Mat 4

Yesu yɔ̃a

(Maa 1.12-13; Luk 4.1-13)

1Ɔ̃ Lua Nisĩna gɛ̀ ń Yesuo gbáau kɛ́ Ibiisi aà yɔ̃. 2Yesu lɛyè fãanɛ ń gwãasĩnao e gɔɔ bla. Kɛ́ nɔana lɛ́ aà dɛ, 3ɔ̃ kɔ̃nidepi sɔ̃̀aazi à mɛ̀: Tó Lua Nɛn n ũ, o gbɛɛ beeɔ li pɛ̃ɛ ũ. 4Yesu wèwà à mɛ̀: A kɛ̃a wà mɛ̀:

Pɔblea yã ɔ̃ gbɛ̃nazĩna kuò adoo,

sema yã pɔ Lua lɛ́ o pii.#Iko 8.3

5Ɔ̃ Ibiisi aà sɛ̀ gɛ̀aanɔ Lua wɛ̃lɛu, à aà zɛ̀ luakpɛ musu, 6a òɛ̀: Tó Lua Nɛn n ũ, ǹ nzĩa zu zĩlɛ, asa a kɛ̃a wà mɛ̀:

A n yã'o a malaikaɔnɛ aa ɔdama,

kɛ́ nsu gɛ̃nalɛ gbɛwao yãi.#Soũ 91.11-12

7Yesu òɛ̀: Wa kɛ̃̀ lɔ wà mɛ̀:

Nsuli Dii n Lua lɛ ǹ gwao.#Iko 6.16

8Ɔ̃ Ibiisi aà sɛ̀ gɛ̀aanɔ lɔ gbɛsĩsĩ lɛsĩ maamaa musu, à dũnia busu pii ɔlɔ̀ɛ̀ ń ń aizɛɛɔ 9à mɛ̀: Má n gba beeɔ piiɛ, tó n wulɛ n gbɛɛu n misìilɛmɛɛ. 10Ɔ̃ Yesu òɛ̀: Gɛi Setãu! Asa a kɛ̃a wà mɛ̀:

Dii n Lua ɔ̃ ńyɔ̃li wulɛɛ̀,

níɔ zɔbleɛ̀ ado.#Iko 6.13

11Ɔ̃ Ibiisi aà tò we. Ɔ̃ malaikaɔ mɔ̀ dɔ̀aalɛ.

Yesu ɔkpaa a zĩwa

(Maa 1.14-20; Luk 5.1-11, 6.17-19)

12Kɛ́ Yesu mà wà Zãa kũ̀, wa dà kpɛ́u, ɔ̃ à tà Galile. 13I zɔ̃lɛ Nazalɛti lɔo, à gɛ̀ zɔ̃̀lɛ isida saɛ Kapɛnaũɛ, Zabulɔni buiɔ ń Nɛfatali buiɔ busuu, 14kɛ́ yã pɔ ãnabi Isaia ò e kɛ yãi à mɛ̀:

15Zabulɔni buiɔ ń Nɛfatali buiɔ busu

za isia oi e Yuudɛ̃ baale,

Galile busu pɔ buipãleɔ kuupi,

16an gbɛ̃́ pɔ ku gusiauɔ gupua zɔ̃ɔ è,

gu dɔ̀ busu pɔ ku ga lɛzĩ deɔnɛ.#Isa 8.23–9.1

17Za gɔɔ bee Yesu nà waasokɛawa ìɔ mɛ̀: À nɔsɛlilɛ, kia pɔ Lua kpà ku kãi.#Mat 3.2

18Kɛ́ Yesu lɛ́ dɔ Galile isidai, à kpɔwɛnaɔ è gbɛ̃ɔn pla, vĩi ń dãunao, Simɔ pɔ wì mɛ Piɛɛ ń a dãuna Ãndeleo. Aalɛ taaluzu isidapiu. 19Ɔ̃ Yesu ònɛ́: À mɔ tɛmazi, mí á kɛ gbɛ̃wɛɛlɛnaɔ ũ. 20Wegɔ̃ɔ aa ń taaluɔ tò we, aa tɛaazi. 21Kɛ́ à gɛ̀ aɛ, à gbɛ̃ɔn pla pãleɔ è, vĩi ń dãunao lɔ, Zebede nɛ Zaki ń a dãuna Zãao. Aa ku go'ilɛna guu ń ń mae Zebedepio, aalɛ ń taaluɔ kɛkɛ. Yesu ń sisì, 22ɔ̃ aa ń mae tò gó guu wegɔ̃ɔ, aa tɛaazi.

23Yesu ìɔ Galile busu kɛɛlɛ, ì yãdanɛ́ an luasisikpɛɔ guu, ì kia pɔ Lua kpà baokpa, ì gbɛ̃́ɔ gbãgbã ń gyã bui piio ń gbɛ̃kaaũaɔ pii. 24Aà tɔ́ lì Sili busua pii, ɔ̃ wìɔ mɔɛ̀ ń gbɛ̃́ pɔ aalɛ gyã bui dodoa kɛɔ ge aalɛ wãwãkɛɔ ń tãadeɔ ń gbakɔɔndeɔ ń ɛɛɔ pii, ɔ̃ ì ń gbãgbã. 25Wà bɔ̀ Galile ń Dɛkapɔli busuo ń Yelusalɛũo ń Yudeo ń Yuudɛ̃ baaleo dasidasi, wà tɛ̀aazi.

Currently Selected:

Mat 4: Boo2024

Highlight

Copy