Isa 58
58
Lɛyea sĩande
1Wiilɛ gbãugbãu,
nsu ǹ nzĩa kũkũo.
Ǹ n lɔɔ fɛlɛ musu lan kuu'ɔwa.
Ma gbɛ̃́ɔ tàae kpawakɛnɛ́,
Yakɔbu buipiɔ duunaɔ onɛ́.
2Aaìɔ ma wɛɛlɛ lagulɛdɔ,
an mɛsa ì wã ma yãkɛaɔ dɔ̃ai
lan bui pɔ ì yãkɛ a zɛ́wa,
ìli pãkpa a Lua yãdilɛaɔziowa.
Aaì yãgɔ̃gɔ̃a a zɛ́wa gbɛaa,
aaìɔ ye mà sɔ̃ńzi.
3Ɔ̃ aaì ma la: Bɔyãi wa lɛyèi,
kɛ́ nlɛ wá gwao ni?
Bɔyãi wa wazĩa bùsainɛ,
kɛ́ ń wá fãn vĩo ni?
Gwa! Á lɛyegɔɔ i ázĩa pɔeã kɛ,
mɛ́ i á zĩkɛnaɔ wɛtã pii.
4Gwa! Á lɛyea ì midɛ ń lɛkpaao ń soleo,
i kɔ̃ gbɛ̃ ń ɔkũ gbãao.
Á lɛye lá álɛ kɛ gbãɛwa
mà á wabikɛa ma musue?
5Lá ma lɛye dìlɛn wee?
Zĩabusaa ado yã nɛe?
I kɛ mipɛlɛa lan kpootɛ̃wa
ge wulɛa túfuu ń ulakasaɔ daa yã no.
Pɔ pɔ i mɛ lɛyen wea?
Bee mɛ́ ì kamagua?
6Lɛye pɔ má dìlɛ min kɛo lò?
À vãikɛnaɔ gala polo gbɛ̃́ɔwa,
à zuu bɔlɛnɛ́,
à gbɛ̃́ pɔ wàlɛ ɔtɔ̃máɔ gbaɛ,
í gbãamɔanɛ́ midɛ pii.
7À blɛli nɔandɛnaɛ,
à wɛ̃nade bɛsaide dilɛ.
Tó a gbɛ̃́ è bɛ puizi, àli pɔ nai.
Tó i baalɛ á mɛdoũdeɛo,#Mat 25.35
8gu a puɛ́ lan ĩatɛ̃ bilɛawa,
á aafia'e aannɔ,
á maakɛa a zɛmikũɛ́,
ma gawi iɔ tɛ́ á kpɛ.
9Tó a lɛzùmazi sa, má wewá,
tó a wiilɛ̀mazi, má oɛ́: Má kɛ́!
Tó a gbãamɔanɛ́ midɛ̀ á guu
ń ɔtondɔakɔ̃wao ń yãpãsĩ'oao,
10tó a nɔandɛna gbà á pɔeã blɛ,
mɛ́ a pɔ kpà wɛ̃nadewa à kã̀,
gu a puɛ́ gusiau,
gubeebee a gɔ̃ɛ́ lan fãanɛwa,
11míɔ dɔaaɛ́ gɔɔpii.
Má tó pɔ mɔwá gu tɛkũau,
má á wá baasaɛ́,
íɔ dɛ lan swalu mɔsɛdewa,
lan nibɔna pɔ a í lí baowa.
12Á á bɛzia vu,
á á wɛ̃lɛ pɔ kalɛa à gɛ̃̀gɛ̃ kɛkɛ,
wi mɛɛ́ bĩigbooa ń uazĩɔ kɛkɛnaɔ.
13Tó álɛ gbabɔ kãmabogɔɔzĩo,
mɛ́ álɛ ázĩa pɔeã kɛ ma gɔɔpiwao,
tó a mɛ̀ kãmabogɔɔ na,
mɛ́ a ma gɔɔpi dìlɛ gbia,
tó á dìlɛ gbia mɛ́ a á bɔɔlɛɔ tò,
tó i ázĩa pɔeã kɛuo,
mɛ́ i yãyaaabɔlɛuo,
14á pɔ a kɛa na,
mí tó àɔ kible busu gulɛsĩɔu,
mí tó à á dezi Yakɔbu tubible.
Ma Dii ma lɛ́ mɛ́ ò.
Currently Selected:
Isa 58: Boo2024
Highlight
Copy
Compare
Share
Want to have your highlights saved across all your devices? Sign up or sign in
Boko Bible © SIM International, 2024.
