ: Baa tó ma ɔkã̀ aà ulawa lé, má gbãgbãɛ. 22Kɛ́ Yesu lìli à aà è, ɔ̃ à mɛ̀: Sɔ̃dilɛ, nɔɛ! Ma naai pɔ ń kɛ̀ mɛ́ n gbãgbã̀. Wegɔ̃ɔ nɔɛpi gbã̀gbã.

23Kɛ́ Yesu kà gbãadepi bɛ, a è wàlɛ kulɛpɛ, bila kɔ̃fĩ dɔ. 24Ɔ̃ Yesu mɛ̀: À ázĩa gá. Nɛnɔɛnapi i gao, àlɛ i'oɛ. Ɔ̃ aalɛ Yesu kɛ pɔɔpɔɔ. 25Kɛ́ wà bila gbàɛ, ɔ̃ Yesu gɛ̃̀ kpɛ́u à nɛpi ɔ kũ̀, ɔ̃ à fɛ̀lɛ. 26Ɔ̃ yãpi bao lì busupia pii.

Vĩ̀aɔ gbãgbãa

27Kɛ́ Yesu bɔ̀ we, vĩ̀a gbɛ̃ɔn plaɔ tɛaazi ń wiio aalɛ mɛ: Wá wɛ̃nagwa, Davidi Bui! 28Kɛ́ Yesu kà bɛ, vĩ̀apiɔ sɔ̃̀aazi, ɔ̃ à ń lá à mɛ̀: Á ma naai vĩ kɛ́ má fɔ̃ mà yãpi kɛɛ́a? Aa wèwà aa mɛ̀: Ao, Dii. 29Ɔ̃ à ɔnàna ń wɛ́wa à mɛ̀: A kɛɛ́ lá álɛ ma naaikɛwa. 30Ɔ̃ an baade wɛ́ wɛ̃̀. Yesu ń lɛ́ pàpa à mɛ̀: Ásu o gbɛ̃e mao. 31Ń beeo aa gɛ̀ aa aà bao fã̀aa busupiu pii.

Yesu wɛ̃nadɔ̃a gbɛ̃́ɔnɛ

32Gɔɔ pɔ vĩ̀apiɔ lɛ́ bɔlɛ, ɔ̃ wà mɔ̀ Yesuɛ ń tãade lɛ́na naalɛao. 33Kɛ́ Yesu aà tãa gòɛ̀, ɔ̃ à yã'ò. Yãpi bɔ̀ bila saɛ aa mɛ̀: Wi yã bee taa e Isaili busuu yãao. 34Ɔ̃ Falisiɔ mɛ̀: Ì tãago ń tãaɔ kia gbãaoɛ.

35Yesu ìɔ mɛɛwiaɔ ń zɔ̃ɛwiaɔ kɛɛlɛ pii, ìɔ yãdanɛ́ ń luasisikpɛɔ guu, ìɔ kia pɔ Lua kpà baokpa, ìɔ gbɛ̃́ɔ gbãgbã ń gyã bui piio ń gbɛ̃kaaũaɔ pii.#Mat 4.23 36Kɛ́ à bila è, ɔ̃ aa kɛ̀ɛ̀ wɛ̃naũ, asa aa kpasaa mɛ́ aa liaaa lan pɔ pɔ aa dãna vĩoɔwaɛ.#Nao 27.17; 1 Kia 22.17 37Ɔ̃ Yesu ò a iwaɔnɛ: Pɔkɛkɛa zɔ̃ɔ mɛ́ zĩkɛnaɔ dasio. 38À wabikɛ Buadewa aà zĩkɛnaɔ gbaɛ pɔkɛkɛi.

Currently Selected:

Mat 9: Boo2024

Highlight

Copy