Mat 8

Kusude gbãgbãa

(Maa 1.40-45; Luk 5.12-16)

1Kɛ́ Yesu pìla sĩ̀sĩwa, bila tɛaazi. 2Ɔ̃ kusude mɔ̀ kùlɛ aà aɛ à mɛ̀: Dii, tó n wei, ńyɔ̃ fɔ̃ ǹ gbãbɔmɛɛ. 3Yesu ɔbɔ̀ a nàwà à mɛ̀: Ma wei. Gɔ̃ gbãlɛsai. Wegɔ̃ɔ gɔ̃ɛpi kusu làa. 4Ɔ̃ Yesu òɛ̀: Ma. Nsu o gbɛ̃e mao. Gɛ ǹ nzĩa ɔlɔ sa'onaɛ, ní sa pɔ Mɔizi dìlɛ o n gɔ̃a gbãlɛsai seela ũ gbɛ̃́ɔnɛ.#Lev 14.2-4

Sosaɔ gbɛ̃zɔ̃ɔ zĩkɛna gbãgbãa

(Luk 7.1-10)

5Kɛ́ Yesu lɛ́ gɛ̃ Kapɛnaũ, ɔ̃ sosaɔ gbɛ̃zɔ̃ɔ mɔ̀ aà kĩi, à wabikɛ̀wà 6à mɛ̀: Dii, ma zĩkɛna wulɛa bɛ, à kàaũ, àlɛ wãwãkɛ maamaaɛ. 7Ɔ̃ Yesu òɛ̀: Má gɛ mà aà gbãgbã. 8Ɔ̃ gbɛ̃zɔ̃ɔpi òɛ̀: Dii, mi ka ǹ gɛ́ ma bɛo. Baa tó n yã'ò, ma zĩkɛna a gbãgbã. 9Mapi, wa iko vĩaɛ, mɛ́ má iko vĩ sosaɔwa. Mi o an gbɛ̃doɛ aà gɛ́ le, ì gɛ́. Mi o a pãleɛ aà mɔ kɛ, ì mɔ́. Mi o ma zĩkɛnaɛ aà kɛ kɛ́wa, ɔ̃ ì kɛ.

10Kɛ́ Yesu yãpi mà, à bɔ̀ aà saɛ, ɔ̃ a ò gbɛ̃́ pɔ aa tɛaziɔnɛ: Sĩana malɛ oɛ́, mi e gbɛ̃e ma naaikɛ̀ kɛ́wa Isailiɔ guuo. 11Malɛ oɛ́, wa bɔ gukpɛ ń bɛ'aɛo dasidasi, wa mɔ blɛblei ń Ablahaũo ń Izaakio ń Yakɔbuo kpala pɔ Lua kpà guu. 12Gbɛ̃́ pɔ aa dɛ kpala nɛɔ ũ yãaɔ sɔ̃, wa ń zu bàasi gusiauɛ. We aa ɔdiu ń musu. 13Ɔ̃ Yesu ò sosaɔ gbɛ̃zɔ̃ɔpiɛ: Ta bɛ. À kɛnɛ lá n ma naaikɛ̀wa. Ɔ̃ aà zĩkɛnapi gbã̀gbã zaapiwa gɔ̃̀ɔ.

Yesu gyãeɔ gbãgbãa dasidasi

(Maa 1.29-34; Luk 4.38-41)

14Yesu gɛ̀ Piɛɛ bɛ, ɔ̃ a è aà nada wulɛa, àlɛ mɛwãakɛ. 15Kɛ́ à ɔkã̀ aà ɔwa, aà mɛ nìni, ɔ̃ à fɛ̀lɛ à blɛkɛ̀ɛ̀.

16Kɛ́ oosi kɛ̀, ɔ̃ wà mɔ̀ Yesuɛ ń tãadeɔ dasidasi, ɔ̃ à tãapiɔ gògomá n yã'oao, à gyãeɔ gbã̀gbã pii. 17Màa yã pɔ ãnabi Isaia ò kɛ̀ à mɛ̀:

À wá gbãasaikɛ sɛ̀,

à wá gyãɔ gòwá.#Isa 53.4

Gbɛ̃́ pɔ aa tɛ Yesuziɔ

(Luk 9.57-62)

18Kɛ́ Yesu è bila kã̀aaazi, ɔ̃ a ò a iwaɔnɛ: Wà bua isida baale. 19Ɔ̃ Mɔizi ikoyãdanɛdee mɔ̀ a ò Yesuɛ: Mɛtulu, gu pɔ nlɛ gɛ́u pii máɔ tɛnziɛ. 20Ɔ̃ Yesu òɛ̀: Gbɛ̃gbonaɔ ń tòo vĩ, bãɔ ń sakpɛ vĩ, Gbɛ̃nazĩn Nɛ sɔ̃ a ĩampakĩi vĩo.

21Ɔ̃ iwa pãle òɛ̀: Dii, to e ma de'ia kpagui gĩ́a. 22Ɔ̃ Yesu òɛ̀: Tɛmazi. To gɛɔ ń gɛɔ vĩ.

Yesu zaa'ĩana zɛa

(Maa 4.35-41; Luk 8.22-25)

23Yesu gɛ̃̀ go'ilɛna guu, ɔ̃ aà iwaɔ dà zɛ́uaanɔ. 24Kãndo zaa'ĩan gbãa kàka isidaa, í vĩ̀vĩ lɛ́ pɛlɛpɛlɛ ń góu. Yesu lɛ́ i'o, 25ɔ̃ aà iwaɔ sɔ̃̀aazi, aa aà vù aa mɛ̀: Dii, wá suaba, wálɛ kaalɛɛ. 26Ɔ̃ Yesu ònɛ́: Luanaaifɛ̃nɛndeɔ! Bɔyãi á sea vĩ màai? Ɔ̃ à fɛ̀lɛ gì ĩanaɛ ń ío, ɔ̃ gu kɛ̀ kílikili.#Soũ 107.28-29 27Yãpi bɔ̀ gbɛ̃́piɔ saɛ aa mɛ̀: Gbɛ̃́ kpeletaan wei? Baa ĩana ń ío aaì aà yãmaɛ.

Tãaɔ dia sawaɔnɛ

(Maa 5.1-20; Luk 8.26-39)

28Kɛ́ Yesu bùa baale Gadala busuu, tãade gbɛ̃ɔn plaeɔ bɔ̀ gbɛ'ɛ pɔ dɛ mia ũɔ guu, aa mɔ̀ dàaalɛ. Aa pãsĩ maamaaɛ, gbɛ̃e lí fɔ̃ zɛ́pi sɛ̀o. 29Kɛ́ aa aà è, aa wiilɛ̀ aa mɛ̀: Bɔmɛ wá daai, Lua Nɛ? N mɔ ĩadaiwála e a gɔɔ àɔ ka yã? 30Sawakusan waiɔ kuńnɔ kãaa, aalɛ pɔble. 31Ɔ̃ tãapiɔ awakpà Yesuɛ aa mɛ̀: Tó n wá yá, wá gbaɛ sawa wai keeɔ guu. 32Ɔ̃ Yesu ònɛ́: À gɛ́. Ɔ̃ aa gò gbɛ̃́piɔwa, aa dì sawaɔnɛ. Ɔ̃ sawa waipiɔ wì ń bao pii, aa pìla sòonawa aa sì isidau, ɔ̃ aa gàga í guu we. 33Ɔ̃ sawadãnaɔ baalɛ̀ tà wɛ̃lɛ guu, aa yãpiɔ dàu aa sìunɛ́ ń yã pɔ tãadepiɔ lèo pii. 34Ɔ̃ wɛ̃lɛdeɔ bɔ̀lɛ aa gɛ̀ dai Yesulɛ mpii. Kɛ́ aa aà è, aa awakpàɛ̀, aa mɛ̀ aà bɔnɛ́ ń busuu.

Currently Selected:

Mat 8: Boo2024

Highlight

Copy