Mat 2

Saanyãdɔ̃naɔ mɔa Yesu gwai

1Wà Yesu ì Bɛtɛlɛũ#1 Sam 16.1 Yude busuu ki Helodi gɔɔɛ. Ɔ̃ saanyãdɔ̃naɔ bɔ̀ gukpɛ oi aa mɔ̀ Yelusalɛũ, 2aa gbɛ̃́ɔ là aa mɛ̀: Nɛ pɔ wa ì Yudaɔ kia ũ ku má ni? Wa aà saana è gukpɛ oiɛ, ɔ̃ wa mɔ kulɛiɛ̀. 3Kɛ́ ki Helodi yãpi mà, à bilikɛ̀ ń Yelusalɛũdeɔ pii. 4À Yuda sa'onkiaɔ ń Mɔizi ikoyãdanɛdeɔ kã̀aa pii, ɔ̃ à ń lá gu pɔ wa Mɛsi iu. 5Aa wèwà aa mɛ̀: Bɛtɛlɛũ, Yude busuu laɛ. Asa lá ãnabi kɛ̃̀n kɛ:

6Bɛtɛlɛũ pɔ ku Yudaɔ busuu,

ń kɛ̃sãa Yudaɔ mɛɛwiaɔzio fa.

Asa n guu ɔ̃ kia a bɔu,

i dɔaa ma gbɛ̃́ Isailiɔnɛ.#Mis 5.1-3

7Ɔ̃ Helodi saanyãdɔ̃naɔ sìsi asii guu, à saanapi bɔgɔɔ sãasã gbɛ̀amá. 8Ɔ̃ à ń gbaɛ Bɛtɛlɛũ à mɛ̀: À gɛ nɛpi gbɛagbɛa ń laaio. Tó a aà è, à mɔ omɛɛ, mapi sɔ̃, mí gɛ mà kulɛɛ̀.

9Kɛ́ aa kia yãmà, ɔ̃ aa dà zɛ́u. Ɔ̃ saana pɔ aa è gukpɛ oi yãa dɔ̀aanɛ́ lɔ e à gɛ̀ zɛ̀ nɛpi kukĩia. 10Kɛ́ aa saanapi è, an pɔ kɛ̀ na maamaa. 11Aa gɛ̃̀ kpɛ́u aa nɛpi è ń a da Maliamao, ɔ̃ aa wùlɛ ń gbɛɛu aa kùlɛɛ̀. Ɔ̃ aa ń aizɛɛ kpagoloɔ wɛ̃̀wɛ̃, aa aà gbà vua ń li'ɔ gĩnanao ń tulaletio. 12Lua ònɛ́ nana guu aasu bɔlɛ Helodi kĩio, ɔ̃ aa tà ń busuu ń zɛ́ pãleo.

Baalɛ taa ń Yesuo Egipi

13An taa gbɛa, Dii malaika bɔ̀ à mɔ̀ Yosɛfuwa nana guu à mɛ̀: Fɛlɛ ǹ nɛpi sɛ́ ń a dao, ní baalɛ ǹ tańnɔ Egipi, níɔ ku we e mà mɔ mà yã'onɛ lɔ, asa Helodi aɔ nɛpi wɛɛlɛ à dɛɛ.

14Ɔ̃ Yosɛfu fɛ̀lɛ gwãasĩna, à nɛpi sɛ̀ ń a dao à tàńnɔ Egipi. 15A ku we e Helodi gɛ̀ gàò. Bee kɛ̀ kɛ́ yã pɔ Dii dà ãnabiɛ a ò e kɛ yãiɛ à mɛ̀:

Ma a nɛ gbɛsì Egipi.#Oze 11.1

16Kɛ́ Helodi è saanyãdɔ̃naɔ ɔ̃nɔkɛ̀ɛɛ, aà pɔ pà maamaa. Lá a saanapi bɔgɔɔ taa dɔ̃ yã pɔ a gbɛ̀a saanyãdɔ̃napiɔwa yãi, ɔ̃ à gbɛ̃́ɔ zĩ̀, aa nɛgɔ̃ɛ pɔ kà wɛ̃̀ pla ge aai kaoɔ dɛ̀dɛ Bɛtɛlɛũ ń a bualoũɔ pii. 17Yã pɔ ãnabi Zelemi ò kɛ̀ sa à mɛ̀:

18Wà wii gbãa mà Lama,

wàlɛ ɔɔlɔ, wàlɛ bubuapɛ.

Lasɛli mɛ́ lɛ́ a nɛɔ ɔɔlɔ,

à gì awamai, asa aa ku lɔo.#Zel 31.15

19Kɛ́ Helodi gà, ɔ̃ Dii malaikapi bɔ̀ à mɔ̀ Yosɛfuwa Egipi nana guu 20à mɛ̀: Fɛlɛ ǹ nɛpi sɛ́ ń a dao, ní tańnɔ Isaili busuu, asa gbɛ̃́ pɔ aalɛ nɛpi wɛɔ gàga.

21Ɔ̃ à fɛ̀lɛ, à nɛpi sɛ̀ ń a dao à tàńnɔ Isaili busuu. 22Kɛ́ a mà Aakɛlau mɛ́ lɛ́ kible Yude a mae Helodi gbɛu, zɔ̃lɛa wekĩi vĩa aà kũ̀. Lua yã'òɛ̀ nana guu, ɔ̃ à tà Galile busuu, 23à gɛ̀ zɔ̃̀lɛ wɛ̃lɛ pɔ wì mɛ Nazalɛti. Beewa yã pɔ ãnabiɔ ò kɛ̀, aa mɛ̀: Wàli mɛɛ̀ Nazalɛti gbɛ̃́.

Currently Selected:

Mat 2: Boo2024

Highlight

Copy