Bɔa 37

Kpagolo kɛa

(Bɔa 25.10-22)

1Bezalɛli kpagolo kɛ̀ ń lɛpusia lío. A gbã̀a gãsĩsuu pla ń kĩnio, a yaasa gãsĩsuu do ń kĩnio, a lɛsĩ lɔ gãsĩsuu do ń kĩnio. 2À vua tɛ̃ɛtɛ̃ɛ kùlɛwà a guu ń a kpɛo pii, ɔ̃ à zãblè a lɛ́wa ń vuao à lìai. 3À vua zã pì mɛn siiɔ̃ kpagolopi pɔ ũ, ɔ̃ a pɛ̀pɛ a gbá mɛn siiɔ̃ɔwa kpɛla ń kpɛleo. 4À lɛpusia lí ã̀ pɔ̃ɔpɔ̃ɔ, à vua kùlɛ lípiɔwa. 5À lipɔ̃ɔɔpiɔ sɔ̀lɔsɔlɔ zã pɔ pɛpɛ kpagolo saaloɔwau kpagolopi sɛliɔ ũ.

6À a nɛtaɛ pì ń vua tɛ̃ɛtɛ̃ɛo duunkɛ̃makĩi ũ, a gbã̀a gãsĩsuu pla ń kĩnio, a yaasa gãsĩsuu do ń kĩnio. 7À kelubiɔ pì mɛn pla ń vua pɔ a gbɛ̃̀gbɛ̃ maannɔo nɛtaɛpi pɔ ũ, 8ado lɛla, ado lɛle. À ń pí daaa ń nɛtaɛpioɛ. 9An gãsĩaɔ pooa musu a nɛtaɛpia. An aɛ dɔakɔ̃wa, an wɛ́ pɛa a nɛtaɛpiwa.

Taabũnu kɛa

(Bɔa 25.23-30)

10Aa taabũnu kɛ̀ ń lɛpusia lío, a gbã̀a gãsĩsuu pla, a yaasa gãsĩsuu do, a lɛsĩ lɔ gãsĩsuu do ń kĩnio. 11Aa vua tɛ̃ɛtɛ̃ɛ kùlɛwa, ɔ̃ aa zãblè a lɛ́wa ń vuao aa lìai. 12Aa lipɛpɛɛ dà aa lìai, a lɛsĩ kà ɔguo yaasa do, ɔ̃ aa zãblè a lɛ́wa ń vuao. 13Aa vua zã pì mɛn siiɔ̃ taabũnupi pɔ ũ, aa pɛ̀pɛ a gola mɛn siiɔ̃ɔwa a gbapɛkĩi. 14Aa zãpiɔ pɛ̀pɛ lipɛpɛɛpi zĩlɛ taabũnupi sɛliɔ pɔ ũ. 15Lɛpusia lí ɔ̃ aa ã̀ lipɔ̃ɔɔpiɔ ũ, aa vua kùlɛ lípiɔwa, kɛ́ wali taabũnupi sɛò. 16Aa tapɛlɛntiɔ ń toonaɔ pì ń vua tɛ̃ɛtɛ̃ɛo taabũnupi pɔɔ ũ ń imibɔɔ ń lo pɔ wa vɛ̃ɛ kauɔ.

Dau pia

(Bɔa 25.31-40)

17Aa dau pì ń vua tɛ̃ɛtɛ̃ɛo, aa a gbá ń a lidao ń a vú piaaɔ ń a bɛɔ gbɛ̃̀gbɛ̃ maannɔ ń vua doũo. 18Aa daupi gɔ̃nakɛ̃̀ mɛn soolo, kpɛla aaɔ̃, kpɛle aaɔ̃. 19Gɔ̃napiɔ pii vú vĩ mɛn aaɔ̃'aaɔ̃ zoolozoolonnɔ lan kãnavuwa ń a bɛɔ. Màa dau gɔ̃na mɛn soolopiɔ dɛ pii. 20Daupi lida vúpiɔ vĩ lɔ mɛn siiɔ̃, apii ń a bɛo. 21A bɛpi sɛ̃ia ku dau lidawa gɔ̃na mɛn plaɔ pɛkĩi. A plaade ku gɔ̃na mɛn pla pãleɔ pɛkĩi, a aaɔ̃de ku gɔ̃na mɛn pla pãleɔ pɛkĩi lɔ. Màa daupi lida gɔ̃na mɛn sooloɔ dɛ. 22Aa daupi lida pì ń vua tɛ̃ɛtɛ̃ɛoɛ ń a kɔpɛpɛkĩiɔ ń a gɔ̃napiɔ gɔ̃̀ɔ. 23Aa a filiaɔ pì mɛn sopla ń vua tɛ̃ɛtɛ̃ɛo ń a kɛkɛbɔɔ ń a tɛsibɔɔ. 24Vua pɔ aa daupi pìò ń a pɔkeleɔ pii kilo baakwi ń siiɔ̃oɛ.

Tulaleti katɛakĩi kɛa

(Bɔa 30.1-5)

25Aa tulaleti katɛakĩi kɛ̀ ń lɛpusia lío. A gbã̀a gãsĩsuu do, a yaasa gãsĩsuu do lɔ. A gbã̀a ń a yaasao sáaɛ, a lɛsĩ sɔ̃, gãsĩsuu pla. Aa pì ń a kɔbaɔ gɔ̃̀ɔɛ. 26Aa vua tɛ̃ɛtɛ̃ɛ kùlɛ a kpɛɔwa aa lìai ń a musuo ń a kɔbaɔ, ɔ̃ aa zãblèwà ń vuao aa lìai. 27Aa vua zã pì kpɛla ń kpɛleo mɛn plapla, aa pɛ̀pɛ zã pɔ aa blewà zĩlɛ oi, kɛ́ wà e lipɔ̃ɔɔ sɔlɔsɔlɔu tulaleti katɛakĩipi sɛliɔ ũ. 28Lɛpusia lí ɔ̃ aa ã̀ lipɔ̃ɔɔpiɔ ũ, aa kpà ń vuao.

29Aa nisi pɔ wì pɔ dilɛò à gɔ̃ Dii pɔ ũ kɛ̀ lɔ ń tulaleti gĩnana zalalao, lá tulaletizɔ̃na ì kɛwa.

Currently Selected:

Bɔa 37: Boo2024

Highlight

Copy