Mat 5

Baaadeɔn Yesu iwaɔ ũ

(Luk 6.20-23)

1Kɛ́ Yesu bilapi è, à dɛ̀dɛ sĩ̀sĩwa. Kɛ́ à zɔ̃̀lɛ, aà iwaɔ mɔ̀ aà kĩi, 2ɔ̃ à nà yãdaanɛ́wa à mɛ̀:

3Gbɛ̃́ pɔ aa ń gbãasaikɛ dɔ̃ɔ mɛ́ baaadeɔ ũ,

asa kpala pɔ Lua kpà dɛ an pɔ ũɛ.

4Pɔsiadeɔ mɛ́ baaadeɔ ũ,

asa Lua a ń sɔ̃ nininɛ́ɛ.#Isa 61.2

5Zĩabusanaɔ mɛ́ baaadeɔ ũ,

asa aamɛ aaɔ dũnia vĩ.#Soũ 37.11

6Baaadeɔn yãzɛde nidɛnaɔ ũ,

asa aamɛ aa kã́.#Isa 55.1-2

7Baaadeɔn wɛ̃nadɔ̃nɛdeɔ ũ,

asa Lua a wɛ̃nadɔ̃nɛ́ɛ.

8Baaadeɔn nɔsɛpuadeɔ ũ,

asa aamɛ aa wɛsi Lualɛ.#Soũ 24.3-4

9Baaadeɔn ibɛlɛmidɛnaɔ ũ,

asa wali onɛ́ Lua nɛɔɛ.

10Baaadeɔn gbɛ̃́ pɔ wì ĩadamá yãkɛa a zɛ́wa yãiɔ ũ,

asa kpala pɔ Lua kpà dɛ an pɔ ũɛ.

11Baaadeɔn á ũ, tó wà á sɔ̃sɔ̃̀ mɛ́ wà ĩadàwá, mɛ́ wà yãvãi pii dɔ̀wá ma yãi. 12À pɔnakɛ, í yaalɔ, asa á asea zɔ̃ɔ luabɛ. Màa wà ĩadà ãnabi pɔ aa ku á ãaɔwa.

Yesu iwaɔ mɛ́ wìsi ń gupuauo ũ

(Maa 9.50; Luk 14.34-35)

13Ámɛ á wìsi ũ dũniaɛ. Tó wìsi í na sù tà, kpelewa wa kɛ à gɔ̃ wìsi ũ lɔi? Aɔ aie vĩ lɔo, sema wà kɔlɛ wàɔ taa'owà baasio.

14Ámɛ á gupua ũ dũniaɛ. Wɛ̃lɛ pɔ wa kàlɛ sĩ̀sĩ musu lí e àɔ ulɛao. 15Wìli filia na wà pɛ̃na kùlɛwào. Wì di dauwaɛ, i gupu gbɛ̃́ pɔ ku uaɔnɛ. 16À gupu gbɛ̃́ɔnɛ beewa, aai á maakɛaɔ e, aai á Mae pɔ ku musu saaukpa.#1 Piɛ 2.12

Mɔizi ikoyã bɔɔlɛkɛa

17Ásu àɔ e ma mɔ Mɔizi ikoyã ń ãnabiɔ yãɔ bãdɛi no. Mi mɔ a kee bãdɛio, ma mɔ papaiɛ. 18Sĩana malɛ oɛ́, musu ń dũniao a gɛ̃, ãma luayãtaala wɛ̃sã nɛna ge a pɔ kelenae a bãdɛo, yãpii a kɛ. 19Ayãmɛto tó gbɛ̃́ yã pɔ wa dìlɛpiɔ mɛndo gbàɛ, baa a pɔ pɔ kɛ̃sãańzi, mɛ́ ì da gbɛ̃́ɔnɛ aa kɛ láaawa, ade aɔ kɛ̃sãańzi kpala pɔ a bɔ Lua kĩi guuɛ. Tó gbɛ̃́ kũa mɛ́ ì danɛ́ wàɔ kũa, ade aɔ zɔ̃ɔ kpala pɔ a bɔ Lua kĩi guuɛ. 20Malɛ oɛ́, tó á maa i dɛ Mɔizi ikoyãdanɛdeɔ ń Falisiɔlao, á gɛ̃ kpala pɔ Lua kpà guuo.

Pɔkũma

21Á mà wa ò yãadeɔnɛ aasuli gbɛ̃́ dɛo. Gbɛ̃́ pɔ gbɛ̃́ dɛ̀, wa yãkpalɛkɛaanɔɛ.#Bɔa 20.13 22Mapi sɔ̃ malɛ oɛ́, gbɛ̃́ pɔ a pɔ pà a gbɛ̃deezi, à kà wà yãkpalɛkɛaanɔ. Gbɛ̃́ pɔ a gbɛ̃dee sɔ̃̀sɔ̃ kà wà gɛaanɔ gbãadeɔ kĩi. Gbɛ̃́ pɔ ò a gbɛ̃deeɛ misaide sɔ̃ à kà aà gɛ́ tɛ́u. 23Tó n mɔ Lua gbai pɔ aà gbagbakĩi, mɛ́ à dɔ̀ngu wekĩi kɛ́ n gbɛ̃dee yãkũannɔ, 24ǹ n gbapi to sa'okĩi aɛ we, ní gɛ ǹ awakpa gbɛ̃́piɛ gĩ́a, ní ɛa ǹ su ǹ sa'o sa. 25Tó n ibɛɛ ye gɛ́nnɔ yãkpalɛu, kɛ kpakpa kɛaanɔ na e aàɔ da zɛ́u, kɛ́ asu n kpa yãkpalɛkɛnawao yãi. Tó ni kɛ màao, yãkpalɛkɛnapi a n kpa dɔaiwaɛ, i n da kpɛ́u. 26Sĩana malɛ onɛ, ńyɔ̃ bɔ weo e ǹ gɛ ǹ fĩaboò. Baa tãnga a gɔ̃ tɛnzio.

Gbãsĩkɛa

27Á mà wà mɛ̀ ásuli wulɛ ń gbɛ̃pãle nɔoo.#Bɔa 20.14 28Ãma mapi malɛ oɛ́, tó gbɛ̃́ nɔɛ gwà ń laasoo pãleo, à gbãsĩkɛ̀aanɔn we kɔ̀. 29Tó n ɔplaa wɛ́ mɛ́ tò nlɛ fu, bɔ ǹ vũaa. N mɛgue vũaaa maa dɛ wà n mɛ̀ bṹu zu tɛ́ula. 30Tó n ɔplaa mɛ́ tò nlɛ fu, zɔ̃ ǹ vũaa. N mɛgue vũaaa maa dɛ n mɛ̀ bṹu taa tɛ́ula.

Gia nɔzi yã

(Mat 19.9; Maa 10.11-12; Luk 16.18)

31Wa ò lɔ, tó gbɛ̃́ lɛ́ gí a nazi, aà ginzila kpawà.#Iko 24.1-4 32Mapi sɔ̃ malɛ oɛ́, tó gbɛ̃́ gì a nazi, mɛ́ i kɛ à gbãsĩkɛ̀ no, aà zã́pi mɛ́ tò à gɔ̃̀ gbãsĩde ũ. Tó gbɛ̃́ nɔ pɔ wà gìi sɛ̀ sɔ̃, à gbãsĩkɛ̀ɛ.

Lɛkɛa Luawa

33Á mà wa ò yãadeɔnɛ lɔ, aali yã pɔ aa mɛ̀ wa sì ń Luao fĩabo, aasuli bɔ a kpɛo.#Nao 30.3 34Mapi sɔ̃, malɛ oɛ́, ásuli mɛ á sì ń Luao seo. Ásuli mɛ á sì ń luabɛoo, asa Lua kpalabaaɛ, 35ge tɔɔlɛ, asa Lua gbadibɔɛ,#Isa 66.1 ge Yelusalɛũ, asa Kia zɔ̃ɔ wɛ̃lɛɛ.#Soũ 48.3 36Nsu mɛ ń sì ń n mioo, asa ńyɔ̃ fɔ̃ ǹ n mikã mɛndo puakũ ge ǹ a siakũo. 37Àli mɛ ao ge aawo. Yã pɔ dɛ beea bɔ̀ Ibiisi kĩiɛ.

Tɔsiamá

(Luk 6.29-30)

38Á mà wà mɛ̀ wà wɛ́ fĩabo ń wɛ́o, swaa ń swaao.#Bɔa 21.24 39Mapi sɔ̃ malɛ oɛ́, ásuli gí taiinaio. Tó gbɛ̃́ n sãnkɛ n ɔplaa gɛɛwa, ǹ n ɔzɛɛ pɔ dɔɛ̀ lɔ. 40Tó gbɛ̃́ ye yãkpalɛkɛnnɔ n danzii yãi, ǹ n ulada toɛ̀ lɔ. 41Tó gbɛ̃́ teasi dànɛ ǹ asosɛɛ kilo do, gɛ́òɛ̀ kilo pla. 42Tó gbɛ̃́ pɔ wabikɛ̀ma, ǹ aà gba. Nsu gbɛ̃́ pɔ ye pɔ sɛ̃ama tɛ̃o.

Yea ibɛɛzi

(Luk 6.27-28, 6.32-36)

43Á mà wà mɛ̀ àɔ ye á gbɛ̃deezi, à za á ibɛɛgu.#Lev 19.18 44Mapi sɔ̃, malɛ oɛ́, àɔ ye á ibɛɛɔzi, à wabikɛ gbɛ̃́ pɔ aaì ĩadawáɔnɛ, 45í gɔ̃ á Mae pɔ ku musu nɛɔ ũ sĩana. Asa ì to ĩatɛ̃ bɔ gbɛ̃vãiɔnɛ ń gbɛ̃maaɔ piiɛ, ì louma taaesaideɔnɛ ń taaedeɔ piiɛ. 46Tó gbɛ̃́ pɔ yeáziɔ ɔ̃ á yeńzi, á aie e Lua kĩie? Baa ɔsinaɔ lí kɛ màao le? 47Tó á gbɛ̃́ɔ ɔ̃ i fɔkpakpamá ntɛ̃ɛ, bɔ́ á dɛò dãɔlai? Baa luayãdɔ̃nsaiɔ lí kɛ màao le? 48Ayãmɛto àɔ ku wasawasa lá á Mae pɔ ku musu ku wasawasawa.#Lev 19.2

Currently Selected:

Mat 5: Boo2024

Highlight

Copy